Matiu 20
20
Paa bubu yɛla
1Yisa daa lan yɛli, “Alizanda nam ŋmanila yil’ yidan’ so ŋun daa daŋ yibu asiba n-chaŋ ni o ti bu padiriba paa niŋ o puu ni. 2Ka o mini ba daa ti di daa, ka bɛ saɣi ni o yom’ ba tumtumda dabisi’ munimuni yɔri; ka o chɛ ka bɛ chaŋ o puu maa ni. 3Zaŋ chaŋ kurig’ awɛi saha ka o daa lan yi n-chaŋ ti nya ka shɛb’ ʒi daa ni yoli. 4Ka o yɛli ba, ‘Yi gba chamiya m puu ŋɔ ni ha ti tum tuma, ka n ti yɔn ya din niŋ kamaata.’ 5Ka bɛ daa chaŋ. Ka o daa ti lan yiɣisi chaŋ kurigu pinaayi saha ni kurig’ ata saha ti nya shɛba n-lan yɛli bɛ gba lala. 6Zaŋ chaŋ kurig’ anu saha ka o daa lan chaŋ ti nya ka shɛb’ lan ʒiya ka o bɔhi ba, ‘Bɔ n-niŋ ka yi ʒi kpe yoli biɛɣu zaa?’ 7Ka bɛ yɛl’ o, ‘So m-bi bu ti paa.’ Di saha ka o yɛli ba, ‘Yi gba chamiya m puu ŋɔ ni ha ti tum tuma.’
8 #
Lɛv 19.13; Zal 24.15 “Ka di daa ti niŋ zaawun’ yuŋ ka puu maa lan’ yɛl’ o nachin’ kpɛma, Cham’ ti boli tumtumdiba maa na ti yo ba. Daŋmi bɛn yoli kana la yɔbu pɔi, ka naanyi yo bɛn di daŋna la. 9Ka o nachin’ kpɛm’ maa daa yo bɛn daa yoli kana maa tumtumda dabisi’ munimuni yɔri. 10Ka bɛn daa daŋ puu maa ni la ti kana n-tɛhiri ni bɛn’ ni deei gari lala; amaa ka o ti yo bɛ gba la tumtumda dabisi’ munimuni yɔri. 11Ka bɛ daa dee’ lala, ka ŋumdi bɛ kparima ni niŋdi yil’ yidan’ maa 12yɛra, ‘Bɛn yoli ka tuma ŋɔ ni na kul tumla awa yini kɔŋko, ka tinim’ bɛn lee di tuma ŋɔ wahala ka wuntaŋ’ kpe ti biɛɣu zaa pahi ŋɔ mini ba zaa yɔri ti nyɛ yim?’ 13Ka yil’ yidan’ maa garigi yɛli bɛ ni yino, ‘Zɔri, m bi din ya zalinsi.’ Ka bɔh’ o, ‘Bee yi di bi saɣi ni yi ni deei tumtumda dabisi’ munimuni yɔri?’ 14Ka yɛli ba, ‘Zaŋmiya yi liɣiri chaŋ. N suhu n-yu ni n yo yi mini bɛn yoli kana maa zaa yim.’ 15Ka bɔh’ o, ‘A tɛhiya ni di bi simdi ni n zaŋ n ni su binshɛli niŋ n yubu ni nyɛ shɛm bee yi zabiri ma la nyuli n nirilim niŋbu zuɣu?’
16 #
Mat 19.30; Maak 10.31; Luk 13.30 “Dinzuɣu bɛn daŋ tooni ni ti lab’ nyaaŋa, ka bɛn be nyaaŋa mi ti leei toonnima, dama niriba pam ka bɛ boli nti gahimla biɛla.”
Yisa lan yɛli o kum yɛla pahi buta
(Maak 10.32-34; Luk 18.31-34)
17Yisa daa ti be soli n-chani Jɛrusalɛm ka daa ti zaŋ o nyaandoliba pinaayi la yi kpaŋa nti yɛli ba, 18“Nyamiya, ti chanila Jɛrusalɛm, ka bɛ ni ti zaŋ Daadam Bia niŋ maligumaaniba mini Naawuni zaligubaŋdib’ nuu ni, ka bɛ ti di o saria yɛli ni bɛ kum’ o, 19ka zaŋ o ti bɛn pa Yɛhudianima ni bɛ mal’ o ansarisi ka fiɛb’ o, ka kpah’ o tabili dapulli zuɣu; amaa di daba ata dali, o ni ti neei kum ni.”
