МатӀай 20
20
ЦипицӀбагъда кӀвалахзавайбурукай кьиса
1 Цаварин Пачагьлугъ экуьнин кьиляй вичин ципицӀбагъда кӀвалахдай ксар кьаз фейи са касдиз ухшар я. 2КӀвалахайбуруз йикъа са динар гудай меслят хьана, ада абур вичин ципицӀбагъдиз ракъурна. 3Экуьнин сятдин кӀуьдриз хьиз ам базардин майдандилай тӀуз фидайла, адаз ана са карни тийиз акъвазнавай са шумуд кас акуна. 4Ада абуруз лагьана: «Куьнни зи ципицӀбагъдиз алад, квез къведай гьакъи за гуда». 5Абур фена.
Нисинрихъ хьиз ам мад анал фена, гьа виликдай авурвал авуна, ахпа сятдин пудриз хьиз мад хъфена. Адал мадни гьахьтин инсанар гьалтна. 6Сятдин вадриз хьиз ам мад анал хтана, анал акъвазнавай маса инсанар акурла, ада хабар кьуна: «Куьн са карни тийиз югъди инал вучиз акъвазнава?» 7«Чаз садани кӀвалах ганач», – жаваб гана абуру. «Куьнни зи ципицӀбагъдиз алад», – лагьана ада.
8Югъ няни хьайила, ципицӀбагъдин иесиди вичин гъилибандиз эверна лагьана: «КӀвалахайбуруз эверна, эхирдай кьурбурулай эгечӀна эвелдай кьурбурал къведалди виридаз чпин зегьметдин гьакъи це».
9Сятдин вадаз кьур гьар садаз са динар гана. 10Сифте кьурбуру чпиз гзаф гуда лагьана фикирнай, амма абурузни гайиди са динар хьана. 11Гьакъи къачурдалай кьулухъ абуру наразивилелди иесидиз лугьуз хьана: 12«И инсанри кӀвалахайди анжах са сят я, амма вуна абур чахъ галаз сад авуна. Кьилин кӀукӀ кузвай ракъиник кӀвалахар авурбур чун ятӀани, вуна гьакъи виридаз сад хьиз гана». 13«Дуст, за ви хатурдик хкӀурзавач; чун са динардал икьрар хьайибур туширни?» – абурукай садаз жаваб яз лагьана ада. – 14«Жуваз къвезвай гьакъини къахчуна жуван рехъди ахлад; ваз кьванди и эхирдай атайдазни гуз кӀанзава заз. 15Заз жуван кӀвале жуваз кӀандайвал ийидай ихтияр авачни мегер? Я тахьайтӀа зи гъилин ахъавал акваз ви вил къаних хьанвани?»
16Гьа икӀ исятда кьулухъ галайбур вилик жеда, вилик квайбур – кьулухъ.
Исади Вичин кьиникьикай пуд лагьай гъилера лугьун
(Марк 10:32-34; ЛукӀа 18:31-33)
17Ярусалимдиз фидай рекье Исади Вичин цӀикьвед тилмиздиз са къерехдиз эверна, лагьана:
18– Ингье, чун Ярусалимдиз физва, Инсандин Хва хаинвилелди чӀехи хахамринни тавратдаррин гъиле твада, абуруни Ам кьиникьиз акъудда. 19Ам римвийрин гъиле твада. Абуру, ягьанатар авуна, гатана, Ам хашуниз яда. Пуд лагьай юкъуз Адал чан хкведа.
Якьубанни Ягьядин дидедин тӀалабун
(Марк 10:35-45; ЛукӀа 22:24-27)
20Гьа арада Исадин патав вичин рухваярни галаз Зебедеян паб атана, Адавай са вуч ятӀани тӀалабиз кӀанз, Адаз икрам авуна. 21Исади адавай хабар кьуна:
– Ваз вуч кӀанзава?
– Ви Пачагьвал алукьайла, къуй и зи кьве хцикай сад Ви эрчӀи патавай, муькуьдини чапла патавай ацукьрай, – лагьана Ада.
22Амма Исади лагьана:
– Куьне тӀалабзавайдакай квез хабар авач. За чӀугвазвай азаб квевай чӀугваз жедани?
– Жеда, – жаваб гана абуру.
23– Зи гъам-пияла куьнени хъвада, амма Зи эрчӀи ва чапла патаривай ацукьун – ам Завай ихтияр гуз жедай кӀвалах туш – лагьана Исади. – А чкаяр Зи Бубади низ тайинарнаватӀа, гьабурунбур я.
24И гафарин ван хьайила, амай цӀуд илчидиз кьве стхадикай гзаф хъел атана. 25Исади абур кӀватӀна лагьана:
– Вири халкьарихъ гуждалди агъавал ийизвай вилик-кьилик квай инсанар ава, вири халкьарал чӀехи ксари гьакимвал ийизва. Квез и кар чида. 26Амма куь арада акӀ тахьурай: куь арадай низ вилик-кьилик жез кӀанзаватӀа, къуй ам куь кьилел-кӀвачел элкъуьрай. 27Куь арада низ сад лагьай чкадал жез кӀанзаватӀа, гьам квез лукӀ хьун лазим я. 28Гьа икӀ Инсандин Хвани Вичиз масадбуру къуллугъ авун патал ваъ, Вич масадбуруз къуллугъ ийиз атанвайди я. Ам, гзафбурун гунагьрилай гъил къахчун патал, Вичин чан эцигиз атанвайди я.
Кьве буьркьуьди сагъар хъувун
(Марк 10:46-52; ЛукӀа 18:35-43)
29Исани тилмизар Еригьандай хъфизвайла, абурун гуьгъуьна аваз гзаф халкь къвезвай. 30Ингье, рекьин къерехдив ацукьнавай кьве буьркьуьда, Иса чпин виликай физвайдакай ван хьайила, гьарайиз хьана:
– Чаз регьим ая, Агъа, Давуд пачагьдин Хва!
31Гзафбуру абуруз лал хьухь лагьана, амма абуру амайдалайни кӀевиз гьараярна:
– Чаз регьим ая, Агъа, Давуд пачагьдин Хва!
32Исади, акъваз хьана, абуруз Вичин патав эверна.
– Квез Завай вуч кӀанзава? – хабар кьуна Ада.
33– Я Агъа, чаз Вуна чи вилер сагъар хъувуна кӀанзава, – лагьана абуру.
34Исади, абурун язух атана, абурун вилерик гъил кяна. Гьасятда абурун вилериз экв хтана. Абур Исадин гуьгъуьна гьатна фена.
ទើបបានជ្រើសរើសហើយ៖
МатӀай 20: ЛезПК
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2010-2024
