អេសាយ 12

ចម្រៀងសរសើរព្រះ

1នៅថ្ងៃនោះ អ្នកនឹងនិយាយថា៖

“ព្រះយេហូវ៉ាអើយ ទូលបង្គំនឹងអរព្រះគុណព្រះអង្គ!

ទោះបីជាព្រះអង្គបានក្រេវក្រោធនឹងទូលបង្គំក៏ដោយ

ក៏ព្រះពិរោធរបស់ព្រះអង្គបានបែរចេញទៅ

ហើយព្រះអង្គបានសម្រាលទុក្ខទូលបង្គំវិញ។

2មើល៍! ព្រះជាសេចក្ដីសង្គ្រោះរបស់ខ្ញុំ

ខ្ញុំនឹងទុកចិត្តលើព្រះអង្គ ហើយមិនភ័យខ្លាចឡើយ

ដ្បិតព្រះអម្ចាស់ គឺព្រះយេហូវ៉ា ជាកម្លាំង និងជាចម្រៀងរបស់ខ្ញុំ

ហើយព្រះអង្គបានជាសេចក្ដីសង្គ្រោះរបស់ខ្ញុំ”។

3ដោយហេតុនេះ អ្នករាល់គ្នានឹងដងទឹកពីអណ្ដូងនៃសេចក្ដីសង្គ្រោះដោយអំណរ។

4នៅថ្ងៃនោះ អ្នករាល់គ្នានឹងនិយាយថា៖

“ចូរអរព្រះគុណដល់ព្រះយេហូវ៉ា

ចូរស្រែកហៅព្រះនាមរបស់ព្រះអង្គ

ចូរប្រកាសអំពីកិច្ចការរបស់ព្រះអង្គនៅក្នុងចំណោមបណ្ដាជន

ចូររំលឹកគេថាព្រះនាមរបស់ព្រះអង្គត្រូវបានលើកតម្កើង។

5ចូរច្រៀងសរសើរតម្កើងព្រះយេហូវ៉ា ដ្បិតព្រះអង្គបានធ្វើកិច្ចការដ៏អស្ចារ្យ

ចូរឲ្យផែនដីទាំងមូលដឹងការនេះជាប្រាកដ។

6ពួកអ្នកដែលរស់នៅស៊ីយ៉ូនអើយ

ចូរស្រែកហ៊ោ ហើយច្រៀងដោយអំណរ

ដ្បិតអង្គដ៏វិសុទ្ធនៃអ៊ីស្រាអែលទ្រង់ធំឧត្ដមនៅកណ្ដាលអ្នករាល់គ្នា!”៕

ទើបបានជ្រើសរើសហើយ៖

អេសាយ 12: GKHB

គំនូសចំណាំ

ចម្លង

ប្រៀបធៀប

ចែករំលែក

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ខគម្ពីរពេញនិយមពី
អេសាយ 12