Génesis 1
1
Janajta, kay pachatawan Dios ruwan
1Qallariypi Diosqa janajta, kay pachata ima ruwarqa. 2Kay pachaqa t'ustipacha, ch'usajlla kasharqa. Yakutaj sinch'i laqhawan p'ampasqa karqa. Diospa Espirituntaj yaku patata muyuykachasharqa. 3Chantá Dios nerqa: K'anchay kachun, nispa. K'anchaytaj karqa. 4Diostaj k'anchayta sumaj kasqanta qhawarqa,#1.4 Sumaj kasqanta: “Sumaj” niyta munan: Mana pantayniyoj, k'acha, ima munay, tukuy imapaj allin. Diospa ruwasqanqa tukuynin manchay sumaj, paypa munasqanman jina ruwasqa kasqanrayku. chantá k'anchayta laqhamanta t'aqarqa. 5Chantá Dios k'anchayta suticharqa “p'unchay”, nispa. Laqhatataj “tuta”, nispa suticharqa. Jinaqa inti yaykuymanta q'ayantin inti yaykuykama, ñawpaj kaj p'unchay karqa.
6Chaymanta Dios nerqa: Yakuta uramanta patamantawan t'aqananpaj uj ch'usaj kachun, yakuta iskayman t'aqananpaj, nispa. Ajinataj karqa. 7Chantá Dios yakuta t'aqananpaj ch'usajta ruwarqa. Jinaqa t'aqaj ch'usajqa urapi kaj yakuta t'aqarqa patapi kaj yakumanta. 8Diostaj yakuta iskayman t'aqaj ch'usajta suticharqa: “Janaj”,#1.8 Janaj: Castilla rimaypi “cielo”. Niyta munan: Aswan patanej, jaqaynej. Janaj kashan, maypichus phuyukuna, ch'askakuna chantá inti, killa ima kashanku, chay. Janaj pacharí Diospa tiyakunan. nispa. Jinaqa inti yaykuymanta q'ayantin inti yaykuykama, iskay kaj p'unchay karqa.
9Chaymanta Dios nerqa: Janajpa urayninpi kaj yakoqa uj cheqallapi tantakuchun, ch'aki kaj rikhurinanpaj, nispa. Ajinataj karqa. 10Chantá Diosqa ch'aki kajta suticharqa: “Jallp'a”, nispa. Yaku uj cheqallapi tantakojtataj suticharqa: “Mama qocha”, nispa. Chayta Diosqa sumaj kasqanta qhawarqa. 11Chantá Dios nillarqataj: Jallp'api tukuy imaymana qhorakuna, sach'akuna wiñachunku: Mujuyoj qhorakuna, poqoj sach'akuna ima, nispa. Ajinataj karqa. 12Chantá jallp'api tukuy imaymana q'omer kaj wiñarqa: Mujuyoj qhorakuna, poqoyninpi mujuyoj sach'akuna ima. Chaykunatataj Dios sumaj kasqanta qhawarqa. 13Jinaqa inti yaykuymanta q'ayantin inti yaykuykama, kinsa kaj p'unchay karqa.
14Chaymanta Dios nerqa: Janajpi k'anchajkuna kachun, p'unchayta tutamanta t'aqananpaj, jinallataj pacha mit'ata, p'unchaykunata, watakunata ima t'aqananpaj. 15Janajpi k'anchajkuna kachunku kay pachata k'anchamunankupaj, nispa. Ajinataj karqa. 16Diosqa iskay jatuchaj k'anchajkunata ruwarqa, jatun kajta p'unchaypi k'anchananpaj, juch'uy kajtataj tutan k'anchananpaj. Chaymanta ch'askakunatapis ruwallarqataj. 17Chantá Dios k'anchajkunata janajpi churarqa, 18tutapis, p'unchaypis kay pachata k'anchamunankupaj, chantá k'anchayta laqhamanta t'aqanankupaj. Chaykunatataj Diosqa sumaj kasqanta qhawarqa. 19Ajinaqa inti yaykuymanta q'ayantin inti yaykuykama, tawa kaj p'unchay karqa.
