អេសាយ 66
66
ការជំនុំជម្រះ និងសេចក្ដីសង្ឃឹម
1ព្រះយេហូវ៉ាមានបន្ទូលដូច្នេះថា៖
“ផ្ទៃមេឃជាបល្ល័ង្ករបស់យើង
ផែនដីជាកំណល់ជើងរបស់យើង។
តើអ្នករាល់គ្នានឹងសាងសង់ដំណាក់នៅឯណាសម្រាប់យើង?
តើកន្លែងនៃការសម្រាករបស់យើងនៅឯណា?
2ដ្បិតដៃរបស់យើងបានបង្កើតរបស់សព្វសារពើទាំងនេះ
នោះរបស់សព្វសារពើទាំងនេះក៏កើតមាន”។
នេះជាសេចក្ដីប្រកាសរបស់ព្រះយេហូវ៉ា។
“ប៉ុន្តែមនុស្សបែបនេះវិញ ដែលយើងយកចិត្តទុកដាក់
គឺអ្នកដែលរាបទាប ហើយមានវិប្បដិសារីខាងឯវិញ្ញាណ
ព្រមទាំងញាប់ញ័រចំពោះពាក្យរបស់យើង។
3រីឯអ្នកដែលសម្លាប់គោបា ប្រៀបដូចជាអ្នកដែលវាយសម្លាប់មនុស្ស;
អ្នកដែលថ្វាយកូនចៀមជាយញ្ញបូជា ប្រៀបដូចជាអ្នកដែលបំបាក់កឆ្កែ;
អ្នកដែលថ្វាយតង្វាយធញ្ញជាតិ ប្រៀបដូចជាអ្នកដែលថ្វាយឈាមជ្រូក;
អ្នកដែលដុតកំញានធ្វើជាតង្វាយរំលឹក ប្រៀបដូចជាអ្នកដែលឲ្យពររូបបដិមាករ;
អ្នកទាំងនោះបានជ្រើសរើសផ្លូវរបស់ខ្លួន
ហើយព្រលឹងរបស់ពួកគេពេញចិត្តនឹងសេចក្ដីគួរឲ្យស្អប់ខ្ពើមរបស់ខ្លួន។
4ដូច្នេះ យើងនឹងជ្រើសរើសការធ្វើទុក្ខសម្រាប់ពួកគេ
ហើយនាំអ្វីដែលពួកគេភ័យខ្លាចមកលើពួកគេ។
ដ្បិតយើងបានហៅ ប៉ុន្តែគ្មានអ្នកណាឆ្លើយ
យើងបាននិយាយ ប៉ុន្តែពួកគេមិនបានស្ដាប់តាម
ផ្ទុយទៅវិញ ពួកគេបានធ្វើអំពើអាក្រក់ក្នុងភ្នែករបស់យើង
ក៏បានជ្រើសរើសអ្វីដែលយើងមិនពេញចិត្ត”។
5ពួកអ្នកដែលញាប់ញ័រចំពោះព្រះបន្ទូលរបស់ព្រះអង្គអើយ
ចូរស្ដាប់ព្រះបន្ទូលរបស់ព្រះយេហូវ៉ាចុះ!
ព្រះអង្គមានបន្ទូលថា៖ “បងប្អូនរបស់អ្នករាល់គ្នាដែលស្អប់អ្នករាល់គ្នា
ជាអ្នកដែលកាត់អ្នករាល់គ្នាចេញដោយព្រោះនាមរបស់យើង
ពួកគេបាននិយាយថា:
‘សូមឲ្យព្រះយេហូវ៉ាទទួលការលើកតម្កើងសិរីរុងរឿង
ដើម្បីឲ្យពួកយើងបានឃើញអំណររបស់ពួកឯងផង!’
ប៉ុន្តែពួកគេនឹងអាម៉ាស់មុខវិញ”។
6មានសូរសន្ធឹកចេញពីទីក្រុង
មានសំឡេងចេញពីព្រះវិហារ
ជាសំឡេងដែលព្រះយេហូវ៉ាតបសងសំណងដល់សត្រូវរបស់ព្រះអង្គ។
7ស៊ីយ៉ូនបានសម្រាលកូន មុនពេលឈឺពោះឆ្លងទន្លេ
នាងបានបង្កើតកូនប្រុសម្នាក់ មុនពេលការឈឺពោះឆ្លងទន្លេមកដល់នាង។
8តើនរណាធ្លាប់ឮការបែបនេះ?
