Marc 5
5
Yeesu cáaǹ uwaati ubɔ Geeraseen tiŋkin
(Kpèè Maat 8.28-34, Luuki 8.26-39)
1Bi nìn dūtì lapu mɔɔgbandi Geeraseen yab tiŋkin#5.1 Dūú ŋmàntī nì Maat 8.28.. 2Yeesu kpákatì buŋalimbunee, kpalaayee, kijapaai kiba kin pu arasinii kēe nyánní kuceeun ki túŋkiń-u. 3U nìn kóò akaakulin ní. Báà ubɔ kaa nìn ŋūǹ kí bóob́-u, báà bi yaa dū ikusaka gba. 4Di sá bi nìn bāā-u abaa ki gbìǹ-u ikusaka mun, ní ú tìfī ikusakee ní kí wìil̀ abaa mun. Ubɔ kaa nìn gíti ŋūǹ kí pèefì-u. 5U nìn bí ní ki yìiǹ ŋwiimpu nì kunyeeu kɔkɔ akaakulin nì ajoon pu ki kūuntí ní ki cáá ataŋkpee ki gífí u-ba. 6U wál̀ Yeesu ndanee, ní ki sáǹní ki dɔ́miń ki tātìi gbāaǹ u-nimbiin, 7ní ki fáá mbiil mpɔn yii: «Yeesu Unimbɔti un bí yilpuee Jipɔɔn, man nì si yii ba ní? M dū Unimbɔti ki gbāam̀-si, taa sàaǹ-mi!» 8U nìn lī míǹ kun puee Yeesu nìn lī-u yii: «Arasinii, nyā uninja nee ni!» 9Ní Yeesu bālifì-u yii: «Bi yíì-si yii ba?» Ní uwaatee kíí-u yii: «M-yindi di sá yii: <Kusoojapaau,> kun puee ti wīikí tikpil.» 10Ní u gbāam̀ Yeesu tikpil ki lī yii: «Taa jà-ti kitiŋ nee pu!»
11Dijool diba nìn bí niin, di-caŋinee digbeetikitikpaandi diba nìn sí ki jīǹ. 12Arasiniibee gbāam̀-u yii: «Càntī tí cùú kɔ́ igbeeti nee ni.» 13Ní u pú-bi mpaan, ní bi nyáń uwaatee ni ki kɔ́ igbeetin, ní digbeetikitilee sáǹ ki wúntì nsitimin ki jéetì dimɔɔlin ki múĺ ki kpíì. Igbeetee nìn bàn̄ kutukub bili nyɔkɔm. 14Ní bin nìn kpàá igbeetee sáǹ ki cūtì kitiŋin nì ikaan ki máafì an bɔti. Binib nyánní kí dāá kpèè tin di ŋée, 15ki bāań Yeesu ceeyee ki ká uwaati un pu kurasiniipaau nìn kēe kā ki pēē tiwan ki dàkafī nnimɔntiyaamin. Bi ká-uee, ní tifaandi kɔ́-bi. 16Bin nìn ká tin jítèe máafì bin kíǹee an nín ŋá pu ní uwaatee pɔ́ɔkì ní igbeeti kpíìyee. 17Ŋyunti gbantee ní bi kíĺ ki bíi gbàam̄ Yeesu yii ú yīkì bi-tiŋki pu. 18Yeesu bíi kóò buŋalimbunee, ní uninja un nìn wáatèe gbāam̀-u yii ú yàntī ú táá-u kí nīn kíǹ ki bí u-cee. 19Ama ní Yeesu kaa pú-u nsan, ní ki bí-u yii: «Nín̄ kùǹ a-mɔŋkiŋu a-yab cee kí māafì-bi min ní ti-Dindaan súń a-saayee nì tin kɔkɔ u ŋá ki tīī-see.» 20Ní kijapaayee búntì ki kíĺ ki máafí ntimu saalaa jaaŋŋi kɔkɔn tin kɔkɔ Yeesu ŋá ki tīī-uee, ní báà ŋma bākatì sèeee.
