Rooma 1
1
Baawulo urur Kiriisto bariito ierga
1Khadaaba eti atin isoochiiro a ani, Baawulohi ilbooy Yeesso Kiriisteenye, toro la ergaanoti Waakh soobahsate, ꞌdee Woriiski Haaggan cheekto. 2Wora Haaggane goorat archiiy on Waakh ꞌdooꞌdi Waákh íyeyyeedo ka ayyiche, icho la Chiirnaanneti Waakhe munyee goya kachiireen la, 3Weeliissa miinsanyahe, ulla a Yeesso Kiriistohi Kamureene. Sartiis la a sarti weeli enenyete, ulla hiiy karnati Dawuud layadeehe kayimiy. 4Waakh maanti us Rubeyti Munyee ka Yeesso Kiriisto omoot kasookahche, jiti miige ka saggi rumanka Yeesso Kiriistohi Kamureene Weeli Waakh iyahe a tuse. 5Kiriisto ka ichoow iroonoti magahiis u, haaggi Waakhe buure ichoow hila khummane ergaano layahe a ꞌhelle. ꞌDee ꞌdooꞌdoo yaafohi Yaꞌhuud ieheynan tuumman kakhuufnaanki icho Waakh kakhuufaane yeediis raahaan iwahna. 6Atin laka ꞌdooꞌda Waakh wahe Yaꞌhuud ieheynane koo Yeesso Kiriisto yateeh goya a kajirtaan.
7Atinhi tuummane ilkerengeetti weene Rooma taalliine, Waakh ꞌdoono, Waakh wahe ꞌdooꞌdi Waakh lakayeele, iche khadaaba isoochiira.
Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.
Baawulo Waákh kalaꞌd ilaaba
8Wihi an kasoodaabdi, Waakkhaaya Yeesso Kiriisto ka kalaꞌd ilaaba jeentetiin u. Wihi tahe, saggi atin Yeesso Kiriisto ikakhuuftaan, ꞌdooꞌdi harra kajiro tuumman a cheeka. 9Waakkhi an uureey tuumman ka ifalo, an Wori Haaggane Weeliis miinsan an cheeko, garti saggi an ayti rummaat ieldi koli an weesdi tuumman an koloo kalday laka atin ikadabin a laaba. 10Chaꞌan weesdi Waakhe hawwaasda, ꞌdee chiꞌ ꞌdoonintiis tahe, Waakh jit isoofura, ꞌdee dowwanoha ka atin sooꞌdaara.
11Anihi atin argo ꞌdee siintoo Rubeyti Munyee katamiit atin siicho, ꞌdee rubeyohiin miigowaan weyti imoona. 12Wihi an eldi a mehe ya, saggi eteen ba Kiriisto ikakhuufo ka, uur a ismiigoonna.
13ꞌDooꞌd Kiriistokaaw, saggi an kolassi ittaawe anihi atin sooꞌdaaro iꞌdoone, iꞌdaasenyi ichoowka uliba wohoo on ijeychaan abda. Anihi goytiin ka hil haaggicho gurnaanki Rubeyti Munyee argo iche ꞌdoona, saggi maanta an ꞌdooꞌdi addane yaafohi Yaꞌhuud ieheynan goyaka hil ihaaggiche ichoowka gurnaan isoobahuu.
14Hili Waakh ikorche a ki enenyet tuumman. Ani ꞌdooꞌdi hugummeti Giriig raaho ichoow ki hugummeti Giriig iraahin ba hilichooda khaba. Ani ꞌdooꞌdi soome ichoow ki isoomin ba hilichooda khaba. 15Jeentetaas u, anihi atinhi ilkerengeetti weene Rooma taalliin laka Wori Haaggan atin icheeko iche weyti ꞌdoona.
Wori Haaggan miig a khaba
16An Wori Haaggan ma kuuryaawo. Iꞌdi tahe Wora a miigti Waakhe hol dowto, eti tuummane Kiriisto rummeeste ribto. Koloo ꞌdooꞌdi Yaꞌhuude Kiriisto rummeeste lariba, ꞌdee toro yaafohi Yaꞌhuud ieheynane Kiriisto rummeeste laka lariba. 17Wora Haaggan wihi us soobabbakkaahicho a saggi Waakh enenyet ꞌdooꞌdi ortiis ka fiffissan ikayeelo. Waha la koli enenyet Waakh kakhuufe kaldach on yateehiin. Iꞌdi liichiiruu, “Eti Waakh ortiis ka fissan Waakhe rummeesta. Saggaase rumanka jiro ikhaba.”#1:17 Habakuuk 2:4.