តើនរណាធ្លាប់ឃើញការដូច្នេះ?
តើនគរមួយអាចកើតមានក្នុងមួយថ្ងៃឬ?
តើប្រជាជាតិមួយអាចកើតមកក្នុងមួយរំពេចឬ?
យ៉ាងណាមិញ កាលណាស៊ីយ៉ូនបានឈឺពោះឆ្លងទន្លេ
នាងបានសម្រាលកូនៗរបស់នាងភ្លាម។
9ព្រះយេហូវ៉ាមានបន្ទូលថា៖
“តើយើងនាំទៅដល់កំណត់ដែលត្រូវសម្រាល
ហើយមិនឲ្យកើតមកឬ?”។
ព្រះរបស់អ្នកមានបន្ទូលថា៖
“តើយើងធ្វើឲ្យកើតមក ហើយបង្ខាំងផ្ទៃឬ?”។
10អស់អ្នកដែលស្រឡាញ់យេរូសាឡិមអើយ
ចូរអរសប្បាយជាមួយនាង
ចូរត្រេកអរនឹងនាងចុះ។
អស់អ្នកដែលកាន់ទុក្ខចំពោះនាងអើយ
ចូររីករាយនឹងនាងដោយសេចក្ដីរីករាយចុះ
11ដើម្បីឲ្យអ្នករាល់គ្នាបានបៅ
ហើយឆ្អែតដោយដោះនៃការលួងលោមរបស់នាង
ដើម្បីឲ្យអ្នករាល់គ្នាបានជញ្ជក់
ហើយរីករាយដោយដោះដ៏ឧត្ដមរបស់នាង។
12ដ្បិតព្រះយេហូវ៉ាមានបន្ទូលដូច្នេះថា៖
“មើល៍! យើងនឹងបន្លាយសេចក្ដីសុខសាន្តដូចជាទន្លេដល់នាង
យើងនឹងបន្លាយសិរីរុងរឿងនៃប្រជាជាតិនានាដូចជាទឹកជ្រោះជន់លិចដល់នាង។
អ្នករាល់គ្នានឹងបៅ អ្នករាល់គ្នានឹងត្រូវបានពនៅចំហៀងខ្លួន
ព្រមទាំងត្រូវបានថ្នាក់ថ្នមនៅលើភ្លៅផង។
13ដូចដែលកូនត្រូវម្ដាយលួងលោមយ៉ាងណា
យើងនឹងលួងលោមអ្នករាល់គ្នាយ៉ាងនោះដែរ
គឺអ្នករាល់គ្នានឹងត្រូវបានលួងលោមនៅយេរូសាឡិម”។
14នៅពេលអ្នករាល់គ្នាបានឃើញ ចិត្តរបស់អ្នករាល់គ្នានឹងរីករាយ
ឆ្អឹងអ្នករាល់គ្នានឹងលូតលាស់ដូចស្មៅខ្ចី;
ព្រះហស្តរបស់ព្រះយេហូវ៉ានឹងត្រូវបានសម្ដែងដល់បាវបម្រើរបស់ព្រះអង្គ
ប៉ុន្តែព្រះអង្គទ្រង់ព្រះពិរោធនឹងសត្រូវរបស់ព្រះអង្គ។
15ដូច្នេះមើល៍! ព្រះយេហូវ៉ានឹងយាងមកក្នុងភ្លើង
រទេះចម្បាំងរបស់ព្រះអង្គនឹងមកដូចជាខ្យល់កួច
ដើម្បីសងព្រះពិរោធរបស់ព្រះអង្គក្នុងភាពក្ដៅក្រហាយ
ព្រមទាំងសងការស្ដីបន្ទោសរបស់ព្រះអង្គដោយភ្លើងសន្ធោសន្ធៅ។
16ដ្បិតព្រះយេហូវ៉ានឹងជំនុំជម្រះគ្រប់ទាំងសាច់ដោយភ្លើង និងដោយដាវរបស់ព្រះអង្គ
នោះអ្នកដែលត្រូវព្រះយេហូវ៉ាសម្លាប់នឹងមានច្រើន។