Yeesu fīkitì kisapɔmbiki kiba ki cáaǹ unimpu ubɔ
(Kpèè Maat 9.18-26, Luuki 8.40-56)
21Yeesu kɔ́ buŋalimbun ki fātìi dūtì dimɔɔgbandi. U dáá bí dimɔɔgbandee ní dinikitikpaandi dɔ́miń ki kpáfì u-cee. 22Kukpafidii kpiliu ubɔ nìn dɔ́miń, bi yíì-u Jayirusi. U ká Yeesuee, ní ki gbāaǹ u-nimbiin 23ki mēē-u nì igbaam poon ki bí yii: «M-sapɔmbiki būǹ ki làá kpú. Á jī kimɔtii kí pée dāan̄ kí dū a-ŋal kí páań ki-pu, kí cáaǹ-kì kí ŋmátí.» 24Ní u nì Yeesu búntì, ní dinikitilee fāā ki bīiǹ u-boon bɔ̀mmm. 25Unimpu ubɔ nìn ŋmàl̄ niin ki fùul̀ ŋkpin an kaa gúǹ áli abin saalaa nì ali. 26U nìn jíń falaa tikpil ki nìn bíil̀ u-nimbiliŋ mun kɔkɔ binyɔɔdambi tikpil cee, kaa kpáàa ká dicáaǹdi, ní an mɔ̄tìi púntì-u. 27Unimpuee nìn gbìl̄ bi sòon̄ Yeesu pu, ní u dɔ́miń kunipaaun ki dīń Yeesu boon pú ki gbēē u-bɔkutil. 28Di sá u nìn lī u-pɔbilin yii: «M yaan pée ŋúń ki gbēē u-bɔkutil kpaŋkpam, m bàà kāntí dicáaǹdi.» 29Niinee, fatiku un nyēē-uee kpáàa gúń, ní u gbìl̄ u-wuntin yii u pɔ́ɔkì. 30Kpalaayee Yeesu gbìl̄ u-ban yii mpɔn ŋubɔ nyáń u-ni ní u fātì kunipaauee pu ki bí yii: «Ŋma di gbēē m-bɔkutil?» 31Ní u-boonnooliibi kíí-u yii: «Sii wāĺ kunipaau téekí-si yéè, ní a bàlifī yii: <Ŋma gbēē-maaa?>»
32Yeesu kpēē ki māntì ki tú ki nyàab̀ kí béé un di ŋá mimmee. 33Niinee, tifaandi cúú unimpuee, u-wunti kíĺ ki bíi jìkì, kun puee u nyí tin di jítì u-puee. Ní u dɔ́miń ki tātìi gbāaǹ Yeesu taaŋi taapu ní ki kàan̄-u tikɔkɔ nì ibaamɔn. 34Niinee ní Yeesu bí-u yii: «M-bisal, a nín fōō ki kíí puee fīī-si. Nín̄ cá nì ŋgbansɔŋfi, a-weeŋyi ń yàntī-si.»
35Waa láá ŋmíl̀, ní kukpafidii kpiliuee yab biba nyánní u-dumpu ki bāań ki bí yii: «A-bisal kpíì. Taa ti páb́ ukpil yii ú dāan̄.» 36Yeesu gbìl̄ dinyɔɔbundi din bi lēe, ní ki tùkū kukpafidii kpiliuee yii: «Taa yàntī a-pɔbil ń bīil̀! Sii dee fōō man kí kíí.» 37Waa yāntì báà ubɔ céeǹ-u ki kútì Peetroo nì Yakubu nì Yoowaneesi, Yakubu naal pu. 38Bi nín bàn̄ kukpafidii kpiliuee dumpuee, Yeesu ká binib gà dituweel an tùm̀ dàiiyee, 39ní u kɔ́ ki bí-bi yii: «Ba pu ní ni sūǹ ki ŋáań kuwoou míǹ? Kibikee kaa kpíì, ki gèeǹ ní.» 40Ní bi bíi bèel̄-u, ní u jìn̄ bi-kɔkɔ ki nyántì, ní ki yōoǹ kibiki baa nì ki-na nì u-boonnooliibi bita bin nìn céeǹní-uee, ki kɔ́ǹ laakin kibikee dɔ̄ee, 41ní u cúú kibikee ŋal ki bí-kì yii: «Taliita, kumii.» An taapu di sá yii: «Kisapɔmbiki, yīkì, sii ní m lì!» 42Kpalaayee ní kibikee nyīī yíkì ki bíi còom̄. Kì nìn cáá abin saalaa nì ali ní. Ní bin nìn bí niinee bākatì sèeee. 43Ama ní Yeesu kpáafì-bi tiŋan bí taa yàntī báà ubɔ ń béé, ní ki bí-bi yii, «Tīīmaan-kì tijin.»
ទើបបានជ្រើសរើសហើយ៖
Marc 5: BASSARDC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
BIBLE EN N'TCHAM (Bassar) © Alliance Biblique du Togo, 2013.