1 Kɔlìn 9
9
Mèntsèke wantu̧ Mbɔ̧ɔ̧mà
1Àghɨa ko a sèlà am a si la a ntsě. Bɨ bakà ko nê e ngu wantu̧ Yesò Klistò? Mâ ye a Yesò Klistò Lefɨ̀Ꞌ wa nè èghɨ laã. Wu mmɔ̌ ka mâ tsɔ̀te ntu̧ yu è ghɨ bɨ zì mèntɨ̧ɨ̧ mɨ̧ ane Yesò Klistò la. Ale, bɨ wu àbu àfàꞋ am. 2È wu nê bòt ko aa kà nɨ am mbɨ̀Ꞌɨ̀ wantu̧ Yesò, ko mâ ko nê bɨ̀a nɨ am mbɨ̀Ꞌɨ̀ wantu̧ tò, nkàà nê bɨ wu àghɨa àa nyɨ̀Ꞌta nê e ngu wantu̧ Yesò, ndɨ̀ wu bɨ̀ tsiꞋi àghɨa yeamɔꞋ nê tòà la.
3Eyaa wu àbɨ̀t màa ŋǎ abua bòt bu bɔ̀ɔ mbàŋè am la. 4Tè bà kâ njɨ̀ èghɨjɨ mè nu mèleb? 5Tè betsiꞋa bà ka yɔꞋɔ àvi mbɨ̀Ꞌɨ̀ bɔntu̧ Yesò ko, nè bɔnyɨ tò nè Pità? 6Kò wu wuê baà Bànabasì ba bɔ ndɨ bàa me fàꞋa ka mbɔ̌ èkab è me wu bɔntu̧ ko bɔ me nɨ nɨ la le è?
7Kò shujà kǒ nàà və tàa fàꞋà àfaꞋ kà bɔ wua ŋa èkab abua tò la à? Kò wòt kǒ nàà və tàa liꞋi èbaꞋa li e lɔ̀Ꞌɔ bakà jɨ èghɨ e dzə abàꞋ vəꞋ la leè? Kò wòt nàà və tàa mbààba mpɔ̀ŋtsə kà wua nua malɨ̂k è dzə ane mpɔ̀ŋte ngaa la à? 8Kò e ndàꞋà ane àtɔŋ bɔbȩ à? Ka wu ndɨ àa èbem mbɨ̧te Musì la à? 9Bɔ shɨ a èbem mbɨ̧te Musì nê, “À me nɨ mpɔ̀ŋ mùꞋtà ntsəètsə, à ka nkùùle ètsəê tò nê tà ka nkwèlè è te ko.” Tè bɨ ye nê èntɨ̧ɨ̧ Mbɔ̧ɔ̧mà e wu ale wuê ane mpɔ̀ŋtsə? 10Tè tà li tà kà wua ndàꞋà àyaa ŋǎ abua ya à? Tà li ngua ndàꞋà ŋǎ abua ya. Wòt me liꞋi mbȩ tà bɔ̌ ndɨ tàa bɔ ntɨ̀ nê yea ghɨ̌ fùꞋu, wòt fùꞋu la bɔ ntɨ̀ nê yea bɔ vi ne èghab la. 11Tè ba tsɔ̀te Ntu̧ Ntsɔ̧̀ abua yɨ̧ ko wu ànəa nɨ̧ e laꞋ nê bɨ̀ me tɨŋe awa nè èghɨ bɨ bɔ la à? 12Tè bòt ko e wu me shu nê wu àdziꞋa yɨ̧ a màŋa wɔb èghɨ, è me wu awa bɨ̀ ka ŋa abua ya tê ntsè?
Ka ba bakà ghɨ mbɨꞋɨ̀ ba wuê ghɨ̀ la, baa nɨa àghɨ àgème mbɨ̀Ꞌɨ̀ àa la, mbɨ̀Ꞌɨ̀ ka baa ghɨ̀ àghɨa àa kele bòt nê bɔ̀ ka mbɨ̧̀ɨ̧̀ne Ntu̧ Ntsɔ̧̀ Yesò Klistò la. 13Bɨ bakà ko nê bòt bu bɔ̀ɔ faꞋa a èbem lob nɨŋ Mbɔ̧ɔ̧mà la aa mbɔ̌ èghɨjɨ bɔb a èbem lob mbɔŋ, è bu bɔ̀ɔ faꞋa àdziꞋa bɔ̀ɔ ŋǎ èghɨ abua Mbɔ̧ɔ̧mà la e mè me bɔ èghab wɔb ane èghɨ mbɔŋ? 14Wu wuê ndɨ Mbɔ̧ɔ̧mà laꞋnê bòt bu bɔ̀ɔ ntsɔ̀tà Ntu̧ Ntsɔ̧̀ la e bɔ ndɨ bɔ̀ɔ me bɔ ètsəèjɨ wɔb ane ntu̧ mbɔŋ la.
15Ka e mbakà jɨ àbȩ̀ èghɨ bàa mbɨ̀Ꞌɨ̀ mâ wu ejɨ la, è nka mê ngua shɨa letà waa nkɨà nê bɔ̀ ŋa èghɨ ko abua am. Àghɨa a tsiꞋi tè e kele am nê è ngàꞋtà am, e mpfə. 16Lə kǒ ntsě màa me wùꞋtè am ambo na màa ntsɔ̀tà ntu̧ tsɔ̧̀ la. Wu àghɨa mâ bɔ ndɨ màa ghɨ̀ la. Aa li bɨɨ abà am na e mbakà tsɔte Ntu̧ Ntsɔ̧̀ la. 17Mâ ghɨ̀ ale, ngua ngɨ̀à àyaa ane mènkɔ̀ŋke mɔ̧, ko maa bɔ àbȩ̀, ka ndɨ̀ wu màa ka ghɨ ane mènkɔ̀ŋke mɔ̧ la, ko wu Mbɔ̧ɔ̧mà ka tà zǐ àfaꞋa mbɔŋ a tèkitebu taã nê è me ghɨ̀ la. 18Àbȩ̀ am nàa anè ngu ghàà? Àbȩ̀ am wu ndɨ màa ndàꞋà èngǎ̧ Mbɔ̧ɔ̧mà àku, è nka mê ngua nkɨà àghɨa è wù àyaã la ane Ntu̧ Ntsɔ̧̀ yu màa ndàꞋà la.
