ÉXODO 28
28
Sacerdotespa p'achasnin
1Wauqeyki Aaronta wajyachispa kamachiy, wawasnintawan, Nadabta, Abiuta, Eleazarta, Itamartawan, paykuna israelitas ukhupi sacerdotesniy kanankupaj. 2Wauqeyki Aarompaj sacerdote p'achasninta ruwapuy, k'achata sumajtataj qhawasqa kanampaj. 3Qan parlay tukuy yachayniyojkunaman, pikunachus k'acha sonqoyoj kanku chaykunaman, pikunamanchus yachayta yuyaytataj qoni chaykunaman, Aarompaj sumaj p'achasta ruwapunankupaj sumaj respetasqa sacerdotesniy kanankupaj. 4P'achastaqa kaykunata ruwanqanku: kunkanman warkhunata efodta, capata, k'acha ruwasqa puka p'achata, linomanta mana ningriyoj ch'uluta, uj pallayniyoj chumpitawan. Ajinata sumaj p'achasta ruwapunkichej wauqeyki Aarompaj, wawasnimpajwan paykuna sacerdotesniy kanankupaj. 5Chay p'achastaqa ruwankichej qorimanta, lilamanta pukamanta, puka pantimanta, t'ullkusqa linomantawan.
Efod
6Efodtaqa k'acha pallayniyojta ruwanki qorimanta, lilamanta, puka pantimanta, pukamanta, t'ullkusqa linomantawan. 7Chaytaj kanqa sacerdote kunkanman wataykukunampaj puraj cantosnimpi iskay watusniyoj. 8Ura cantosnimpitaj chay kikimpi jap'ichisqas kanqa k'acha colorniyoj iskay chumpis qhepaman wataykukunampaj; chaytaj kanqa lilamanta, puka pantimanta, pukamanta, t'ullkusqa linomantawan. 9Chaymantaqa iskay ónice rumista k'askachinki, chaymantaj Israelpa wawasnimpa sutisninta churay. 10Chaymanta churanki kurajmanta sullk'aman jina; ujnin kaj rumiman churanki sojtajta, ujnin kajmantaj sojtajta. 11Chay rumispi ruwana sutista ruwanki sello ñit'inata jina, sapa ujnin rumisman Israelpa wawasnimpa sutisninta churanaykipaj. Chaymantaqa chay rumista churaranki qorimanta ruwasqa muyuynin pataman. 12Iskaynin rumista k'askachinki efod mast'asqa pataman israelitas yuyarikunankupaj. Chantá Aarompis, israelitas yuyarikunankupaj sapa lado lijrasnimpi Señorpa ñaupaqempi paykunaj sutisninta apanqa. 13Muyuyninta qorimanta ruwanki. 14Ch'uwa qorimanta phalaspa ruwanki, jinamanta chay muyuynimpa cantosninta chaywan muyuykuchinki.
Warkhuna
15Warkhunatapis kikillantataj efodta jina ruwanki. Chay warkhunapi ruwanki imaschus juzganapaj tiyan chaykunasniyojta, k'acha pallayniyojta qorimanta, lilamanta, puka pantimanta, pukamanta, t'ullkusqa linomantawan. 16Chayqa kanqa rakhu sapa cantonman chhikachajpura iskay chunka centimetrosniyojkama. 17Chaypa patanmantaj junt'achinki k'acha rumisituswan, tawa sinrullata chhitaraspa. Ñaupaj kaj sinroqa kanqa sárdica rumimanta, topacio rumimanta, esmeralda rumimantawan. 18Iskay kaj sinrutaj kanqa rubí rumimanta, zafiromanta, diamante rumimantawan. 19Kinsa kaj sinrutaj kanqa jacinto rumimanta, agatamanta, uj amatista rumimantawan. 20Tawa kaj sinrutaj kanqa berilo rumimanta, uj onicemanta, uj jaspe rumimantawan. Tukuynin rumis muyuynin pataspi qorimanta ruwasqas kanqanku. 21Chay rumisqa kanqanku mashkhachus Israelpa wawasnin kanku chayman jina, chunka iskayniyoj sutis. Chay sutis sapa uj rumispi escribisqa kanqa chunka iskayniyoj ayllus.
