Galaatiya Af furnaan
Af furnaan
Maanti Wori Haaggan yaafohi Yaꞌhuud ieheynan goya lakacheeke, ꞌdooꞌd gaasoo a rummeeste raahe. Iꞌdaasenyi yeedoo laworsate a jire. Waha la a waha. Chiꞌ enenyet ꞌdooꞌd Kiriistoki rummaat yateeh, amurre Muusa laka a raaha? Baawulo la yeedaas weyti ꞌdiiꞌddaneet. Jiti Waakh weeli enenyet eti fissan ortiis ka iekkaacho, a kakhuufnaanki icho Yeesso kakhuufaan on. Kakhuufnaanka a jiti kaldaye enenyet ichoow Kiriisto wohoo kalday kayateehiin.
ꞌDooꞌdoo ururre Kiriisto boroofenhi Galaatiya kijiro la Baawulo yeediis ꞌdiiꞌda. Wihi icho enenyet abchaan, jiti enenyet Waakh ortiis ka eti fissan liiekkaacho a chirri amurre Muusa laka laraaho.
Baawulo khadaaba urur Kiriistoki boroofenhi Galaatiya kijiro iche ichiire, waha la a iroonoti ꞌdooꞌdi wora beenaat ekkeesti. Icho soolaabin ꞌdoona ꞌdee fiddihi ꞌdooꞌd Kiriisto imale ichoow kakhuufnaanki rummaate Yeesso lakakhuufo isoolaaba. Baawulo koloo khadaabiiska ka, a isiyeyyeeda, saggi us rumanka ergaano Yeesso Kiriisto iyahe dowdowa. Wihi us katirriinsate, a saggi weeli enenyet menye, Waakh rubeytiis on usu iwahe, ergaano ikayeele. Toro la hili Waakh usu korche kach ka a ki yaafohi Yaꞌhuud ieheynan liiergate. Mehe addane kakhabte ya, enenyet kakhuufnaanki us Yeesso Kiriisto kakhuufo kaldaye Waakh ortiis ka eti fissan liiekkaacha. Artohi ꞌdaꞌddaboot ka, fiddihi haaggane ꞌdooꞌd Kiriisto fiddiyo, saggi us ꞌdooninti icho isikhabaan ikayimiy, iche Baawulo chiire. ꞌDoonintaas la mehe keene ya, kakhuufnaanki Kiriisto lakakhuufo.
Wihi khadaaba goya kijiro
Yeed ortiissa 1:1-5
Yeedoo addane Wori Haaggan ieheynan araahina 1:6-10
Anto Baawulo jeenteti us ergaano iyahe 1:11-2:21
Wori Haaggan haaggi Waakhe inno imunneynane miinsanyahe 3:1-4:31
ꞌDooꞌd Kiriisto amurreti Yaꞌhuud a lakafura, ꞌdee hili haaggan haaggichaan 5:1-6:10
Yeedi ꞌdaꞌddaboot 6:11-6:18.
ទើបបានជ្រើសរើសហើយ៖
Galaatiya Af furnaan: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.