Jeemsi mini Jɔn ma suhu ni bɔri shɛli
(Maak 10.35-45)
20Di saha ka Zɛbidii paɣa daa zaŋ o bih’ ayi kana ti gbani Yisa tooni n-suhir’ o binshɛli.
21Ka o bɔh’ o, “Bɔ ka a lee bɔri ni n niŋ ti a?”
Ka paɣ’ maa yɛl’ o, “Chɛ ka m bihi ŋɔ ni yino ti ʒin’ a nudirigu polo, ka yino mi ti ʒin’ a nuzaa polo a nam ʒiishee.”
22Ka o yɛli ba, “Yi ʒi yi ni suhiri shɛli maa. Yi ni ti tooi nyu binnyur’ shɛli din be m pipia la ni ka n yɛn nyu la?”
Ka bɛ yɛl’ o, ‘Ti ni tooi.’
23Ka o yɛli ba, “Yɛlimaŋli, yi ni ti nyu binnyur’ shɛli din be m pipia maa ni, amaa n nudirigu mini n nuzaa polo ʒinibu maa din’ pala man’ tibu; amaa m Ba Naawuni ni mal’ li zali ninvuɣ’ shɛba n-ni ti ʒin’ nimaani.”
24Ka o nyaandoliba pia la daa wum lala ka je suli niŋ bɛ tab’ niriba ayi maa. 25#Luk 22.25-26 Ka Yisa daa boli ba na ti yɛli ba, “Yi mi ni zuliya kam zuɣulaannim’ kuuni bɛ nam, ka wɔɣira mi wuhiri tarimba bɛ kpiɔŋ ni nyɛ shɛm; 26amaa di ku niŋ lala yinim’ sani. Dinzuɣu ŋun bɔri ni o nyɛ wɔɣirili yi ni, ŋun’ zaŋm’ omaŋ’ leei yi zaa ha bia; 27#Mat 23.11; Maak 9.35; Luk 22.26 ka ŋun mi bɔri ni o gari yi zaa, ŋun’ zaŋm’ omaŋ’ leei yi zaa ha dabili m-be 28kaman Daadam Bia gba ni be shɛm la; o bi kamina ni o ti ʒiya ka niriba tumdi tir’ o, amaa ni ŋun’ lee ti tumdi tiri ba, ka zaŋ o nyɛvili pa talima niriba pam nyɛviya zuɣu.”
Yisa tibi zoomba ayi
(Maak 10.46-52; Luk 18.35-43)
29Yisa min’ o nyaandoliba ni daa ti yiri Jɛriko ka salo pam dol’ o. 30Ka zoomba ayi daa ʒi sokpaŋa ka ti wum ni Yisa n-gariti maa, ka bɛ kuhi yɛli, Ti Dana, nyin’ ŋun nyɛ Naa Dauda yaaŋa ŋɔ, zom’ ti nambɔɣu!”
31Ka salo maa tahi bɛ zuɣu ni bɛ foma; amaa ka bɛ maan kuhi pam yɛli, “Ti dana, nyin’ ŋun nyɛ Naa Dauda yaaŋa ŋɔ, zom’ ti nambɔɣu!”
32Ka Yisa daa kpalim zani ka boli ba na ti bɔhi ba, “Bɔ ka yi lee bɔri ni n niŋ tin ya?”
33Ka bɛ yɛl’ o, “Ti dana, ti bɔri ni a neela ti nina ŋɔ ti ti.”
34Ka di daa niŋ Yisa nambɔɣu, ka o shihi bɛ nina maa ka di dii neei, ka bɛ yiɣisi doli Yisa chana.
ទើបបានជ្រើសរើសហើយ៖
Matiu 20: DBwDB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Dagbani Bible with Deuterocanonical Books © Bible Society of Ghana, 2011.
