Galaatiya 1
1
Bariitoti Baawulo urur Kiriisto ierge
1Khadaaba eti atin isoochiiro, a ani Baawulohi ergaanee. Weel enenyete hila ergaano ikorche mele, ommos weel enenyete isooergate mele. Iꞌdaasenyi Yeesso Kiriisto ichoow Waakkhi Aabbaheenenye, Yeessó omoot kasookahche ka a liisooergate. 2Ani ichoow ꞌdooꞌdi Kiriisto rummeeste inta ka ileejiro tuumman a atin soobariitinne.
ꞌDooꞌdi an khadaaba isoochiiro a ururre Kiriistoti boroofenhi Galaatiya kijirto.
3Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan. 4Yeesso Kiriisto ichoow wihi Waakkheenki Aabbaheene ꞌdoono a israahaan. Iꞌda ka jeenteti uskeeleen u a issoobahche yumuyye ꞌdee ꞌdarriti uskeele weyꞌda inno kariba. 5Waakh koolinno jirtuu tuummamba! Aamiin.
Yeedoo addane Wori Haaggan ieheynan araahina
6Ani a atin kagirmeesda! Atin saggoh Waakkhi haag Kiriistoki buurenye inno imunneynan ka atin wahe dowwa on ikaguurteene, woroo addane haaggane atin laabche iraahteen? 7Rumanka Wori Haaggan koo addan ma jiro. Iꞌdaasenyi ꞌdooꞌdoo atin waraariya, toro Wori Haaggane Kiriisto miinsan baabulin ꞌdoona. 8Chirri nah ommos herti Waakhe serey kijirto kichekoo laka, Wori Haaggane goorat nah atin icheekne on menye, koo addan atin icheeko, Waakh ba etaas jirtuu tuumman fala! 9Iꞌdi goorat nah nidah u, toro toolla a adeehe, chirri etoo Wori Haaggane goorat atin khaatatteen on menye, woroo addan atin idowe, Waakh ba etaas jirtuu tuumman fala!
10An weeli enenyete kahamaadin ꞌdoona? Mele! An Waakhe kahamaadin ꞌdoona. Chaꞌan uliba enenyet kahamaadin ꞌdoono, an toolla bowꞌda Kiriisto mee.
Saggi Baawulo ergaano iyitah
11ꞌDooꞌd Kiriistokaaw, Wora Haaggane an maantaas atin abche ki weeli enenyet kasoouummame mee. 12Wora et an kaꞌhele mele, ommos weeli enenyete iabche mele. Yeesso Kiriisto rubeytiissa kaꞌhele, usu isoobabbakkaahiche.
13Maanti an hugummeti Yaꞌhuud raahe, saggi an ijire a daagteen. An ururi Waakh sina omhiche toro baabiin ꞌdoone. 14An weyti hugumme aacchinyeteenyo isibahche, boorreeyki Yaꞌhuud ka, an rumanka oreye raahe. 15Iꞌdaasenyi, Waakh geeddi an idelan on isoobahsate, toro haaggiiski buure on ka iwahe, wihi us gooche, 16eti Weeliis yahe isoobabbakkaahiche. Iꞌdane yeele ꞌdee anna Wori Haaggane Yeesso miinsan, yaafohi Yaꞌhuud ieheynan icheeka. Maanti wahaas iyitaaheen, weeli enenyete wihi an yeelo worsade ma jirin. 17Toro la, an ergaanoti ilkerengeetti weene Yeerusaleem kijirto, orteey ergaano titah laka ma iiran. Iꞌdaasenyi chirraas on ili Araabo irde, yomboka ilkerengeetti weene Damaasko isoonokhde.
18Inkoo guꞌh seyyahe kutte, iche ilkerengeetti weene Yeerusaleem ikore, Beetero#1:18 Beetero. Magaha afi Giriig ka a Keefas. aban ꞌdoonaa. Ibeen tomon ichoow chan iche leefiddiye. 19Ergaanoti addan koo an arge mele, Yaakoobohi Yeessohi Kamure walaaliise kaldaye on menye. 20Waakh a idaagaa, yeeda an atin isoochiiro a rum! 21Saahka boroofenhi Siiriya ichoow boroofenhi Kiliikiya irde. 22Maantaas la urur Kiriistoki boroofenhi Yaꞌhuudiya kijiro, et injire iarge mele. 23Iꞌdaasenyi wihi kaldaye leessi icho daddaagaan a mehe ya, “Eti goorat sina inno omhicho, Wori Haaggane us goorat baabiin ꞌdoono, iche toolla cheeka.” 24Icho la wihi ani ikayitah ka Waakh koolicheen.
ទើបបានជ្រើសរើសហើយ៖
Galaatiya 1: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.