1 Kɔlìn 8
8
Ànəa èghɨjɨ bɔ nɨŋ njɨ̀ɨ bènàmbəa la
1È wu ane ànəa èghɨjɨ bɔ nɨŋ njɨ̀a bènàmbəa la, ko baa ko nê, “Bàa gème e ko mènəè.” Wòt nàa nkoa mènəè è me ghɨ̌ tà me ŋeꞋe tèkwȩ ti a ègwet, ka èkɔŋ e me lɔktè mèntɨ̧ɨ̧ bòt. 2Wòt mɨ̀ɨ̀tà nê ye ko àghɨ, ko tà bakà ko mbɨ̀Ꞌɨ̀ tà wuê ko la. 3Ka wòt nàa me kɔ̀ŋka Mbɔ̧ɔ̧mà, Mbɔ̧ɔ̧mà ko a ŋut.
4Ale, è me wu ànəa mànjɨa èghɨ bɔ nɨŋ njɨ̀a bènàmbəa la, ko baà ko nê, “Àghɨa ko a mbê ndâ ntsě mbɨ̀Ꞌɨ̀ nàmbəa,” mè nko nê, “Mbɔ̧ɔ̧mà nàà ndàꞋ wemɔ̀Ꞌ.” 5Èghɨ ko nyaŋ e màà ngu a ègwet kò a sitsǎꞋ leꞋ bòt àa nkùkta nê wu bèmbɔ̧ɔ̧mà bɔb, mè ndzə awɔb wuê mbɨ̀Ꞌɨ̀ bèa la, 6ko abua ya, ba bɔ wuê a Mbɔ̧ɔ̧mà wemɔ̀Ꞌ, tà wu Tǎt wa la. Èghɨ ègème ghɨ̀à tòà, è mè ngu tòà ka tà ghɨ̀ àwa mbɨ̀Ꞌɨ̀ baa wu bòt tò la, ba mè mbɔ a Lefɨ̀Ꞌ wuê wemɔ̀Ꞌ, wù Yesò Klistò la. Tà wu wòt Mbɔ̧ɔ̧mà ghɨ̂ tà nɨ̀ èbu bi ngɨ̀ èghɨ ègème la, è mè ngu tòà ka tà ghɨ̂ baa me ko tseka mbɨ̀Ꞌɨ̀ bòt Mbɔ̧ɔ̧mà la.
7Ka è ntsě wòt ègème tà ko nkûŋ yaa la. Bòt ko e li ngua nkùkta bènàmbəa tè bɔ̀ɔ ngɨ̀ bɔ me kɔ̀ŋkè èjɨ èghɨjɨ bɔ nɨŋ njɨ̀a nàmbəa la. Bɔ̀ɔ ngɨ̀ bɔ̀ jɨ ale, mèntɨ̧ɨ̧ mɔb ka lem fèèlè àwɔb ndɨ̀ wu bɔ̀ɔ njùa la. 8Ba ko nê, èghɨjɨ ntsě àghɨa àa ghɨ̌ baa kùꞋu a mbì Mbɔ̧ɔ̧mà la. Ba bakà jɨ èghɨjɨ, àghɨa ko à ka bu ane ya, njɨ̀a àghɨa ko à ka kweꞋne ane ya.
9Ka bɨ̀ me ko awɨ̧ mbɨ̀Ꞌɨ̀ bɨ bela ngɨ̀à, ngɨ̀ bòt bɔ̀ɔ njùa la e fà̧ ànəê a mbì Mbɔ̧ɔ̧mà. 10Tè wòt yea wê, àwɔ̀ wu à bɔ èyì la, à tseke a lob nàmbəa me jɨ èghɨjɨ la, ko à yu à ka fɨte atò wu èntɨ̧ɨ̧ tò àa njùa la e ghɨ̌ taa jɨ èghɨ bɔ nɨŋ njɨ̀a bènàmbəa la à? 11Èyǐ wè waa e ghɨ̂ à tsòkè wanyɨ wè wòt Mbɔ̧ɔ̧mà, Yesò Klistò li mpfə ambo tò la. 12Àà ngɨa kàbɔ̀ŋ ane wanyɨ wè, ndzìà fɨŋ a èntɨ̧ɨ̧ tò wu àa njùa la ale, ngua ngɨ̀à kàbɔ̀ŋ mbɔŋ ane Yesò Klistò. 13Ale, è wu nê e njɨ̀a èghɨjɨ ko aa ghɨ̌ wanɔ̧ naa ghɨ̌ a kàbɔ̀ŋ, ko è nka tsi lɔ̀Ꞌɔ̀ àlia e kwele nyà̧ a, mbɨ̀Ꞌɨ̀ ka e ngɨ̀ wanɔ̧ ghɨ a kàbɔ̀ŋ.
ទើបបានជ្រើសរើសហើយ៖
1 Kɔlìn 8: mnf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2006, Cameroon Association for Bible Translation and Literacy