ÉXODO 35
35
Samarikuna p'unchay imaynachus kananmanta
1Moisesqa tukuynin israelitasta tantachispa paykunaman nerqa: Kay jinata Señorqa kamachiwan, kay jinata ruwakunanta: 2Sojta p'unchayta llank'ankichej, qanchis kaj p'unchaypitaj Diosta yupaychaspa samarikunkichej, pillapis chay p'unchaypi llank'ajqa, wañonqa. 3Ni maypi, ni mayqenniykichej wasisniykichejpi ninallatapis amapuni jap'ichinkichejchu chay samarina p'unchaypeqa.
Dioswan tinkukuna toldopaj ofrenda
4Moisesqa tukuynin israelitasman parlarqa, kay jinata: Kayta Señorqa kamachin: 5-9Qankuna ukhupi ofrendata Señorpaj oqhariychej tukuy runas, tukuy sonqowan maytachus qoyta munasqankuman jina apamonqanku qorita, qolqeta, bronceta, telasta; lilata, puka pantita, pukata, sumajnin kaj linota, cabra pelosmanta ruwasqata, pukaman teñisqa oveja qarasta, qowi qarasta, acacia maderasta, k'anchachinapaj aceiteta, sumaj k'achata q'apaj imasta jawina aceitepaj, k'achata q'apashajta inciensopaj, ónice rumita, efodta k'acha rumiswan k'achanchanapaj, sacerdotej ima k'achanchanapajwan.
Dioswan tinkukuna imasnin
10-19Tukuy qankuna ukhupi yachayniyojkuna imastapis k'achitusta ruwajkuna jamuchunku, imastachus Señor kamachin chaykunata ruwanankupaj: Diospa tiyakunanta, toldo wasita, imaswanchus qhatasqa chayta, ganchosninta, tablasninta, k'aspisninta, postesninta, chukusninta, cajonta, chay cajonta wantuspa apana k'aspisninta, cajompa kirpananta, wasita velos pakan chaykunata, mesata, apana k'aspisninta, imaschus chay mesapi kan chaykunata, Diosman jaywasqa t'antata, k'anchachinata, imasninchus tiyan chaykunatawan, puntasnimpi k'anchan chaykunata, k'anchachina aceiteta; incienso altarta, apana k'aspisninta, jawina aceiteta, k'achata q'apaj inciensota, Dioswan tinkukuna toldo punku yaykuyta jark'achina telasta; rikuchiku ruphachina altarta, broncemanta ruwasqa telasninta, chay altarta apana k'aspisninta, imaschus tukuy chaykunapi tiyan chaykunata, mayllakuna ch'illamita, maypichus chay sayasqa kashan chaynintinta; pationta jark'achina telasta, kurkusninta, imaspichus chay k'aspis sayashan chaykunata, patio punku jark'achina telasta; Diospa tiyakunanta jap'ichina estacasta, jap'ichina waskasninta; sacerdotej awasqa p'achasninta Diospa tiyakunman yaykunapaj, sacerdote Aarompa sumaj kaj p'achasninta, wawasnimpa p'achasninta, chaykunata churakuspa imastapis chaypi ruwanankupaj Diospa tiyanan toldompi.
Ofrendasta apamunku
20Tukuynin israelitas Moisespa ñaupaqenmanta riraporqanku. 21Chaymantataj ofrendasta apamorqanku mashkhatachus tukuy sonqowan qoyta munarqanku chayta, astawanqa apamorqanku Dioswan tinkukuna toldo nisqa ruwakunampaj, imaswanchus kanan karqa chaykunata, imasninchus kanan karqa chaykunapaj; sacerdote p'achasta ima. 22Ajinata jamorqanku qharis warmis ofrendas aparisqas, mashkhatachus sonqonkupi qoyta munasqankuman jina. Chaypi apamorqanku kaykunata: Jap'ichinasta, faluchosta, qori sortejasta, walqasta, imaschus qorimanta ruwasqa karqa chaykunatawan. Ajinata Señorman ofrendasta apamorqanku. 23Chaymantaqa apamullarqankutaj imasninchus karqa chaykunata: Lila telasta, puka pantita, pukata, sumaj linomanta ruwasqata, cabra pelosmanta ruwasqasta, pukaman teñisqa oveja qarasta, qowi qarasta ima. 24Pikunachus Señorman ofrendata qorqanku qolqeta, bronceta ima chaykunata apamorqanku. Chantaqa pikunajtachus tiyaporqa acacia maderasninku chaykunapis apamullarqankutaj, imaschus ruwakunan karqa chaykuna ruwakunankupaj. 25Tukuy yachayniyoj warmispis ofrendasninkuta apamullarqankutaj, imastachus makisninkuwan sumaj t'ipasqasninkuta: Lilata, puka pantita, pukata, sumaj linomanta t'ipasqasta ima. 26Chanta apamullarqankutaj pi warmischus cabra pelosmanta imastapis t'ipasqasninkuta. 27Kurajkunastaj apamorqanku ónice rumista, sumaj k'acha llusk'achasqa rumista efod nisqapaj, chantaqa warkhuna nisqapajwan. 28Chantaqa apamullarqankutaj k'acha q'apaj jawinasta, k'anchanapaj aceiteta, pischus t'aqasqas kajta jawinapaj aceiteta, k'acha q'apaj inciensopajwan.
29Ajinata tukuy qharis warmis ofrendasninkuta israelitasqa apamorqanku maskhatachus tukuy sonqowan, kusiywantaj qosqankuta, imaynatachus Moisesman Señorqa kamachisqanman jina imastachus ruwanankupaj.
Señorqa wajyan Bezaleelta, Aholiabtawan
30Moisesqa israelitasman nerqa: Qhawariychej, Señorqa ñapis ajllanña Judá ayllumanta Urpa allchhin Urej wawan Bezaleelta. 31Payman junt'achin Diospa Espiritunwan pay sumaj yachayniyoj kanampaj, jinamanta kay mundopi imasmanta sumajta yachanampaj, imastapis k'achitusta yuyaynillanmanta ruwanampaj. 32-33Qhawariytawan imastapis ruwanampaj, qorimanta, qolqemanta, broncemanta, rumismanta k'acha llusq'etusta ruwanampaj, maderamanta, imallamantapis k'achitustapuni ruwanampaj. 34-35Chantaqa ajllallantaj yachachinampaj Dan ayllumanta Ahisamacpa wawan Aholiabta, payman qon yachayta tukuy sonqowan yachachinampaj, tukuy imata k'achitusta ruwachinampaj pallayniyojta lila p'achaspi, puka panti p'achaspi, puka p'achaspi, sumaj lino p'achaspi, awasqa p'achaspipis. Ajinata imallatapis imaynachus señalasqa kashan chayman jina ruwanankupaj.
ទើបបានជ្រើសរើសហើយ៖
ÉXODO 35: QCHSB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Qheshwa Biblia DC © Sociedades Bíblicas Unidas, 1986.