Hilassi Ergaano 22
22
1Baawulo wihi us yidah, “Yaaftaay ichoow ooyenyeey, bal geedda an ortiin ka isiyeyyeedo idagansada.” 2Icho chirri icho usuhi afi Ibiraaniya icho kaleeyyeedo daageen ka, rukkuy goocheen.
Baawulo ꞌdeerka wihi us yidah, 3“An a Yaꞌhuude, ilkerengeetti Taarso ili Kiliikiya kijirto liikadele, iꞌdaasenyi ilkerengeetti weene Yeerusaleeme kaweynaade. Ani amurre aacchinyeteen weyti liiabche, eti iabche la a Gamaliyeel. An laka iꞌda maanta atinhuu, Waakkheen a isibahche. 4Jeentetaas u ꞌdooꞌdi goorat jita Yeesso enenyet abche raaho sina omhiche, ogoos laka ꞌdoone. Mejel ichoow deyyeho a sookhabde jeela gesse. 5Kuhaanihi weyti ween ichoow Jaldaab tuumman saggi wihi an eldi rum iyahiin a cheekaan. An icho khadaabi icho ꞌdooꞌdichoki Yaꞌhuude ilkerengeetti Damaasko kajiro ichiireene kakhaadde, intaas irde ꞌdee ꞌdooꞌdaas sookhabda, ilkerengeetti weene Yeerusaleem keena, sina loomhicha.
Baawulo saggi us Waakh ikuurgiye cheeka
(Hilassi Ergaano 9:1-19, 26:12-18)
6“Chirra an ilkerengeetti Damaasko isoodowwaade ka, doglaan on geeddi maalimeet ka banayhi weyti ababo serey kasoobaheene ꞌdolloheey guꞌddeen. 7Anna il guꞌdde, chirraas ka hooyoo, ‘Saawulo, Saawulo! A iꞌdoh ani sina iomhissa?’ idowo daage.
8“Wihi an worsade, ‘Kamur at a ayyo?’
“Wihi us isoolaabe, ‘An a Yeessohi Naasarete at sina omhisso.’ 9ꞌDooꞌdi iwalhiche banay a arge, iꞌdaasenyi hooyi eti ileeyyeedo ma aban.
10“Anna wihi an worsade, ‘Kamur mehe yeelo?’
“Kamur la wihi us iyidah, ‘Kahe, ilkerengeetti Damaasko iro, ꞌdee intaas ka wihi Waakh kiabbire at yeesso a lakisoocheeko.’ 11Jeenteti banayhi ababo indo itireen u, wahalheey iangaamicheene ilkerengeetti Damaasko igeecheen.
12“Etoo Anaaniya layadeeh ani iargin yimiy. Us weyti Waákh karoora toro amurre Muusa mujjum raaha, ꞌdooꞌdi Yaꞌhuude Damaasko kajiro tuumman la weyti usu inkaanyita. 13Ulla iyimiyye haggeey sootolossate, ‘Saawulohaaw, il agar!’ iyidah. An chirraas on il arge, usu laka arge.
14“ꞌDeerka wihi us yidah, ‘Waákh aacchinyeteen a kisoobahsate, ꞌdee mali us kikhabo abatta, toro la Eti Fissan agarta, toro usuhi hooyiis ka kileeyyeedo daagta. 15At gartiis a laabta toro wihi tuummane at agarte toro daagte yaafo tuumman icheekta. 16Toollaka mehe sugta? Tolosso a kibaattissiyo, uskeelaah a lakaadikho geeddi at magahi Kamur wahto.’
Baawulo hiliiski us yaafohi Yaꞌhuud ieheynan Wori Haaggan ikacheeko cheeka
17“Maanti an ilkerengeetti weene Yeerusaleem inokhde, minki Waakhe buure goyaka Waakh wahdaayi fooltabcho itimiy. 18Fooltabcho ka Kamur arge, ulla iiyeyye, ‘Arari! Dowwa ilkerengeetti weene Yeerusaleem katab, iꞌdi tahe ꞌdooꞌd inta ka weheeyki at icheekto ma dagansati.’
19“Wihi an ilaabe, ‘Kamur, ꞌdooꞌda saggi goorat an kolba minkoo weysiite Yaꞌhuud iirde, ꞌdee ꞌdooꞌdi kirummeesti jeela igesso toro ijaho, a garta. 20Maanti Isiteefano jeenteti us woraah icheeko liiyigis, ani rubeyteey intaas a kajire, ogoossiis ayyiche, darfohi ꞌdooꞌdi usú yigis yaakhiche.’
21“Kamur la wihi us ani iyidah, ‘Nyaam, ani yaafohi Yaꞌhuud ieheynane fogaate kiergada.’ ”
22ꞌDooꞌd Baawulo dagansate ichoowka yeedaas yaafohi Yaꞌhuud ieheynan miinsan yidah. ꞌDeerka enenyet weyti riire, “Eta harrata kabahcha! Agiisa, jiro ma iroone!” yidaaheen.
23Geedda icho rirriiraan la, kabuuꞌddeticho a jillaanjillichaane, ebeer serey ikahchaan. 24Eti iskar tuumman itoollo amur bahche ꞌdee Baawulo a lakhaato, minki iskare fiddiito goya a lageecho, laajja ka a ladoocho, walah a laworsati, ꞌdee riirita geeddeenye ꞌdooꞌda Yaꞌhuud usu kariiro wihiis a laabti. 25Chirri icho hidhideene, icho laajja ka doon leheet ka, Baawulo wihi us eti koobbintoo iskareet itoollo intaas toollo iyidah, “Eti ili Rooma liiekkaacho geeddi kootiin ka usu uskeel yeele liikagoon laajja ka ladoocho ichoow amurre a israahaan?”
26Chirri eti koobbintoo iskareet itoollo yeedaas daage ka, nyaame, eti iskar tuumman itoollo wihi us worsate, “Waha a mehe at yeesso? Etaas a eti ili Rooma.”
27Eti iskar tuumman itoollo la Baawulo iyimiyye, “Rum isoocheek, at a eti ili Rooma liiekkaache?” worsate.
Wihi us ilaabe, “Aa.”
28Eti iskar tuumman itoollo la wihi us yidah, “An chilimmeti buurenye sirgaal igute, eti ilaas itah.”
Baawulo wihi us ilaabe, “Ani delmaattaaya eti ilaas ikayeesse.”
29ꞌDooꞌdi kootte Baawulo walah worsan leheet chirraas on Baawulo kasoofurfurte. Eti iskar tuumman itoollo laka weyti nahe. Iꞌdi tahe Baawulohi eti ili Roomeenye us biingoyyo gesse ka amurreti ili Rooma a jebche.
Baawulo Jaldaabti Weene Yaꞌhuud liigeecha
30Eti iskar tuumman itoollo wihi rumanka ꞌdooꞌdi Yaꞌhuud Baawulo kacheekti iche aban ꞌdoona, ibeenki kaas sooraaho ka Baawulo fure, amur bahche kuhaaniyyohi wewween ichoow Jaldaabti Weene Yaꞌhuud tuumman ba tol iwahe. ꞌDeerka Baawulo sookhaate, orcho toolliche.
ទើបបានជ្រើសរើសហើយ៖
Hilassi Ergaano 22: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