Waakh uskeeli enenyet yeelo a ꞌdiiꞌddanyahe
18Waakh goobiis on ka, saggi us ꞌdooꞌdi jiroticho ka usu ꞌdiiꞌdo toro uskeel yeelo ikahollowo a tusa. Uskeela ka la, ꞌdooꞌda runti Waakhe laabti iche ꞌdooꞌdi addan kajeycha. 19Runta Waakh miinsane enenyet garti la a ti nyiikhsan on. Waakh rubeytiissa isoonyiikhe. 20A mehe uuꞌ goorat harra lasoouume, weeli enenyet saggi miigti Waakh jirtuu tuumman ijirto ichoow saggi us rumanka Waakh iyahe, a abte. Wahanyeyyoha Waakh leeyahe ma laargo, iꞌdaasenyi wihi Waakh soouume tuumman ka a lagarta. Jeentetaas u, wohoo rucchule icho laabaan ma khabaan.
21Icho eti Waakh yahe a abteene, eheetteey laka inkaanyiti kootte Waakh imale ma siinne, toro la kalaꞌd laka ma ilaabin. Wihi ꞌdalam on kamasseene, toro la uurassicho mugꞌdi weele. 22Icho rubeycho khara iskaayyeeleene, eheetteey laka ꞌdalammeti tuunte eheet. 23Ichohi kootte weynaanti Waakkhi jirtuu iumaatan wahtaan ka, iyookkoyyohi enenyeti yamuut ommos chimbiro ommos binahi sohti ommos binahi uur il kajiito wahteen.
24Maantaka Waakh icho a ꞌdiiche, ebba uskeeli uuriis imoono yeele. Jeentetaas u biꞌdirroonki nool sarticho ka a isyeeleen. 25Icho runti Waakh miinsan ma rummeysanne, dib on u ayti beenaat rummeesteen. Waakkhi walah tuumman soouume kootte jirtuu tuumman saaꞌdo imaleen rubeytiis ma wahanne toro la ma inkaanyitine, wahanyeyyohi Waakh soouume inokhteene, Waakh kayeesseen.
26Jeentetane Waakh iꞌdiiche, ildeerroti sareete lakhaanyeyyo keento icho ꞌdoonaan ikaassohtaan. Deyyeho laka mejeli laleeurꞌdo a kasoonokhatte, iche on isinokhatta. 27Saggaas on u mejel laka deyyehoti laleeurꞌdo kasootabe, ildeerroti mejel laleeurꞌdo buuhisse. Mejel on lakhaanyeyyohi nool isyeela. Jeenteti suujoonki icho yeeleen u, sinati imasse isikeeneen.
28Toro la jeenteti icho Waakh garan iꞌdiiꞌdeen u, Waakh icho a ꞌdiiche, uskeeli nool kamassaan. Suujoonki nool on kamassaane, jeentetaas u wihi kootte ikamaline yeelaan. 29Wihi jiroticho buuhiche a khollookkhi nool ichoow suujoon ichoow ꞌdamaam ichoow uskeel. Wihi addane icho buuhicho a kalꞌdarri ichoow ogoossi dubunuunu lagelo ichoow isjihit ichoow ekkeysi ichoow rubeyti suuje ichoow meꞌdeꞌddeel. 30ꞌDooꞌda enenyete hanta toro la Waakh ꞌdiiꞌddayyahiine, enenyet leeabaarrama, enenyet a rannyaane toro isatahnoochaan. Kol tuumman la jiti icho suujoon kayeelaan on mal kadowtaane, toro la ꞌdooꞌdi dele ma daagaan. 31ꞌDooꞌda khara us khabo mele, wihi icho ayyicheen ma buuhichaane, ꞌdooꞌdi addan ꞌdooninti imasse ma ikhabaane, uurnugleel la ma khabaan. 32Icho wihi fissane Waakh enenyet kaꞌdoono us ꞌdooꞌdi jiroti iꞌdee jiro omoot ikagoocho a gartaan. Eheetteey laka, icho orey on isohtaane, uskeel yeelaane, toro la ꞌdooꞌdi addane wihi iꞌdaase yeelo laka leekhabtaan.
ទើបបានជ្រើសរើសហើយ៖
Rooma 1: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
