МатӀай 11
11
1 Исади Вичин цӀикьвед тилмиздиз чирвилер гана куьтягьайла, Ам анай экъечӀна къунши шегьерриз чирвилер гуз ва вязер ийиз фена.
Ягья пайгъамбардин тилмизар
(ЛукӀа 7:18-35; 16:16)
2Къазаматда авай Ягьядиз Месигьдин крарикай ван хьайила, вичин тилмизрикай бязибур Исадин патав ракъурна.
3– Атана кӀанзавай Месигь Вун яни, я тахьайтӀа чна масад вилив хуьдани? – хабар кьуна абуру Исадивай.
4– Ягьядин патав хъфена, квез акурдакайни ван хьайидакай лагь, – жаваб гана Исади, – 5буьркьуьбуруз цӀийи кьилелай аквазва, кьецӀибур кӀвачел ахкьалтзава, жузам квайбур михьи хъжезва, бишибуруз ван хквезва, кьейибурал чан ахкьалтзава, саилризни Шад Хабардин ван къвезва. 6Зал шак тегъизвай кас бахтавар я.
7Ягьядин тилмизар хъфейла, Иса Ягьядикай халкьдиз ихтилатар ийиз эгечӀна:
– Куьн кьурумдиз куьз тамашиз фенвай? Гару юзурзавай нацӀариз килигиз фейиди яз тахьуй гьа? 8ГьакӀ туштӀа, бес куьн куьз килигиз фенвай? Багьа пекер алукӀнавай инсандиз килигиз фенвайни? ЧӀагай пекер алукӀна кеф чӀугваз уьмуьр тухузвайбур пачагьдин утагъра жеда. 9АкӀ хьайила, куьн куьз килигиз фенвайбур тир? Пайгъамбардиз? Эхь, лугьузва за квез. Ам пайгъамбардилайни вине авайди я. 10Адакай Каламда икӀ кхьенва: «Килиг! Валай вилик За Зи чархачи ракъурзава, ада Ви вилик Ви рехъ гьазурда»#Малахи 3:1.. 11За квез рикӀивай лугьузва: папа ханвайбурун арада Ягья пайгъамбардилай зурбади авач, амма Цаварин Пачагьлугъда авай виридалайни агъади гьа Ягья пайгъамбардилайни вине жеда.
12Ягья пайгъамбарди инсанриз цик акахьун къачу лагьай йикъарилай эгечӀна къенин йикъал къведалди инсанри Цаварин Пачагьлугъдихъ галаз акси дяве тухузва, ам кьаз кӀанзава #11:12 И аят мад са жуьреда таржума ийиз жеда: «Ягья пайгъамбарди инсанриз цик акахьун къачу лагьай йикъарилай эгечӀна къенин йикъал къведалди инсанар Цаварин Пачагьлугъдиз физ кӀанз алахънава. И кар кьилиз акъатун патал, вичин вири къуватар эцигзавайди аниз финни ийизва». 13Мусади вичин Къанунда ва пайгъамбарри Ягья къведалди пайгъамбарвилин гафар лугьузвай. 14Квез абурун гафарин чӀалахъ жез кӀанзаватӀа, квез чир хьухь хьи, Ягья Месигьдилай вилик атана кӀанзавай гьа Ильяс я! 15Нихъ япар аватӀа, гьадаз ван атурай!
16Чи девирдин инсанар За нив гекъигда? Абур аялриз ухшар я. Аялри, базардин майдандал къугъвадайла, сада садаз лугьуда:
17– Чна квез кфилдай макьамар ягъайла, куьне кьуьлерначир; чна кьейибурухъ лугьунар авурла, куьн шехьначир.
И девирдин инсанар гьакӀ я. 18Гила Ягья атанва, ада я фу незвач, я чехир хъвазвач, амма инсанри: «Адак чӀуру жин ква», – лугьузва. 19Инсандин Хва атанва – Ада ненни ийизва, хъунни. Ам акур инсанрини лугьузва: «ХупӀ тӀуьнрални хъунрал рикӀ алай кас тушни, Вични харж кӀватӀдайбурунни гунагькаррин тай-туьш хьанва!»
Аллагьдин Камалди ийизвай вири крар Вич гьахъ-михьиди яз къалурзава.
Исадин туьгьмет
(ЛукӀа 10:13-15)
20Исади гзаф шегьерра Вичин аламатар къалурнайтӀани, шегьерра авай агьалияр Аллагьдин рекьел къвезвачир. Гьавиляй Исади абуруз туьгьметар ийиз хьана.
21– Ваз жедайди гуж я, Харазин шегьер! – лагьана Ада. – Вазни жедайди гуж я, Бетсаид шегьер! Куьна хьайи хьтин аламатар Туьрс ва Сидун шегьерра хьанайтӀа, а шегьеррин агьалияр, шихин пекер алукӀна, кьилелай руьхъ алахна, Аллагьдин рекьел къведай. 22ГьакӀ хьайила, за квез лугьузва: Къияматдин юкъуз квез гудай жазадилай Туьрсдизни Сидундиз гайи Аллагьдин жаза кьезилди жеда. 23Вазни, Кефернагьум, вун цавариз хкаждайди хьиз авани? Ваъ, вун ирид чилерин кӀаник вегьида! За ваз авур аламатар Садумда авунайтӀа, а шегьер къенин йикъалди амукьдай. 24ГьакӀ хьайила, За ваз лугьузва хьи, Къияматдин юкъуз Садумдиз валай хъсан жеда!
Исади Бубадиз шукур авун
(ЛукӀа 10:21-22)
25Гьа чӀавуз, Вичин ихтилат давамарна, Исади лагьана:
– Ваз шукур хьурай, Буба, цаваринни чилин Ребби, Вуна акьулни къанажагъ авайбурукай чуьнуьхнавай сир гъвечӀи аялриз ахъайна. 26Эхь, Буба, ам Ви регьим галай къаст тир. 27Зи Бубади Заз вири ганва. Хва вуж ятӀа Бубадилай гъейри садазни чидач; Буба вуж ятӀа Хцелай гъейри садазни чидач. Хцизни Ам низ чириз кӀан хьайитӀа, гьадазни чир жеда.
28Залан парцикай галатнавайбур ва куьцӀенвайбур вири Зи патав ша, За куьн секинарда. 29Заз табийвал ая ва Зи несигьатар яхъ. Зун милайим я ва Зи рикӀни умун я. Куь рикӀерни архайин жеда. 30Заз табий хьун регьят я ва За квел эцигай парни кьезилди жеда.
ទើបបានជ្រើសរើសហើយ៖
МатӀай 11: ЛезПК
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2010-2024
