Hilassi Ergaano 21
21
Baawulo ilkerengeetti weene Yeerusaleem irta
1Inkoo nah icho kagoone ka, beyti buure kadihne anki kurti bicche dahcho kajirto Koos layadeeh miinsanne. Ibeenki kaas sooraaho ka kurti bicche dahcho kajirto Roodo layadeeh gelle, saahka ilkerengeetti Baatara nimiy. 2Intaas ka koobanhi boroofenhi Foniikiya isohti ꞌhelle, korre iranne. 3Chirri nah kurti bicche dahcho kajirto Kuuburo layadeeh agarre ka, anki gurro tabne, ili Siiriya isohannaa. Inti ilkerengeetti Tiiro layadeeh ka iranne, bicche aficho tolossanne, koobane intaas ka meeh yagchaa. 4Intaas ka abatti ꞌhelle, teebatoo leefiddiine. Icho la miigti Rubeyti Munyee ka Baawulo hawwaasteen uus ilkerengeetti weene Yeerusaleem iran. 5Iꞌdaasenyi maanti ibeenkeenyo massate ka kahne, orey isohanne. ꞌDooꞌd tuumman la deyyehoticho ichoow nyaakhut khabaayi nah sooraahe, ilkerengeet nah kaleebahe. Bicche aficho ka nah tuumman icho khabnaayi jilbo il kaguꞌdubne, Waakh wahanne. 6Inkoo nah bariito iskakhaatanne ka, nah kooban gelle, icho la goobassicho inokhteen.
7Inkoo nah ilkerengeetti Tiiro kakahne ka, sohanne ichoowka ilkerengeetti Tollemayo gelle. Intaas ka ꞌdooꞌdi Kiriisto rummeeste bariitinne ibeenkoo leefiddiine. 8Ibeenki kaas sooraaho ka, kahne ilkerengeetti Kaaysareya iranne, kooban kasooyegne. Intaas ka minki eti Wori Haaggan taaꞌhicho Fiilif layadeeh fiddiine. Fiilif la a etoo ꞌdooꞌdi goorat teebeenye Yeerusaleem ka lasoobahsate golol ꞌdooꞌd gise. 9Ulla inám affar idisneynane wori Waakh kaayyeeddo iche khaba.
10Inkoo nah ibeennetoo intaas fiddiine ka, eti Waákh íyeyyeedo Agaabo layadeeh ili Yaꞌhuudiya kayimiyye intaas yimiy. 11Ulla nah iyimiyye, saab Baawuloki dabar khaate, luhlohiis ichoow dahanohiis iskahide, wihi us yidah, “Rubeyti Munyee wahane elatta. ‘Eti saaba leh saggane ilkerengeetti weene Yeerusaleem ka ꞌdooꞌdi Yaꞌhuud ihida, dahanohi ꞌdooꞌdi Waakh igaran igessa.’ ”
12Chirri nah yeeda daagne ka nah ichoow ꞌdooꞌdi addan ba Baawulo hawwaassanne uus ilkerengeetti weene Yeerusaleem iran. 13Baawulo wihi us ilaabe, “A iꞌdoh iꞌduu iooytaane uur iuskulaassaan? An hiinaanki liihido kalday menye, anihi ilkerengeetti weene Yeerusaleem ka jeente Yeessohi Kamure amuut laka ma ꞌdiiꞌdo!” 14Chirri saggi nah usu isoolaabno waayne ka, “Wihi Kamur ꞌdoono a yitaaheen,” nidahye, ꞌdiinne.
15Inkoo nah geeddoo intaas fiddiine ka tannabanne, ilkerengeetti weene Yeerusaleem ikahne. 16Abattitoo ilkerengeetti Kaaysareya ka nah raahte, eti ꞌdee nah minkiis fiddiino Muunason layadeeh goobiis nah geesse. Ulla a etoo ili Kuuburo kayimiyye, abattiti oraat kichokoowe.
Baawulo ilkerengeetti weene Yeerusaleem sooeleela
17Inkoo nah ilkerengeetti weene Yeerusaleem soogelle ka, ꞌdooꞌdi Kiriisto rummeeste hamaad ka nah martiiste. 18Ibeenki kaas sooraaho ka, Baawulo ichoow nah tuumman iranne, Yaakoobo sooagarre, ewweenki urur Kiriisto woyo tuumman la intaas a kajire. 19Baawulo la icho bariitiche toro wihi tuummane Waakh yaafohi Yaꞌhuud ieheynan hiliis ka iyeele ꞌdooꞌd tuum idowdowe.