17“ពួកអ្នកដែលញែកខ្លួនជាវិសុទ្ធ ហើយជម្រះខ្លួន ដើម្បីចូលទៅសួនច្បារ ដោយតាមមួយនោះដែលនៅកណ្ដាលចំណោមពួកគេ ជាពួកអ្នកស៊ីសាច់ជ្រូក របស់គួរឲ្យស្អប់ខ្ពើម និងកណ្ដុរ ពួកគេនឹងវិនាសទៅជាមួយគ្នា”។ នេះជាសេចក្ដីប្រកាសរបស់ព្រះយេហូវ៉ា។
18ព្រះយេហូវ៉ាមានបន្ទូលថា៖ “ដ្បិតយើងស្គាល់ទង្វើ និងគំនិតរបស់ពួកគេ។ នឹងមានពេលមកដល់ដើម្បីប្រមូលអស់ទាំងប្រជាជាតិ និងភាសា នោះពួកគេនឹងមក ហើយឃើញសិរីរុងរឿងរបស់យើង។ 19យើងនឹងដាក់សញ្ញាសម្គាល់មួយនៅក្នុងចំណោមពួកគេ ព្រមទាំងចាត់អ្នករត់រួចក្នុងចំណោមពួកគេឲ្យទៅរកប្រជាជាតិនានា គឺតើស៊ីស ពូល និងលូឌដែលយឹតធ្នូ ទូបាល និងយ៉ាវ៉ាន បណ្ដាកោះនៅឆ្ងាយ ដែលមិនទាន់ឮដំណឹងរបស់យើង និងមិនទាន់ឃើញសិរីរុងរឿងរបស់យើង។ អ្នកទាំងនោះនឹងប្រកាសសិរីរុងរឿងរបស់យើងក្នុងចំណោមប្រជាជាតិនានា។ 20ពួកគេនឹងនាំបងប្អូនទាំងអស់របស់អ្នករាល់គ្នាចេញមកពីអស់ទាំងប្រជាជាតិ ទុកជាតង្វាយដល់ព្រះយេហូវ៉ា ដោយឲ្យជិះសេះ រទេះចម្បាំង គ្រែស្នែង លាកាត់ និងអូដ្ឋមកយេរូសាឡិមភ្នំដ៏វិសុទ្ធរបស់យើង ដូចដែលកូនចៅអ៊ីស្រាអែលនាំតង្វាយមកដំណាក់របស់ព្រះយេហូវ៉ា ក្នុងភាជនៈបរិសុទ្ធ។ 21យើងនឹងយកអ្នកខ្លះពីពួកគេ សម្រាប់ជាបូជាចារ្យ និងជាពួកលេវីដែរ”។ ព្រះយេហូវ៉ាមានបន្ទូលដូច្នេះហើយ។
22នេះជាសេចក្ដីប្រកាសរបស់ព្រះយេហូវ៉ា៖
“ដូចដែលផ្ទៃមេឃថ្មី និងផែនដីថ្មីដែលយើងនឹងបង្កើតនោះ ស្ថិតស្ថេរនៅចំពោះយើងយ៉ាងណា
ពូជពង្ស និងឈ្មោះរបស់អ្នករាល់គ្នាក៏នឹងស្ថិតស្ថេរយ៉ាងនោះដែរ”។
23ព្រះយេហូវ៉ាមានបន្ទូលថា៖
“ពេលនោះនឹងមានកើតឡើងដូច្នេះ:
រាល់ថ្ងៃចូលខែ និងរាល់ថ្ងៃសប្ប័ទ
គ្រប់ទាំងសាច់នឹងមកថ្វាយបង្គំនៅចំពោះយើង។
24“ពួកគេនឹងចេញទៅមើលសាកសពរបស់ពួកមនុស្សដែលបះបោរនឹងយើង។ ជាការពិត ដង្កូវរបស់សាកសពទាំងនោះមិនចេះងាប់ ហើយភ្លើងលើវាមិនចេះរលត់ គឺវានឹងក្លាយជាទីខ្ពើមរអើមដល់មនុស្សទាំងអស់”៕៚
ទើបបានជ្រើសរើសហើយ៖
អេសាយ 66: GKHB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
GLOBAL KHMER BIBLE©
Copyright © 2023 by Global Bible Initiative