20Chantá Dios nillarqataj: Yakupi kawsaj tukuy imaymana animalkuna rikhurichunku, jinallataj jallp'a patata phawajkunapis kachunku, nispa. Ajinataj karqa. 21Diosqa mama qochapi jatuchachaj animalkunata ruwarqa, yakupi tukuy imaymana kawsajkunata ima. Jinallataj tukuy imaymana phawajkunatapis ruwallarqataj. Chaykunatataj Diosqa sumaj kasqanta qhawarqa. 22Chantá Dios tukuy ruwasqan animalkunata saminchaspa,#1.22 Saminchasqa, saminchay: Castilla rimaypi “bendecir”. Jinaqa saminchay niyta munan: Kusiy, kusisqa, kusiyniyoj, allin rin, allin llojsin, allin rinanta munapuy. Niyta munallantaj: T'inka, t'inkachiy. nerqa: Miraychej, mama qochamantaj junt'aychej. Phawajkunapis jallp'a patapi may chhikata mirachunku, nispa. 23Ajinaqa inti yaykuymanta q'ayantin inti yaykuykama, phishqa kaj p'unchay karqa.
24Chaymanta Dios nillarqataj: Jallp'a patapi tukuy imaymana animalkuna rikhurichunku: Uywakuna, k'ita animalkuna, pampata qhatatakuspa purej animalkuna ima, nispa. Ajinataj karqa. 25Diosqa tukuy imaymana animalkunata ruwarqa: K'ita animalkunata, uywakunata, jinallataj qhatatakuspa purejkunata ima. Chaykunatataj Diosqa sumaj kasqanta qhawarqa.
26Chaymantataj Dios nerqa: Runata ruwanachej noqanchej jina kananpaj, noqanchejman rijch'akojta. Chantá pay kamachichun tukuy challwata, p'isqokunata, tukuy animalta, qhatatakuspa purejkunata ima, nispa.
27Diosqa runata ruwaspa,#1.27 Payman rijch'akojta ruwarqa: Runaqa Diosman rijch'akoj jina ruwasqa kasqa. Ajinata runata Dios ruwasqa Dioswan kawsakuyta atinanpaj, chantá parlarikuyta atinanpaj jina. Jinallataj runaqa Diospa rijch'ayninman jina ruwasqa kasqa, Diospa sutinpi kay pachata, chantá kay pachapi kaj chhikata qhawananpaj, kamachinanpaj ima. Gn 5.1; 9.6; 1 Co 11.7; Stg 3.9.
payman rijch'akojta ruwarqa.
Qharitawan, warmitawan ruwarqa.#1.27 Qharita warmita ruwarqa: Diosqa qhari runata, chantá warmi runata ruwasqa pay imatachus munasqanta junt'anankupaj. Gn 2.18; Mt 19.4; Mc 10.6.
28Chantá paykunata saminchaspa, nerqa:
Ashkhata miraychej, kay pachamantaj junt'aychej.
Kamachiyniykichej uraman churaychej,
makiykichejpitaj jap'iychej mama qochapi kaj challwakunata, phawajkunata,
jallp'a patapi qhatatakuspa purejkunatapis, nispa.
Ajinata Dios nerqa.
29Chaymanta Diosqa ruwasqan runakunata nerqa: Qhawaychej, qankunaman kay pachapi tukuy mujuyoj qhorakunata, tukuy imaymana poqoj sach'akunatawan qoykichej chaymanta mikhunaykichejpaj. 30Tukuy kay pachapi k'ita animalkunaman, phawajkunaman, qhatatakuspa purejkunaman ima qhorata mikhunankupaj qoni, nispa. Ajinataj karqa. 31Chantá Diosqa tukuy ima ruwasqan manchay sumajpuni kasqanta qhawarqa. Ajinaqa inti yaykuymanta q'ayantin inti yaykuykama, sojta kaj p'unchay karqa.
ទើបបានជ្រើសរើសហើយ៖
Génesis 1: DQPC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Revisión Biblia Quechua Boliviano © Sociedad Bíblica Boliviana, 2017.