Rooma Af furnaan
Af furnaan
Maanti Baawulo khadaaba chiire, mali us khabe a ki us ilkerengeetti weene Rooma irti. Usuhi urur Kiriistoki ilkerengeettaas uur miigoocho, ꞌdee gargaaricho ka ili Isbaaniya irti ꞌdoone. ꞌDeerka khadaaba chiire, wihi kakhuufnaanki Kiriisto lakakhuufo miinsan tuum ibabbakkaahiche. Toro la saggi kakhuufnaanka jiroti ꞌdooꞌd Kiriisto iurgiyicho dowdowa. ꞌDeerka khadaaba ka Wori Haaggane Yeesso Kiriisto miinsane us khadaabbetiis tuumman ka cheeko, iche weyti dowdowa.
Ayti khummane khadaaba goya kijirto a tan, “Wora Haaggan wihi us soobabbakkaahicho a saggi Waakh enenyet ꞌdooꞌdi ortiis ka fiffissan ikayeelo. Waha la koli enenyet Waakh kakhuufo kaldach on yateehiin.” (1:17) Baawulo ꞌdeerka oreye isohta ayta khumman ꞌdooꞌd ifurfura. Weeli enenyete harra tuumman, ki Yaꞌhuud eheetteey ommos yaafohi addan eheetteey ka ba, uskeel on anta. Jiti Waakh enenyet ortiis ka eti fissan iekkaacho a chirri usu Kiriisto kakhuufo on. Iꞌda ka Waakh eta ichoow Kiriisto wohoo kaldache kayeela, toro la eta jiroti husube ꞌhela. Jirota husub ka, Waakh eta ankiiissa isoolaaba, toro la Rubeyti Munyee ka miigti uskeel ichoow ti omooteet a lakasoofura.
Aritti channaatteet ichoowka ti siyyeennaatteet ka, Baawulo hili amurreti Waakh ichoow hili miigti Rubeyti Munyee jiroti ꞌdooꞌd Kiriisto goyaka haaggisso dowdowa. Us toro saggi yaafohi Yaꞌhuud ichoow yaafohi addan mali Waakh weeli enenyet ikhabo goya ikajiraan laka a cheeka. Maanti yaafohi Yaꞌhuud Yeesso ꞌdiiꞌdeen, waha laka a mali Waakh on, ꞌdee jiti weeli enenyet tuumman haaggi Waakhe inno imunneynane Yeesso Kiriisto ka ꞌhelo yeele. Toro la Baawulo yaafohi Yaꞌhuude kol dakkhan Yeesso ꞌdiiꞌdo ma rummeesti. Ayti ꞌdaꞌddaboote Baawulo chiire a jiroti ꞌdooꞌd Kiriisto lakaꞌdoono. Wihi us weyti katirriinsate, a ꞌdooninti icho isikhabaan, a mehe ꞌdoonine wihi amurreti Waakh enenyet kaꞌdoonto iche buuhissa. Toro Waakkhi liifalo ichoow saggi ꞌdooꞌd Kiriisto weynaanti sirgaal iraaho laka a chiire.
Wihi khadaaba goya kijiro
Baawulo Wori Haaggane Yeesso miinsan cheeka 1:1-17
Weeli enenyet tuumman ribnaanki Waakh a ꞌdoona 1:18-3:20
Kakhuufnaanki Kiriisto lakakhuufo ka Waakh enenyet a riba 3:21-4:25
Jiroti husube Kiriisto ka laꞌhelo 5:1-8:39
Yaafohi Yaꞌhuud ichoow mali Waakh 9:1-11:36
Jiroti ꞌdooꞌd Kiriisto imasse 12:1-15:13
Wahanyeyyohi ꞌdaꞌddaboot ichoow bariito 15:14-16:27.
ទើបបានជ្រើសរើសហើយ៖
Rooma Af furnaan: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.