sitoo 17
17
yone tesalonike
1mo emo'cʉ'cʉnʉ to tehe mia ci ceonʉ 'o poolo ho siila, sucaefi ne 'anfuipoli. 'apolonia, esmi to tesalonike, to ic'o panto kaitoo to couyutaya. 2maito lasi at'oca 'o poolo ho yʉmeʉmʉ to kaitoo, acngucnguhu tuyu no 'ansokunici, i'tohungu to seiso ho yupa eehcʉvho 'o mocmo ci cou, 3esansana a'vinano soomei 'o kilisto te ahtuo'ten'a tiou no 'atutumzo, tenac'u i'mi no mcoi ho smoevovei. isi yainca: <'e os'o mi'usneni muu ho epeaska ci iesu, 'ai'oeno kilisto.> 4to 'ayumonahe panto mo tmaa'uzo ci cou, micu cono ceonʉ 'o poolo ho siila; pantomo maezo tmaa'uzo cila m'ohkuyu to hamo ci coungilisia ho i'o la so'ehti to maamespingi mo maezo tmaa'uzo.
5at'inghi 'o couyutaya to ic'o mo smo'eubut'u, eteuyunu to mayayaksai ho biteuyunu, yonta hosa ho ec'ʉ to 'afeo'fu'u, mo toemʉemʉ to emoo to iesun. i'ima 'o poolo ho i'o siila, tehe faeni tomo pak'i ci cou; 6maica ho o'a ihe elʉa, ihecu e'usna to taicini 'o iesun ho i'o piyo ci sinto, ehpʉngneni ho yainca: <'e mo koa 'afeo'fu'u ci cou, maitan'e micu cmʉ'ho ta hosato. 7'e iesun ita aʉt'ʉca to emoo taini! mihin'i yutasufku to h'oesvʉta to honte, yainca pantomon'a cihi ci mo h'unasi ci honte, zou iesu na ongkosi.> 8'e e'e eni isi i'mizi no poot'ova 'o taicini ta hosa ho i'o mo botngonʉ ci cou. 9'o taicini ta hosa isi pashʉya ho tmuhnoi 'o iesun ho i'o mocmo ci cou, isicu ataveiya poesih'a.
yone piliya
10ne micu yofna, ihecu osnia poa uhne piliya to sinto 'o poolo ho i'o siila. ne micu esmi ne'e, cu yʉmeʉmʉ to kaitoo to couyutaya. 11'e cou tan'e mo ma'cocoyʉhe to coutesalonike. la asno'zonʉ tmalʉ to e'e to fukuin, huhucmasi eocoyʉ to seiso ho patotiska, 'ucia cohivi 'o e'e to poolo mio nana a'ʉmtʉ emio. 12to 'ayumonahe mo botngonʉ 'omo tmaa'uzo; mo 'enepio cila einva ci maamespingi ho haahocngʉ to ngilisia mo maezo tmaa'uzo. 13at'inghi, ne ihe tac'ʉhi to couyutaya ne tesalonike homo maezo yone piliya 'o poolo ho psoyaski no e'e to hamo, cu usa ho 'afeo'fu'u, poot'ova 'o botngonʉ. 14'o sinto ihe osnia poa emo'usnu to mia'usnu to aezonʉ to etʉpʉ 'o poolo; 'o siila ho i'o temote mion'a nochʉmʉ ne piliya. 15i'o mo poʉt'ʉcʉ to poolo ci cou ihe poc'ʉhan'a ne yaaten, micu yuovei ne piliya, ihe evaha 'o isi eutotaveineni to poolo ci e'e, poa aupcio meecunu 'o siila ho temote, te yupteilʉ ne'e.
