Hilassi Ergaano 24
24
ꞌDooꞌdi Yaꞌhuud Feelig ortiis ka Baawulo cheekta
1Inkoo Baawulo lakhabte ibeen chane kutte ka, kuhaanihi weyti weene Anaaniya layadeeh, ewweenkoo Yaꞌhuud ichoow etoo af kaatahe Tertullo layadeeh khabaayi ilkerengeetti Kaaysareya yimiy. Gaafana ortiis yimaateene, Baawulo cheekteen. 2Chirri Baawulo lawahe ka, Tertullo wihi Baawulo lakacheekti iꞌduu Feelig ortiis ka cheeke, “Eti weenoow, weynaantaah ka, geeddi deere nebey khabne, wihi tuummane yaafteen deef ikeeno la a layeele. 3Feelighi weyti weenoow, meel tuumman ka ichoow jitassi ittaawe ka, gargaara ka kalaꞌddi buurenye kisoolaabna. 4Iꞌdaasenyi anihi kiꞌharcho ma ꞌdoono, a kidaahe gaabi ka wihi nah kisoocheekanni uuri ꞌdabakhe ka daganso.
5“Eta wihi nah kaagarre, a etoo weyti sina keeno. Harra tuumman ka etane ꞌdooꞌdi Yaꞌhuud goyaka ururi il baabulo sootukkicha. Rabitti suujenye eti Naasaret raahto laka usu matakkichee. 6Usu minki Waakhe buure laka a biꞌdirroon leheete ꞌdeerka khabanne.#24:6 Chiirnaanne gaasoo, “Nahi wihi amurreteenyo tadeeh kahukkunno ꞌdoonne, 7 iꞌdaasenyi eti iskar tuumman itoollo Luusiyas layadeeh yimiyye, miig ka nah sare, nah kasookhaate. 8 Toro la amur bahche ꞌdee ꞌdooꞌdi Baawulo wohoo kacheekti ortaah a yimaate yidah,” a kakhayte. 8Wihi at usu wowworsatti ka ati rubeytaah waha tuummane nah kacheekanni runtiche a abatta.”
9ꞌDooꞌdi Yaꞌhuud tuumman af isgele, waha tuumman a rum yidah.
Baawulo Feelig ortiis ka isiyeyyeeda
10Chirri gaafana dahan ka Baawulo yeyyeed iyidah ka, Baawulo wihi us ilaabe, “Saggi at guꞌhassi ittaawe eti yaafta hukkumo ieheet a garda, ꞌdeerka an weyti hamaada chirri an ortaah ka isiyeyyeedo. 11An ibeen tomon ichoow lamma kutte on ilkerengeetti weene Yeerusaleem irde Waakhe wahdaa. Chirri at goya yeyte, dowwa on runtiis abatta. 12ꞌDooꞌdi Yaꞌhuude ani icheekti, anihi minki Waakhe buure goyaka etoo leeiriiro ma iargine, ommos anihi minassi weysiite Yaꞌhuud goyaka ommos ilkerengeet goyaka urur sootukkicho ma iꞌhelin. 13Wihi toolla icho ortaah ka ikacheektaan laka runticho tusin ma yabuuꞌdiin. 14Wahane kisoocheeka, Jita toolla icho a ki rabitti suuje kidowaan, iche an Waakh aacchinyeteenyo kawahda. Iꞌdaasenyi wihi tuummane Chiirnaanneti Amurre ichoow ti ꞌdooꞌdi Waákh íyeyyeedo kachiiran a israahaane a rummeesda. 15Khajjeeli icho awtichuu Waakh kakhabaan, annaka a khaba. Khajjeelaas la a ki ꞌdooꞌd tuumman omoot ka lasookahcho, ki fiffissan eheetteey ommos ki sussuuje eheetteey ka ba. 16Anna jeentetaase kol tuumman Waakh ortiis ichoow weeli enenyet ortiis ka hol idowa, rubeyti suujoon ikacheekan ikhaba.
17“Inkoo an guꞌhassoo tuumman khar kijire ka ilkerengeetti weene Yeerusaleem isoonokhde, yaafteeyti Yaꞌhuude miskiine chilimme ikeene, sadakha laka bahche. 18Chirra icho anihi wahaas yeelo uranti minki Waakhe buure ka iꞌheleen, an Daawti Dikhaaleet a massiche. Urur ileejire mele, walah uskulaate la mele. 19Iꞌdaasenyi ꞌdooꞌdoo Yaꞌhuude boroofenhi Aassiya kayimiy intaas a kajire. Ani ka, icho laka kootte intane kijiraane awtichuu chirri icho wohoo ikakhabaan kisoocheektaan. 20Chiꞌiche iꞌdaas ieheynan, ꞌdooꞌda inta kajiro, maanti an Jaldaabti Weene Yaꞌhuud orche toolle, amuri an jebche a kisoocheekeen. 21Kolossoo a waha kaldache an goycho ka tolossade an riire an idah, ‘Wihi kaldache maalinka liikahukkumo, a jeenteti ani saggi ꞌdooꞌdi tuume toro isookaho irummeesdi.’ ”
22Feelig wihi ꞌdooꞌdi Jiti Kamur raaho rummeesti a garta, tol hide. Wihi us yidah, “Maanti eti iskar tuumman itoollo Luusiyas layadeeh inta yimiy, iche yeediin goocha.” 23Feelig eti koobbintoo iskareet itoollo amur ibahche, ꞌdee Baawulo latoorriba, iꞌdaasenyi ma lahido toro aalassiiski wohoo iyeelin ꞌdoono ma lajeycho.
Baawulo Feelig ichoow Durasilla leeyyeeda
24Inkoo ibeennetoo kutte ka, Feelig makhaabassiisti Durasilla layadeehe inanti Yaꞌhuude khabaayi yimiy. Ulla Baawulo enenyet iꞌdiiche, chirra us kakhuufnaanki Yeesso Kiriisto lakakhuufo miinsan kayeyyeedo ka dagansate. 25Chirra Baawulo wori wihi fissane layeelo ichoow isjeyin ichoow hukkunnaanki ibeenki ꞌdaꞌddaboote Waakh enenyet soohukkumo kayeyyeedo ka, Feelig weyti roorro gesse, Baawulo, “A geeddaas on maanta! A geeddi at iratti on. Maanti ileehaaggan a kiwaha,” iyidah. 26Ulla Baawulohi chasti chilimmetoo siicho khajjeela, ꞌdeerka geeddi buure ꞌdooꞌd ergate, Baawulo liisowahe, leehawwooche.
27Inkoo guꞌh lamma kutte ka, eti Boorkiyo Feestas layadeeh meel Feelig gele. Iꞌdaasenyi Feelig usuhi ꞌdooꞌdi Yaꞌhuud jilhaati ꞌdoona, Baawuló jeela goya katabe.
ទើបបានជ្រើសរើសហើយ៖
Hilassi Ergaano 24: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
