МатӀай 15
15
Михьиди ва чиркинди
(Марк 7:1-23)
1Ахпа Исадин патав Ярусалимдай фарисеярни тавратдарар атана, Адаз лагьана:
2– Вучиз Ви тилмизри чи бубайрин адетрал амалзавач? Фу недайла, абуру чпин гъилер чуьхуьзвач.
3– Вучиз, квез адет хьанвай къайдаяр хуьн патал, куьне Аллагьдин тагьким чӀурзава? – жаваб гана Ада. – 4Аллагьди лагьанва: «Жуван дидедизни бубадиз гьуьрмет ая»#ЭхкъечӀун 20:12; Киххьей Къанун 5:16., «Дидедикайни бубадикай чӀурукӀа рахадайдан жаза кьиникь я»#ЭхкъечӀун 21:17.. 5-6Амма куьне лугьузва: «Инсанди вичин бубадиз ва я дидедиз „За вав вахгана кӀанзавай бурж за Аллагьдив ахгакьарда“ лагьайтӀа, адаз диде-бубадиз гьуьрмет тийидай ихтияр ава». Гьа идалди куьне Аллагьдин гафар куь адетралди эвез ийизва. 7Кьве чин алайбур! Яшая квекай хъсандиз лагьанай: 8«И инсанри мецелди Заз гьуьрмет ийизватӀани, рикӀелди абур Завай яргъа я. 9Абуру Заз ийизвай ибадат гьаваянди я – инсанар абуру Зи тагькимрал ваъ, чпи арадиз гъайи къайдайрал амал ийиз вердишарзава»#Яшай 29:13..
10-11Исади халкь Вичин патав кӀватӀна, лагьана:
– За лугьузвай гафариз хъсандиз яб гана, гъавурда акьукь: инсандин сивиз атайда ам чиркин ийизвач, ам чиркин ийизвайди сивяй акъатайди я.
12Гьа чӀавуз тилмизар Адан мукьув атана:
– Ви гафари фарисейрик хъел кутунвайди чаз чизва, – лагьана абуру.
13– Цавараллай Зи Бубади кутун тавур гьар са экъечӀай набатат кӀаняй акъатна терг жеда – жаваб гана Исади. – 14Хъфирай абур; абур буьркьуьбурун буьркьуь регьберар я; буьркьуьда буьркьуьдаз рехъ къалуриз хьайитӀа, абур кьведни фуруз аватда.
15– И кьисадин манадин гъавурда чун тур, – лагьана Адаз Петруди.
16– Куьн адан гъавурда гьелени акьазвачни? – лагьана Исади. – 17Бес квез чизвачни, сивиз атайди къенез физва, къеняйни ам къецел акъатзава. 18Сивяй акъатзавайди – рикӀяй акъатзавайди я, инсан чиркинни ийизвайди гьам я. 19РикӀяй къвезвайбур чӀуру ниятар, кьиникьар, зинавилер, явавилер, чуьнуьхунар, тапан шагьидвилер, буьгьтенар я. 20Ибуру вирида инсан чиркин ийизва, амма чуьхуьн тавур гъилерив тӀуьни инсан чиркин ийидач.
Чувуд тушир папан иман
(Марк 7:24-30)
21Гьанай экъечӀна Иса Туьрсни Сидун галай патарихъ фена. 22Адан патав и чкайра уьмуьр тухузвай са къенанви#15:22 Къенанвияр чувудар къведалди Фелистинда авай халкь тир. Абурун са пай гьана амукьнай, чувудри абур чпикай яз кьазвачир. паб атана, гьарайиз эгечӀна:
– Заз регьим ая, я Агъа, я Давуд пачагьдин Хва, зи руш жинерри дили ийизва.
23Исади жаваб ганач. Тилмизар Адан патав атана, минетиз хьана:
– Ам рахкура! Ада, датӀана чи гуьгъуьна гьатна, гьараяр ийизва.
24– Зун анжах хипер хьиз рекьелай алатнавай Исраилдин халкьдин патав ракъурнавайди я, – жаваб гана Ада.
25А папа, Адан патав атана, икрам авуна лагьана:
– Я Агъа! Вакай са чара!
26– Аялривай фу къакъудна кицӀериз вегьин хъсан кар туш, – жаваб гана Ада.
27– Вун гьахъ я, я Агъа! – лагьана папа. – Амма кицӀерини чпин агъайрин суфрадилай аватай гъвелер неда.
28– Эй, вах, вахъ зурба иман ава, – лагьана адаз Исади. – Гьа ваз кӀанивал хьурай!
Адан руш гьасятда сагъ хъхьана.
Кьуд агъзур кас тухарун
(Марк 8:1-10)
29Гьанай хъфена, Иса Галилейдин вирин къерехдал атана. Гьанилай Ам пелел хкаж хьана, гьанал ацукьна. 30Адан патав кьецӀибур, буьркьуьбур, набутбур#15:30 Набут – бедендин са ва я са шумуд пай, месела, гъил, кӀвач сагъ тушир кас., лалбур ва масабур галаз гзаф инсанар къвез хьана. Гъана ахьтин инсанар Исадин кӀвачеривай эцигдай, Ада абур сагъардай. 31Лалбур рахаз, набутбур сагълам жез, кьецӀибур къекъвез, буьркьуьбуруз акваз акур халкь мягьтел хьана. Абуру Исраилдин Аллагьдиз шукур авуна.
32Исади Вичин тилмизриз эверна, лагьана:
– Пуд юкъуз Зи патав гвай инсанрин язух къвезва Заз: абуруз недай затӀни авач. Заз абур тӀуьн тагана чпин кӀвалериз ахъайиз кӀанзавач, абур рекье гьалдай фин мумкин я.
33– Икьван гзаф халкьдиз хелвет чкада акьван фу чна гьинай гъида? – хабар кьуна тилмизри.
34– Квев гьикьван фу гва? – жузуна Исади.
– Ирид фуни са тӀимил кьван кӀезрияр, – жаваб гана абуру.
35Ада халкьдиз чилел ацукьун эмирна. 36Ирид фуни гьуьлуьн гъетер къачуна, хийир-дуьа ийиз-ийиз, фар кӀар-кӀар авуна Вичин тилмизрив вугана. Тилмизри абур халкьдиз пайна. 37ТӀуьна вири тух хьана: амай кӀусар кӀватӀна, ирид зимбил ацӀурна. 38Папарни аялар квачиз, фу тӀуьрбур вири кьуд агъзур кас хьана.
39Халкь ахъайна, Ам луьткведа аваз Магъадан галай патарихъ фена.
ទើបបានជ្រើសរើសហើយ៖
МатӀай 15: ЛезПК
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2010-2024