yone yaaten
16ne mo yone yaaten 'o poolo ho totea 'o siila ho i'o temote, isi yuue'iya mo nongabo to hosa 'o uacoua, mo na'no nac'o 'o 'tohʉngʉsi. 17mo yonto kaitoo 'o poolo ho yupa eehcʉvho 'o couyutaya ho i'omo m'ohkuyu to hamo ci couyafana, maezo huhucmasi yonto coca ho yupa eehcʉvho to lasic'o lʉlʉa ci cou. 18panto piyo cimo ma'hi'usnu to 'ipikulos ho ma'hi'usnu to sutoya ci coumou'tohʉngʉ la maezo uso ho yupa eehcʉvho to poolo. panto mo mainca: <'e lac'o mimimiyo ci cou mo meefʉc'ʉ no cuma?>
panto mo maezo mainca: <mais'a mita psoyaski no hicu no mocmo ci hpʉhpʉngʉ.> homo maica 'e e'ehe. mo i'mi ho isi epeaska to poolo 'o iesu ho i'o fukuin no smoevovei. 19ihecu hafa uhto ngikai to yale paku 'o poolo, yainca: <temza peelʉi ake'a cohivi 'e osko eʉsvʉsvʉta ci mon'a faeva ci motposʉ? 20mo piyo ci hi'hioa 'e imza na'na taunona'vʉ ho imza talʉi, 'ucia asansana zou cuma na e'a'ausnasi.> ( 21'ia mala maica 'e couyaaten ho i'ola nohi'u ci cou h'unano hpʉhpʉngʉ. la kaebʉ ho lahe toʉsvʉsvʉtneni namo faeva ci lahe totalʉi ci a'a'ausna.)
22mo yac'ʉ to ngikai to yale paku 'o poolo, yainca: <'e cou ta yaaten! os'o cohivi na muu lamu yontamo mav'ov'o ci hi'hioa ho aa'pucva pa'teni na lamu hia asno'zonʉ m'ohkuyu no mahihicu. 23ne mi'o smaingongabo ta hosa, yue'iya 'o lamu 'oyona m'ohkuyu, cimi'o teolʉ to mo conci 'oyona sʉ'tʉ, panto isi tposi to skoskopnasi ho yainca <<sʉ'teni no o'a isi honga ci hamo>>. maitan'e te'oeno eʉsvʉta muu 'e o'a imu honga, holea at'ingha p'ohkui ci hamo. 24'e mosola mooyai ta engʉca, ceoa, ho ita aʉcʉcʉhʉ ci hamo zou nooe'oca ta engʉca ho ceoa. o'ala yonta isi teyai ta cou ci emoo, 25maezo o'ate nama noa sʉ'ti ta cou; maica ina nsou, peucu, ho i'e acʉcʉhʉ ci macucuma isi iachia faeni ta yatatiskova. 26mo i'mi to mo cihi ho mooyai masusuezopʉ, poa apeaski ho nongaboi 'e ceoa, a'vinano ayoca esvʉta na tehe hie ho ina tehe yoni ci mahuhupa. 27ho isi yaica 'a isieno akoeva no poa biebimi to hamo, nenusino te meelʉ yono eangacʉmʉ ho elʉa 'o hamo. a'ʉmtʉsi, 'o hamo o'amo nomcovhi ta mo macicihi. 28pantola mainca: <<'e h'oyunsovato, hia aut'ot'ou, ho mito yayo mo acʉhʉ yono emucusi.>> maezo mais'a 'o e'e to letohpʉngʉ ta 'ayumonamu: <<'aeno maezo 'o'okosi a'to.>> 29ho zoueno 'o'okosi a'to, o'anteto ta'ngangacʉma na yu'ausna to hamo ho yainca nteto peelʉi titheni no totontone, boemi no king nging. hocieno fatu ho mooyai uacoua ho yoyayaeza na mi'ausnasi. 30ho lan'a yono moʉfngʉ ho nongonongo 'e yatatiskova, o'a mocu lasi cumasa to hamo, at'inghi maitan'e isicu pashʉya to hamo 'e yatatiskova ho poa mongoi no mo kokuzo ci ceonʉ. 31maica isicu esvʉta na hiesi, tesi ieni to isi epeiya ci mo cihi, boemi no moulʉlʉ ho yʉsvʉta 'e mauhpʉhpʉngʉ; ieni no i'mi no mcoi ho smoevovei 'emo cihi, isicu faeni ta yatatiskova 'e huomza.>
32ne ihe talʉi ho isi yue'engha to poolo na i'mi no mcoi ho smoevovei, panto mo potfʉngʉ ho cocvi; panto mo mainca: <imza 'ucia i'vaha talʉi ho ciko eʉsvʉsvʉta 'e hi'hioa eni.> 33micu mongoi to ngikai 'o poolo. 34mo piyo ci cou 'omo to'ofeihni hocu sinto; to 'ayomonasi panto ngi'in to yalepaku ci tonisiu, ho i'o mon'a cihi ci mamespingi zou tamali 'o ongkosi, ho i'o mo piyo ci cou.
ទើបបានជ្រើសរើសហើយ៖
sitoo 17: bsnfe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Society in Taiwan © 台灣聖經公會版權所有 2014
