МатӀай 19
19
Паб гъуникайни рахкуруникай
(Марк 10:1-12)
1Ийизвай ихтилатар куьтягьайдалай кьулухъ, Иса Галилейдай экъечӀна, Ярдан вацӀун муькуь патай яна Ягьудатдиз фена. 2Адан гуьгъуьна аваз гзаф халкь атана, Ада абур гьана сагъар хъувуна. 3Адан патав фарисеяр атана, Ам синагъ авун патал, хабар кьуна:
– Акатай гьар са кардиз килигна гъуьлуь паб рахкурун дуьз кар яни?
4– Квез чизвачни кьван, Халикьди сифтени-сифте итимни паб арадал гъана, – жаваб гана Ада 5-6ва давамар хъувуна:
– Гьавиляй, дидени буба туна, итимдикайни папакай сад жеда. Абур кьве чан ваъ, са чан жеда. Гьа икӀ, Аллагьди сад авурбур инсанди чара авун лазим туш.
7Абуру хабар кьуна:
– Бес вучиз Мусади «тӀалакьар вахганва лагьай чар кхьена чара хьухь»#Киххьей Къанун 24:1, 3. лагьана ихтияр ганай?
8– Ада, куь туькьуьл рикӀер акурла, папахъ галаз чара жедай ихтияр гана, амма сифтедай акӀ тушир, – жаваб гана Исади. – 9За квез лугьузва хьи, гьи касди, явавал ийизвачир вичин папахъ галаз чара хьана, масад гъайитӀа, ада зинавал ийизва.
10 Тилмизри Адаз лагьана:
– Папан вилик гъуьлуьн хиве авай буржар гьахьтинбур ятӀа, паб тагъана амукьайтӀа хъсан я.
11– Нивай хьайитӀани а кар кьабулиз жедач, ам анжах Аллагьди низ ганватӀа, гьада кьабулда, – лагьана Ада. – 12Дидеди хайи чӀавалай чеб худумар тир ва гьавиляй паб гъиз тежезвай итимар ава; хеси авунвай итимар ава; гьакӀни Цаварин Пачагьлугъдин хатурдай паб гъиз кӀанзавачир итимарни ава. Нивай и гафар кьабулиз жедатӀа, гьада абур кьабулрай.
Исади аялриз хийир-дуьа авун
(Марк 10:13-16; ЛукӀа 18:15-17)
13Гьа чӀавуз Исадин патав, Ада кап алтадна хийир-дуьа авун патал, аялар гъана, амма тилмизри абуруз туьгьметар ийизвай. 14И кар акур Исади лагьана:
– Аялар секиндиз тур, аялриз Зи патав атуниз манийвал гумир, вучиз лагьайтӀа Цаварин Пачагьлугъ гьахьтинбурунди я.
15Ада абурал кап алтадна, ахпа Ам анай хъфена.
Девлет авай жегьил
(Марк 10:17-31; ЛукӀа 18:18-30)
16Са касди атана Исадивай хабар кьуна:
– Я Муаллим, эбеди уьмуьр хьун патал, за гьихьтин хъсан крар авун лазим я?
17– Вуна Завай хъсанди вуч я лагьана вучиз хабар кьазва? – лагьана Исади – Хъсанди анжах са Аллагь я. Ваз эбеди уьмуьр кӀанзаватӀа, Аллагьдин тагькимар кьилиз акъуд.
18– Гьи тагькимар? – мад хабар кьуна а касди.
– «Ягъна рекьимир, зинавал ийимир, чуьнуьхмир, тапан шагьидвал ийимир, – лагьана Исади. – 19Жуван диде-бубадин хатур-гьуьрмет хуьх»#ЭхкъечӀун 20:12-16; Киххьей Къанун 5:16-20.. «Жув хьиз жуван мукьув гвайдини кӀан хьухь»#Леви 19:18..
20– Абур вири за кьилиз акъудзава, заз вуч кимизва? – лагьана жегьил гадади.
21– Ваз камал авай инсан жез кӀанзаватӀа, алад, фена вахъ вуч аватӀа, гьабур маса гана, кесибриз пая, гьа чӀавуз вахъ цавара хазинаяр жеда. ГьакӀ авурла, захъ галаз ша, – жаваб гана Исади.
22И гафар ван хьайила, жегьил пашмандаказ хъфена, вучиз лагьайтӀа, адахъ зурба девлет авай.
23Исадини Вичин тилмизриз лагьана:
– За квез рикӀивай лугьузва: девлет авайбуруз Цаварин Пачагьлугъдиз гьахьиз гзаф четин я хьи! 24Мадни За квез лугьуда: девлет авайдаз Цаварин Пачагьлугъдиз гьахьунилай деведиз рапунин хъуькъуьмдай экъечӀун регьят я.
25И гафар ван хьайила, Адан тилмизри, гзаф мягьтел хьанва, хабар кьуна:
– АкӀ хьайила, бес нивай вич хилас ийиз жеда?
26Абуруз килигна, Исади лагьана:
– Инсанрилай а кар алакьдач, амма Аллагьдилай алакьдачир затӀни авач.
27Адаз жаваб яз Петруди лагьана:
– Ингье, вири туна, чун ви гуьгъуьна аваз атана; бес икӀ авунай чаз вуч гуда?
28– За квез рикӀивай лугьузва: цӀийи дуьньяда Инсандин Хцикай тахтуна нурни баркалла алай пачагь хьайила, куьн Исраилдин цӀикьвед тайифадин гьахъ-дуван ийиз цӀикьвед тахтуна ацукьда, – лагьана Исади. – 29Зи хатурдай вичин кӀвалерилай, стхайрилай, вахарилай, бубадилай, дидедилай, аялрилай, мулкарилай гъил къачурбурукай вишра артух гьа мал-девлет гьалт тийидай садни амукьдач, абур эбеди уьмуьрдин иесияр жеда. 30Исятда вилик квай гзафбур кьулухъ жеда, кьулухъ галайбур – вилик.
ទើបបានជ្រើសរើសហើយ៖
МатӀай 19: ЛезПК
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2010-2024
