ÉXODO 14
14
Puka mar qochata israelitas chimpanku
1-2Señorqa Moisesman nerqa: Riy israelitasman, kutirispa jarakuchunku Pi-hahirotpa chimpampi, Migdolwan mar qochawan tinkuypi Baal-zefompa chimpampi. Chay cheqaspa chimpampi jarakunkichej mar qocha qayllapi. 3Faraonqa nenqa: Israelitasqa mana yachankuchu maymanchus rinankuta. Ch'in pampaspi chinkasqas jina kashanku, jark'asqas jinataj, nispa. 4Noqataj faraompa sonqonta rumiyachisaj qankunata qhatirimunasuykichejpaj. Chaypitaj atiyniyta rikuchisaj paypa patampi, tukuy soldadosnimpa patampiwan. Ajinamanta egipciosqa yachanqanku noqa Señor kasqayta. Israelitastaj chayta uyarispa kikinta ruwarqanku.
5Chaykamataj Egiptomanta reyqa yacharqa israelitasqa ayqesqankuta. Faraonqa mayta phiñarikuspa, jinallataj kamachisnimpis, nerqanku: Imatataj noqanchej ruwashanchejri, imapajtaj israelitasta rejta saqerqanchejri, noqanchejpaj imatapis ruwananku kashajtinri?
6Faraonqa chay ratopacha kamacherqa maqanakunan carronta wakichipunankuta, soldadosnimpis paywan khuska rinankuta. 7Chaymanta aparqa sojta pachaj sumachaj egipcio carrosta caballos qhatatejkunatawan, sapa uj carrospi capitanesnintawan. 8Egipto rey faraompa sonqonta Señorqa rumiyacherqa, israelitasta qhatirinampaj, mana kasuspa israelitasqa chay jina atiywan llojsishajtinku.
9Egipciosqa purirerqanku israelitasta qhatirispa, tukuy soldadosninkuwan, wakin caballospi rejkunawan ima. Jinata rispa karunejmanta israelitasta rikorqanku, mar qocha qayllapiña jarakusqas kashajtinku, Pi-hahirot Baal-zefonwan chimpampi. 10Israelitastaj, faraón soldadosninwan qayllaykushajta rikuspa maytapuni mancharikorqanku, Señormantataj mayta mañakorqanku. 11Moisesmantaj nerqanku: Manachu Egiptopi p'ampakunaykupaj karqa aya p'ampanas, kay ch'in pampapi wañurachichinawaykupajchu orqhomuwarqayku? Imatataj kayta ruwawaykuri? Chaypajchu Egiptomanta orqhomuwarqayku? 12Chayrayku qanta nerqayku Egiptollapiraj kashaspa: Saqewayku egipciospa kamachisnin kajta, nispa. Noqaykupajqa walej kanman karqa egipciospa kamachisnin kanayku, kay ch'in pampapi wañunaykumantaqa.
13Moisestaj paykunaman nerqa: Chaymantaqa ama mancharikuychejchu, sumajta sayaychej, rikunkichej Señor imatachus ruwanqa qankunata libranasuykichejpaj; imaraykuchus kunallanña egipciospa uyasninkuta rikushankichej, kaymanta qhepamanqa ni jayk'aj rikunkichejñachu. 14Qankunaqa ama chaymanta llakikuychejchu, Señorlla cuentaykichejmanta maqanakonqa.
15Chaypachataj Señorqa Moisesman nerqa: Imaraykutaj qanqa noqamanta yanapata mañakuwankiri? Niy israelitasman ñaupajman rinallankutapuni. 16Qan tojnuykita oqharikuspa makiykita pataman oqhariy chay mar qochanejman, iskaymantaj t'aqarpariy, israelitas chayninta ch'akipi chimpanankupaj. 17Noqataj egipciospa sonqosninta rumiyachisaj, qhepaykichejta qhatimunasuykichejpaj. Chaypitaj noqa atiyniyta rikuchisaj faraompa soldadosnimpi, carrosnimpi, caballosnimpi, maqanakoj soldadosnimpi ima. 18Maypachachus atiyniyta rikuchisaj faraompi, carrosnimpi, caballospi rej soldadosnimpi, chaypacharaj egipciosqa yachanqanku noqa Señor kasqayta.
