ÉXODO 20
20
Chunka kamachiykunas
1Diosqa kay tukuy palabrasta parlamorqa, ajinata nispa: 2Noqa Señor Diosniyki kani, Egiptomanta orqhomorqayki, kamachillapuni kanaykimanta.
3Noqamanta astawan waj dioskunataqa ama yupaychankichu. 4Ama ni ima lantita ruwakunkichu, ni patapi cielopi kajman rijch'akojta, ni urapi jallp'api kajman rijch'akojta, nitaj yakuspi kajman rijch'akojtapis.
5Ama qonqorikunkichu chaykunaman, ama yupaychankichu; imaraykuchus noqamin Señor Diosniykeqa kani, sinch'i, Dios celoso, noqata chejniwajkunaj juchasninkuta jasut'ej, tatasninkoj juchasninkuta wawasninkupi jasut'ini, chantá allchhisninkupi, nieto allchhisninkupi ima. 6Khuyakuyniytaqa waranqa waranqasman rikuchini, pikunachus munakuwanku, kamachisqasniytataj kasuwanku chaykunaman.
7Ama qhasimanta oqharinkichu Señor Diosniykej sutinta. Diosqa jasut'enqapuni pischus sutinta qhasimanta oqharejtaqa.
8Ama qonqankichu samarikuna diamanta, chay diapi Diosmanta yuyarikunaykipaj. 9Sojta p'unchayta llank'anki, chay p'unchaykunapi tukuy ruwanayki kajta ruway. 10Qanchis kaj p'unchayrí Señor Diosniykimanta yuyarikuspa yupaychanapaj. Chay diapi ni imata ruwankichu, ni qan, ni qhari wawayki, ni warmi wawayki, ni qhari kamachiyki, ni warmi kamachiyki, ni uywasniyki, nitaj waj llajtayoj qankuna ukhupi tiyakojpis. 11Señorpis sojta p'unchaypi ruwarqa cielota, kay pachata, mar qochata, chay ruwasqasnimpi imaschus kashanku chaykunatawan. Qanchis kaj p'unchaypitaj samarikorqa, chayrayku Señorqa bendicerqa samarikuna p'unchayta, nerqataj payllapaj kasqanta.
12Tataykita mamaykitawan kasuy, unayta kay jallp'a patapi kausakunaykipaj, mayqen jallp'atachus Señor Diosniyki qosunki chaypi.
13Ama wañuchinkichu.
14Ama qhenchachakunkichu.
15Ama suwakunkichu.
16Ama qhasimanta runa masiykej contranta llullakuspa parlankichu.
17Ama munapayankichu runa masiykej wasinta; ama munapayankichu runa masiykej warminta, ni qhari kamachinta, ni warmi kamachinta, ni wakanta, ni burronta, nitaj ni iman kajta.
Israelitas Diosta manchachikunku
18Tukuy israelitas uyarerqanku rikorqankutaj lliuj lliujkunata, qhon qhonkunata, pututoj waqamusqanta, chay tukuy punta orqopis q'osñorisqanta ima. Chayta rikuspa israelitasqa mayta mancharikorqanku, karunchakorqankutaj, chay orqoman mana chimpaspa. 19Chayrayku Moisesman nerqanku: Qanlla parlawayku, noqaykutaj kasusqayku imatachus niwasqaykuta. Diosqa ama noqaykuwanqa parlachunchu ari, pay parlapayawasqayku chayqa wañurasqayku.
20Moisestaj paykunaman nerqa: Ama manchachikuychejchu; Diosqa qankunata imaynachus kasqaykichejta yachaj jamun, qankuna payta manchachikunaykichejpajpuni, paypa ñaupaqempi ama juchallikunkichejchu.
21Chaykama runasqa karullapi kasharqanku; Moisestaj qayllaykorqa phuyu laqha kasharqa chay orqoman, maypichus Dios kasharqa chayman.
Imaynatachus altarta ruwanamanta
22Chaypitaj Señorqa Moisesman nerqa: Kay jinata niy israelitasman: Qankuna ña rikunkichejña imaynatachus cielomantapacha qankunawan parlasqayta. 23Noqaj ñaupaqeypi ama lantista ruwankichejchu qolqemanta, nitaj qorimantapis, chaykunatapis yupaychanaykichejpaj. 24T'urumanta altarta ruwapuwankichej, chay patapi ruphachina rikuchikusta jaywawankichej, allinyanakuy ofrendata, wakasta, ovejasta ima apamuwasqaykichejta. Maypichari kay jinasta ruwaspa sutiymanta yuyarikunkichej chayqa, chayman jamuspa bendicisqaykichej. 25Sichus rumismanta altarta ruwankichej chayqa, ama runaj llusk'achasqan rumismanta ruwapuwankichejchu. Sichus ima herramientawan chay rumista ch'eqonkichej chayqa, uj lantita jinaña qankunaqa ruwashankichej. 26Altarta ruwapuwaspaqa ama gradasniyojtachu ruwankichej, ama chayninta wicharishajtiykichej q'ala ukhuykichejpis rikukunampaj.
ទើបបានជ្រើសរើសហើយ៖
ÉXODO 20: QCHSB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Qheshwa Biblia DC © Sociedades Bíblicas Unidas, 1986.