МатӀай 14
14
Ягья пайгъамбардин кьиникь
(Марк 6:14-29; ЛукӀа 9:7-9)
1Гьа чӀавуз Галилейдин пачагь Гьирудал Исадикай хабарар агакьна. 2Ада Исадикай вичин къуллугъдарриз лагьана:
– Ам Ягья пайгъамбар я, ам кьейидалай кьулухъ чан хтайди я, гьакӀ хьайила, адалай аламатарни алакьзава.
3Гьа и Гьируда вичин стха ФилипӀан паб Гьирудат къахчурла, Ягья кьуна къазаматда тун эмирнай, 4куьз лагьайтӀа, Ягьяди адаз лугьуз хьанай:
– Ам къахчун гьарам я.
5Гьирудаз ам рекьиз кӀанзавай, амма халкьди Ягья пайгъамбар яз кьуниз килигна, адаз халкьдихъай кичӀе тир.
6Гьирудан хайи югъ къейддай чӀавуз, Гьирудатан руша кӀватӀ хьанвайбурун вилик кьуьлзавай. Гьирудаз адан кьуьл рикӀиз чими хьанай. 7Ада рушаз вуч кӀан хьайитӀани кьилиз акъудда лагьана кьин кьунай. 8Руша вичин дидедин гафариз килигна лагьанай:
– Заз гьа исятда вуна Ягья пайгъамбардин кьил синида аваз гъана кӀанзава.
9Гьируд пачагь гзаф пашман хьанай, амма вичи мугьманрин вилик гайи кьин кьилиз акъудун патал, ада а кар авун эмирнай. 10Ада, гьасятда аскер ракъурна, Ягьядин кьил атӀун эмирнай. 11Инсанри, фена, къазаматда авай Ягьядин кьил атӀанай, синидал алаз гъанай, рушав вуганай. Рушани кьил вичин дидедин патав тухванай. 12Адалай кьулухъ Ягьядин тилмизар атана, адан мейит къахчуна тухвана кучукнай. Ахпа фена хьайидакай Исадиз ихтилатнай.
Вад агъзур кас тухарун
(Марк 6:32-44; ЛукӀа 9:10-17; Ягь. 6:1-13)
13Исадал а хабар агакьайла, ам анай луьткведа акьахна, амукьун патал са хелвет чкадиз текдиз фена. Амма халкьдиз а кардикай хабар хьайила, абур кӀвачи-кӀвачи чпин шегьеррай атана, Адан гуьгъуьна гьатна. 14Луьткведай эвичӀна килигайла, Исадиз гзаф халкь кӀватӀ хьанваз акуна. Адаз абурун язух атана ва Ада азарри кьунвайбур сагъарна.
15Югъ няни хьайила, тилмизар Адав агатна:
– Вахтни геж я, инагни хелвет чка я, – лагьана абуру. – Вуна абур ахъая. Абуру фена патарив гвай хуьрерай чпиз недай затӀар къачурай.
16– Халкь фин герек туш, куьне абуруз тӀуьн це, – лагьана Исади.
17– Чахъ ина авайди вад фуни гьуьлуьн кьве гъед я, – лагьана абуру.
18– Абур зи патав гъваш, – лагьана Исади.
19Халкьдиз векьел ацукь лагьана, Ада вад фуни кьве гъед къачуна, цавуз килигна, хийир-дуьа галаз, фу кӀар-кӀар авуна, Вичин тилмизрив инсанриз паюн патал вугана. 20ТӀуьна вири тух хьана; амукьай фан кӀусарай цӀикьвед зимбил ахцӀурна. 21Папарни аялар квачиз фу тӀуьрбур вад агъзур кас кьван авай.
Иса целай фин
(Марк 6:45-51; Ягь. 6:16-21)
22Ахпа Исади, Вичи инсанар ахъай тавунмаз, тилмизриз луьткведа акьах лагьана ва абур Галилейдин а патаз Вичелай вилик ракъурна. 23Инсанар ахъайна, Ам Вич дуьаяр ийиз пелел хкаж хьана. Нянизни Ам ана ялгъуз амукьна.
24Тилмизар авай луьткве къерехдивай яргъаз акъатнавай. Луьткве лепейри гатазвай, гарни луьткведиз аксиди тир. 25Экв жедай кьиляй Иса вирелай тӀуз абур галай патахъ фена. 26Вирелай тӀуз къвезвай Иса акурла, чпиз и кар карагзавайди хьиз хьана, тилмизрай кичӀела гьарай акъатна.
27– КӀевиз акъваз, – лагьана абуруз гьасятда Исади, – Ам Зун я, кичӀе жемир.
28– Я Агъа! – жаваб гана Петруди. – Ам Вун ятӀа, заз Ви патав целай къведай эмир це!
29– Ша, – лагьана Исади.
Петру луьткведай эвичӀна Исадин патав целай тӀуз фена. 30Амма къати гар хьуниз килигна, Петрудиз кичӀе хьана. Вич цик акатиз акурла, ада гьарайна:
– Я Агъа! Зун хилас ая!
31Исади гьасятда гъил вегьена, ам кьуна лагьана:
– Иманда зайифди! Вуна шак вучиз ийида?
32Абур луьткведа акьахайла, гар секин хьана. 33Луьткведа авай тилмизар, Адав агатна ва икрам авуна:
– Вун рикӀивайни Аллагьдин Хва я, – лагьана абуру.
34Абур вирелай тӀуз фена Генисаратдин чилерал атана. 35Чкадин агьалийриз Иса чир хьайила, абуру кьуд патаз Ам атанвайдакай хабарна. Инсанри азарар квай чпинбур Адан патав гъиз хьана. 36Вирида Вичин пекерин ценцин цӀирхиник азарри кьунвайбурув са тӀуб кьванни кягъиз тур лугьуз, Адаз минетзавай. Адак гъил хкӀурбур дири хъжезвай.
ទើបបានជ្រើសរើសហើយ៖
МатӀай 14: ЛезПК
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2010-2024