20Inkoo icho waha daageen ka, Waakh saaꞌdeen. ꞌDeerka wihi icho Baawulo iyidaaheen, “Baawulohaanyaaw, yaafteenti Yaꞌhuude Yeesso rummeysatte saggi iche aliffe igoosso yey. Icho tuumman la weyti amurre Muusa isibahcheen. 21ꞌDooꞌda wihi at ꞌdooꞌdi Yaꞌhuude yaafohi Yaꞌhuud ieheynan goya yaal tuumman abisso ꞌdee icho amurre Muusa ꞌdiichaane, nyaakhuticho laka ikhandiyine, hugummeti Yaꞌhuud iraahin a liicheeke. 22Mehe yeello? Rumanka saggi at itimiy a daagaan on. 23ꞌDeerka wihi nah kidowno yeel. Inta ka et affar daatatte a khabna. 24Reeraas khaat giꞌde, ati rubeytaah laka daawti dikhaaleet leegele, wihi icho daawtaas kageleen igute, ꞌdee matahenyeticho a haatteen. Iꞌdaakka enenyet tuumman saggi waha liidowo ati kimiinsan tuumman been iyahiin a abta. Iꞌdaasenyi saggi at amurre Muusa mujjum iraahto a laarga. 25ꞌDooꞌdi Kiriisto rummeeste yaafohi Yaꞌhuud ieheynan la orey khadaab a ichiirre wihi nah goonne icheekne, ꞌdee gololi iyookkoyyohi waakkhakh lakayeessi liisoorriyooche ichoow jidi naffi laluulliche ichoow diig ichoow sohoꞌddarri a kanokhteen.” #21:25 Hilassi Ergaano 15:20, 29.
26Ibeenki kaas sooraaho ka Baawulo reeraas khaate daawti dikhaaleet isleegeleen. ꞌDeerka minki Waakhe buure gele, ibeenki daawti dikhaaleet massatti, toro eticho ba soorriyo liibahcho iche kuhaani icheekaa.
Baawulo minki Waakhe buure goyaka lakhabta
27Geeddi ibeen teeba kasoomassatti ka, ꞌdooꞌdoo Yaꞌhuude boroofenhi Aassiya kayimiy Baawulo minki Waakhe buure goyaka arge. Urur tuumman sootukkicheene Baawulo khabteene, 28riireene, “Mejeli Issiraayeloow, nah gargaara! Eta a ki enenyet tuumman harra tuumman ka wihi suujenye us abcho ka ꞌdooꞌdeenki Issiraayel ichoow amurreteen ichoow minka Waakh miinsan kayeyyeedo. Waha kalday on menye, ꞌdooꞌdi Yaꞌhuud ieheynan iche minki Waakhe buure soogesse, meessa lagan biꞌdirrooche,” yidaaheen. 29Wihi icho iꞌdaas kayidaaheen la a jeenteti icho Turofiimohi Yaꞌhuud ieheynane ilkerengeetti Efeesso kayimiyye ilkerengeet goyaka Baawulo rarraaho iargeen. Kol Baawulo usu sookhaate uranti minki Waakhe buure keene koogyahiin.
30Ilkerengeet tuumman wereerte, ꞌdooꞌd tuumman la meel tuumman ka isleesoorye. Baawulo khabteene, minki Waakhe buure khariis ijiiteen. Chirraas on arto lahide. 31Chirra urur Baawulo ogoos ꞌdoono ka, eti iskarti Rooma tuumman itoollo saggi ilkerengeetti weene Yeerusaleem tuumman kowdo kalday ititah daage. 32Ulla chirraas on nyaame iskartoo wewween ichoow iskartoo addan khaatte urur ikhubteen. Chirri ꞌdooꞌd eti iskar tuumman itoollo ichoow iskartiis arge ka, Baawulohi kootte icho jahaan ꞌdiicheen.
33Eti iskar tuumman itoollo irte Baawulo khabte, amuri biingo lamma lakahido bahche. ꞌDeerka eti us yahe ichoow wihi us yeele ꞌdooꞌd worsate. 34Urur goyaka ꞌdooꞌd gaasoo riirit ka wohoo essa, koo la riirit ka wohoo addane essa. Eti iskar tuumman itoollo jeenteti kowduu sag us rum iabti mele. Amuri Baawulo lakhaato uranti iskareet lakageecho bahche. 35Chirri Baawulo faaneyyohi min lakakoro sooeleele ka, iskare jeenteti urur weyti iuskulaatuu, usu siꞌdde. 36Icho tuumman la ꞌdubiis leeyimaateene, riireene, “Agiisa, agiisa,” esseen.
Baawulo urur leeyyeeda
37Chirra icho Baawulo minki iskare fiddiito gelin leheet ka, Baawulo yeede, eti iskar tuumman itoollo, “Wohoo ma kisoocheeko?” worsate.
Wihi us ilaabe, “At afi Giriig a daagta? 38At eti ili Miissiri goorat iskarti elif affarenye bir khabto sookahche hidaad leekeene menya?” 39Baawulo wihi us ilaabe, “An a Yaꞌhuude, ilkerengeetti Taarso ili Kiliikiya kijirto liikadele. An a eti ilkerengeetti weyti khumman. A kihawwaasdee, alley bal ꞌdooꞌd a leeyyeedo.”
40Chirri us amuri eti iskar tuumman itoollo ꞌhele ka, Baawulo faaneyyo katolossate dahan ka urur leeyeede. Chirri icho tuumman gammadicheen ka Baawulo afichoki Ibiraaniya ka ꞌdooꞌd leeyeede.
ទើបបានជ្រើសរើសហើយ៖
Hilassi Ergaano 21: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