19Diospa angelnintaj israelitaspa ñaupaqenkuta rishaspa, qhepankutañataj rerqa. Jinallataj ñaupaqenkuta risharqa chay phuyupis qhepankuman kutirimuspa qhepankutañataj rerqa. 20Ajinamanta phuyoqa chaupipi rikhurerqa egipcioswan israelitaswan ama rikunakunankupaj. Chay phuyoqa egipciosta laqhaykorqa, israelitastataj tutan k'ancharqa. Chay tutaqa ni mayqen qayllaykunakorqankuchu. Chayrayku egipciosqa israelitasta mana taripayta aterqankuchu.
21Moisesqa mar qochanejman makinta oqharerqa, Señortaj tukuy chay tuta inti llojsimuynejmanta sumajta wayrachimuspa yakuta iskayman khallarparerqa. Ajinamanta mar qochaqa iskayman ukhu wayq'o jina khallerparikuspa, chay cheqa ch'akiman tukorqa. 22Israelitastaj mar qochaj chaupinta yaykuspa ch'aki jallp'api pasarqanku, yakustaj qhepakorqa jatun perqa jina lloq'enkupi, pañankupitaj.
23Egipciostaj caballosninkupi, carrosninkupi ima israelistaspa qhepanta yaykuykorqanku, paykunata qhatiykuspa, marpa khuskanninkama. 24Señortaj q'ayantin sut'iyarpamuyta egipciospa campamentonta, phuyu ukhumanta, nina k'anchay ukhumantawan qhawarimuspa, egipciostaqa q'alata pejturparerqa. 25Carrosninkoj ruedasnin urmararqa, umankupis muyusqa jina kajtin manaña ñaupajman riyta aterqankuchu. Chaymanta egipciosqa ninakorqanku: Ayqekunachej israelitaspa ñaupaqenmanta, Señor maqanakushan paykunapaj sayakuspa noqanchejpa contranchejta.
26Señortaj nerqa Moisesman: Makiykita oqhariy marnejman ujllata tinkuykuspa egipciosta p'ampaykunampaj, carrosninkuta, tukuy caballosninkuta ima.
27Moisesqa marnejman makinta oqharerqa sut'iyarpayamushajtin, mar yakutaj ujllata manchay kallpawan wisq'aykakaporqa. Egipciostaj kutiripushaspa yakuwan p'ampaykuchikorqanku. Ajinata Señorqa egipciosta yakuwan marpi chinkarparicherqa. 28Yakoqa tinkuykushaspa tukuyninkuta p'ampaykorqa carrosta, caballospi rejkunata, faraompa tukuynin caballosninta, pikunachus israelitaspa qhepanta yaykorqanku chaykunata. Chaykunamanta mana ujpis kausashaj puchorqankuchu. 29Israelitasri mar qochata pasarqanku ch'akipi, yakustaj pañankupitaj, lloq'enkupitaj perqaspis kanman jina sayaykorqanku.
30Ajinata Señorqa israelitasta salvarqa chay p'unchaypi egipciospa makinmanta. Israelitasqa rikorqanku wañusqa egipciospa ayasninta mar qocha cantospi wijch'urayashajta. 31Israelitasqa chayta rikorqanku mayta musphaspa t'ukunata jina, imaynatachus Señorqa egipciosta ruwasqanta. Chaymanta israelitasqa Señorta manchachikorqanku, creerqankutaj Señorpi, jinallataj kasorqanku Señorpa kamachin Moisestapis.
ទើបបានជ្រើសរើសហើយ៖
ÉXODO 14: QCHSB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Qheshwa Biblia DC © Sociedades Bíblicas Unidas, 1986.