19Àghɨa ko a ntsě a kuule èbu bɔ̧ ŋa abua wòt ko la, e mbɔ̂ ngɨ̀ am mmɔ̌ mbɔŋ ane àbùꞋ abua wòt ègème, mbɨ̀Ꞌɨ̀ ghɨ̌ bòt bɔ̀ɔ ndzìà mèntɨ̧ɨ̧ mɔb ane Yesò Klistò la aa paa yaã. 20Màa ngɨ̀ è ngu ba Bèjuê, e tsiꞋi me ntsèke mbɨꞋɨ̀ wòt Juê, màa nkɨà mbɨ̀Ꞌɨ̀ ghɨ̌ bɔɔ zì mèntɨ̧ɨ̧ mɔb ane Yesò la. Màa ngɨ̀ è ngu ba bòt bu mbɨ̧tsə te tsèm àwɔb nê mbɨ̀Ꞌɨ̀ bɔ me ghɨ̌ èghɨ ko la, e tsiꞋi me tseke mbɨꞋɨ̀ wòt mbɨ̧ te mbɔŋ tê tsem atò la, ka mmɔ̌ mbɔŋ è nka wua nɔ̀ŋà mbɨ̧tsə, màa ngɨ̀à ale mbɨ̀Ꞌɨ̀ ghɨ̌ bòt bu bɔ̀ɔ nɔ̀ŋà mbɨ̧tsə la aa zì mèntɨ̧ɨ̧ mɔb ane Yesò Klistò la. 21È ngu ba bòt kà wua nɔ̀ŋà mbɨ̧te Musì, e me tseke mbɨꞋɨ̀ wòt kà wua nɔ̀ŋà mbɨ̧te mbɔŋ. E ntsea shua nê maà kà nɔŋe mbɨ̧ Mbɔ̧ɔ̧mà, ka maà ntsèka mbɨ̀Ꞌɨ̀ mbɨ̧ Yesò Klistò nàa nkɨà la. Màa ngɨ̀à ale mbɨ̀Ꞌɨ̀ ghɨ̌ bòt kà wu Bèjuê baa aa zì mèntɨ̧ɨ̧ mɔb ane Yesò la. 22Màa ngɨ̀ è ngu ba bòt bɔ̀ɔ njùa ane ànəa Mbɔ̧ɔ̧mà la, e ntsiꞋi me tseke mbɨ̀Ꞌɨ̀ wekǒ ane yɔb mbɨ̀Ꞌɨ̀ è ngu ghɨ̌ bɔɔ zì mèntɨ̧ɨ̧ mɔb ane Yesò. E ndi ntsìꞋi àghɨ àgème abua wòt ègème, mbɨ̀Ꞌɨ̀ è ngu nɨ balu̧ bàgème betsiꞋa e nko nɨŋ la e ghɨ̌ bòt ko aa peme. 23E ngɨ̀à èghɨ bàagème mbɨ̀Ꞌɨ̀ ghɨ̌ Ntu̧ Ntsɔ̧̀ naa me ghà ne mbì, màa nkɨà mbɨ̀Ꞌɨ̀ è ngu bɔ wɔ̧ ne èghàb ane àbȩ̀ èngǎ̧ mbɔŋ la.
24Bɨ bakà ko laꞋ nê bɔ̀ɔ ngɨ̀ bɔ̀ gha ane àlùùlà, waa waa me lùùla, ka è bɔ̂ ngu wuê wòt wemɔ̀Ꞌ tà jɨ bɔ tsɔꞋɔ atò la? Ale, luula mbɨ̀Ꞌɨ̀ jɨ bɔɔ tsɔꞋɔ awê. 25Wòt ègème tàa ngɨ̀à àlùùlà la nàa ngɨ̀ tà me kuule èntɨ̧ɨ̧ vi ndàna. Bɔ̀ɔ ngɨ̀ bɔ wua ngɨ̀à ale mbɨ̀Ꞌɨ̀ bɔ àbȩ̀ kà wu tseke, ka è wu awa è wu àbȩ̀ àa wu ane àlia nè àlia la. 26Mbɨ̀Ꞌɨ̀ àa ale la, maa kà luula ka ko àtsə, è nka mee ngua nùà mbɨ̀Ꞌɨ̀ wòt tàa ndèbà fo la. 27Ka màa ngɨ̀ e me kuule mbɨ̧̀ ènyit yaã, ŋwèèlà èghɨ èntɨ̧ɨ̧ am e kɨa la ndzia a si, màa ngɨa ale mbɨ̀Ꞌɨ̀ ka e ndàꞋà èngǎ̧ Mbɔ̧ɔ̧mà abua bòt ko, a ghà me lìa Mbɔ̧ɔ̧mà nê e mbakà kùꞋ la.
ទើបបានជ្រើសរើសហើយ៖
1 Kɔlìn 9: mnf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2006, Cameroon Association for Bible Translation and Literacy