Matiu 17
17
Yisa niŋgbuŋ biɛhigu taɣibu
(Maak 9.2-13; Luk 9.28-36)
1 #
2 Pita 1.17-18
Di daba ayɔbu nyaaŋa ka Yisa daa zaŋ Pita mini Jeemsi ni Jɔn ŋun daa nyɛ Jeemsi maa mabia la pah’ omaŋ’ zuɣu n-du zo’ shɛli din du pam zuɣu bɛ kɔŋko. 2Bɛ nini maa ni ka Yisa niŋgbuŋ biɛhigu daa taɣi, ka o ninni nyaɣisiri kaman wuntaŋ’ la, ka o binyɛrigu mi paligi paratɛte kaman gol’ la; 3ka bɛ daa nya ka Anabi Musa mini Anabi Ilaija puhi zan’ o sani ka bɛ min’ o tɔɣisiri yɛtɔɣa. 4Ka Pita yɛli Yisa, ‘N Duuma, di viɛli ni ti be kpe. A yi di saɣi, n naan ti suɣa ata: A zaɣ’ yini; Anabi Musa zaɣ’ yini, Anabi Ilaija gba zaɣ’ yini.”
5 #
Pil 22.2; Zal 18.15; Yila 2.7; Aiz 42.1; Mat 3.17; 12.18; Maak 1.11; Luk 3.22 Pita noli daa na bi lu tiŋa ka sagban’ piɛlli dii sirigina ti lim ba, ka bɛ wum ka kukol’ shɛli yɛri sagbani maa ni, “M Biyurigu m-bɔŋɔ; n nin’ ni tiɣi so pam m-bala; wummiy’ o noli!”
6Yisa nyaandoliba maa ni daa wum lala maa ka dabiɛm kpe ba, ka bɛ gbani n-zaŋ bɛ nini kpa tiŋa. 7Ka Yisa daa chaŋ ti shihi ba ka yɛli ba, “Yiɣisimiya! Di zɔriya dabiɛm!” 8Bɛ ni daa kul kpuɣ’ bɛ zuɣuri zuɣusaa, bɛ bi lan nya so n-naɣ’ pahila Yisa ko.
9Bɛ ni daa yi zoli maa zuɣu n-siɣirina ka Yisa kpahi bɛ zuɣu ni yɛli, “Miriya ka yi yɛli so yi ni nya shɛli ʒii maa ni maa yɛla, faashee Daadam Bia kum ni neebu nyaaŋa.”
10 #
Mal 4.5
Ka o nyaandoliba maa daa bɔh’ o, “Mami Naawuni zaligubaŋdiba yɛliya ni Anabi Ilaija n-yɛn daŋ kandina?”
11Ka Yisa garigi yɛli ba, “Di shiri simdi ni Anabi Ilaija daŋna nti mali binshɛɣukam zali di zaani. 12#Mat 11.14 Amaa n yɛri ya mi ni Anabi Ilaija pun kana, ka bɛ daa lee bi baŋ o, ka daa niŋ o bɛ suhu ni yu shɛm. Lala ka Daadam bia gba yɛn di wahala bɛ nuu ni.”
13Di saha maa ka o nyaandoliba maa daa baŋ ni Jɔn Baptaizira yɛla ka o yɛri ba maa.
Alizin’ biɛɣu karibu
(Maak 9.14-29; Luk 9.37-43a)
14Yisa min’ o nyaandoliba ata maa daa kana ti paala salo, ka bɛ ni do’ so daa kana ti damdi Yisa tooni yɛli, 15“N Duuma, zom’ m bidibiga ŋɔ nambɔɣu! O nyɛla kpilinkpihilana, ka di nahind’ o pam; di kul’ luhir’ o la waawaayili, ka o luri buɣim ni, shɛlini mi kom ni. 16Ka n zaŋ o tah’ a nyaandoliba ŋɔ sanna, ka bɛ bi tooi tib’ o.”
17Ka Yisa garigi yɛli, “Yinim’ bɛn ka yɛda mini ʒiɛman’ golimanim’ ŋɔ, daba ala ka m mini ya yɛn tooi laɣim be bee daba ala ka n yɛn tooi din ya suɣilo?” Ka yɛl’ o, “Zaŋm’ o na!” 18Ka Yisa daa tahi alizin’ biɛɣu ŋun be bia maa ni zuɣu, ka o zo ka chɛ o, ka bia maa dii kpaŋ zaa.
19Ka Yisa nyaandoliba daa ka o sanna ashilɔni ti bɔh’ o, “Ka bɔ n-niŋ ka tinim’ di bi tooi kari alizin’ biɛɣu maa bahi?”
20 #
Mat 21.21; Maak 11.23; 1 Kɔr 13.2 Ka o yɛli ba, “Di nyɛla yi yɛda pɔrilim zuɣu. Yɛlimaŋli ka n yɛri ya, yi yi mali yɛda ka di be kaman zabiliga tibiɛlim la, yi ni tooi yɛli zoli ŋɔ, ‘Yiɣisim’ a dooshee ŋɔ nti dɔni kpe ha,’ ka di shiri yiɣisi; ka shɛli ku kɔŋ nanibu yi sani. [ 21Di yi pala wunsuhigu mini nolɔbo zuɣu, so ku tooi kari alizin’ biɛɣu ŋɔ tatabo.”]
Yisa lan yɛl’ o kum yɛla yaha
(Maak 9.30-32; Luk 9.43b-45)
22Yisa nyaandoliba daa ti laɣim Galili na ka o yɛli ba, “Bɛ ni ti zaŋ Daadam Bia n-niŋ salinim’ nuu ni, 23ka bɛ ti ku o, amaa o ni ti neei kum ni daba ata dali.”
Ka di daa niŋ ba nandahima pam.
Naawuni jɛmbu duu tɔto tɔhibu
24 #
Yibu 30.13; 38.26 Bɛ ni daa ti paai Kapɛrinium ka Naawuni jɛmbu duu tɔto deeriba kana ti bɔhi Pita, “A karimba ŋɔ bi tɔhiri Naawuni jɛmbu duu tɔto la?”
25Ka o yɛli, “O tɔhira.”
O ni daa paai yiŋ’ na ka Yisa daŋ o di yɛla tɔɣisibu ka bɔh’ o, “Saimɔn, wula ka a lee tɛhiri di yɛla?” Ka lan bɔh’ o pahi, “Banim’ sani ka dunia ŋɔ nanim’ lee deeri farigu: Bɛmaŋmaŋ’ tiŋbihi sani bee saamba sani?”
26Ka o yɛli, “Saamba sani.”
O ni daa yɛli ni saamba sani maa, ka Yisa yɛli, “Ka dindina tiŋbihi bɛn’ nuu kani. 27Amaa ti ni bi bɔri ni ti miligi bɛ suhuri zuɣu, cham’ teeku ni nti zaŋ ziŋgoo bahi, ka di ni ti tuui gbaai zin’ so, a yi yaag’ o noli, a ni nya liɣiri di ni n-zaŋ ti tɔhi m min’ a zuɣu.”
ទើបបានជ្រើសរើសហើយ៖
Matiu 17: DBwDB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Dagbani Bible with Deuterocanonical Books © Bible Society of Ghana, 2011.