22Chaymantaqa warkhunapaj ruwanki ch'uwa qorimanta simp'aspa ch'ankullasta jina. 23Ruwallankitaj qorimanta iskay ningrista, chaytataj warkhunaj sapa lado cantosninman k'askachinki. 24Chaymantataj chay iskay ch'ankullaswan qori ningrista pasarachinki warkhunaj pata cantonta. 25Iskaynin ch'ankullasta churanki muyuynimpa patasninman. Chaymantaqa sumajta chhitaykunki efodpa ñaupajninman iskaynin puntasninman. 26Chanta ruwallankitaj iskay qori ningrista, chaytataj warkhunaman k'askachinki ukhu ladonman efod kashan chay ladonman. 27Ruwallankitaj iskay ningristawan qorimanta, chaytataj k'askachinki efodpa ñaupajninman iskaynin cantosninman, siraynimpa uranman chumpinmanta tumpa patannejman. 28Ajinamanta warkhunaj ningrisninwan efodpa ningrisninwan ujllaman t'inkisqas kanqanku, lila q'aytuwan, efodpa chumpin patanejpi qhepakunampaj, amataj warkhunaqa efodmanta t'asqa kanampaj. 29Aaronqa Diospaj ajllasqa toldoman yaykuspa warkhunaj patampi Israelpa wawasnimpa sutisnin ruwasqasta, cheqanchana imastawan oqharisqa yaykonqa. Jinallataj chay sutis pechompi k'askachisqas kanqa. Ajinata Aaronqa Señorpa ñaupaqempi purenqa, sapa kuti paykunamanta yuyarikunampaj. 30Warkhunaj patanman churanki cheqanchana imasta Urimta, Tumintawan. Ajinamanta Aarón pechon patapi apanampaj sapa Señorpa ñaupaqenman qayllaspa. Ajinamanta Aaronqa pechompi apanqapuni cheqanchana imasta Señorpa ñaupaqempi.
Efodpaj manta ruwasqa
31Efodta qhatanapaj uj mantata ruwanki lilamanta. 32Chayqa kanqa khuskannejpi khallayoj, chay khallampa puntantataj q'empiykunki qaramanta ruwasqa chalecoj puntanta jina ama llik'ikunampaj. 33Chaymantaj puntanman flecosninta k'achanchanampaj churaranki, chanta q'aytu t'ikastawan lilamanta, pukamanta puka pantimantawan. Chaypa chaupisninmantaj warkhuranki qorimanta campanillasta muyuynintinman. 34Chaytaqa chajrusqata churanki ujta qori campanillata, ujtataj q'aytu t'ikata sapa ujpa wasanman. Ajinata mantaj tukuy cantonta muyurichinki. 35Chaymantataj Aaronqa churakonqa sapa kuti Diosman jaywaj rispa; chayman yaykushajtintaj, llojsimushajtintaj chay campanillas chhulloj chhulloj nispa sonanqapuni Diospaj ajllasqa wasinman yaykojtin Señorpa ñaupaqempi, ajinamanta pay ama wañunampaj.
Qori letra
36Chaymantaqa uj jatun p'altata qorimanta ruwallankitaj; chaymantaj uj sellota jina ruwanki “Señorpaj t'aqasqamin”, nispa. 37Chaytataj uj lila q'aytuwan mana ningriyoj ch'ulloj ñaupajninman warkhuykunki sumajta wataspa. 38Ajinamanta chay letrasqa Aarompa frentempi warkhusqa kanqa. Aaronqa tukuypa juchasnin q'epirisqas chayman yaykonqa israelitaspa ofrendasninku oqharisqa juchasninkoj cuentanmanta. Chay letrastaj niyta munanqa Dios paykunata uyarisqanta.
Sacerdotespa p'achasnin
39Uj k'acha pallayniyoj p'achata linomanta ruwanki, ch'ulutapis linollamantataj. Chaymantaqa ruwallankitaj uj k'acha pallayniyoj chumpita. 40Aarompa wawasnimpaj ruwarapunki sumaj p'achasta, chumpista ch'ulustawan, paykuna sumajpaj, k'achaspajtaj qhawasqas kanankupaj.
41Ajinata wauqeyki Aaronta wawasnintawan sumajta p'achallichinki, chaymantataj umasninkuta aceitewan jawiranki, paykuna noqapaj t'aqasqas kanankupaj; ajinamanta sacerdotesniy kanqanku. 42Chanta ruwarapullankitaj calzoncillosta linomanta. Chaytataj churakonqanku ñañu wasankumanta piernankukama. 43Chay p'achasta churarakuspa Aarón, jinallataj wawasnimpis Diospaj tiyakunan toldoman yaykonqanku, chayri altarman qayllaykunankupaj rikuchikusta jaywanankupaj Diospaj t'aqasqa cheqapi, ama juchallikunankupaj, amataj wañunankupaj. Kay leyqa unaypajpuni kanqa, jinallataj mirayninkupajpis.
ទើបបានជ្រើសរើសហើយ៖
ÉXODO 28: QCHSB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Qheshwa Biblia DC © Sociedades Bíblicas Unidas, 1986.