NAHUMU 2
2
Kughwa kwa Nineve
1Nineve, Mtoteshi waawuyacha kukukaba!
Lindia ngome. Kuzighaneghe chia rako.
Kukuwike nicha kwa wuda.
2(BWANA waawuyawiwunjira Israeli wubaa ghwawo,
sa iji werekoghe imbiri wisesokelo na kunonwa ni wamaiza.)
3Ngao ra masikari gha wamaiza ni ra ngundu,
nawo weerwa nguwo rifwanane ra ngundu;
magare ghikapangwa, ghiaaka-aka sa lumu lwa modo;
farasi rawo riarama-rama.
4Magare ghiaida na iseghe chienyi;
ghiaenda iichia na iichia kiwachenyi;
ghiaaka sa tochi;
ghiaida sa luhehia.
5Wabaa wa majeshi waawuyawangwa;
waawuyaghenda imbiri wikikuwa,
washashira kuvika wurighenyi,
na kuwika kighirio chetangala mtambo ghovuchua wurigha.
6Mbenge ra cha modenyi rarughuka,
wandu wa ngomenyi ya mzuri wangilwa ni wowa.
7Malkia wadwalwa wunyika,
wadumiki wake walila sa mbughi na kukukaba lagha.
8Wandu waawuyakimbia kufuma Nineve sa kiriwa chavunguka machi;
wandu wiakema, “Kaduu, Kaduu!”
ela mndungi ndewuyezighana nanyuma.
9Shoonyi feza, shoonyi dhahabu.
Mali iyo ndeisiagha;
wuzuri ghufumagha kwa kula kindo cha zoghori mbaa.
10Nineve yatoteshwa, yakimbilwa na kusighwa nduu;
Wandu wafwa ngolo kwa wowa,
vitemberu vawo viasughusika na ndighi rawo rasia,
na mawushu ghaghaluka gha mshashu.
11Ugho muzi ghorekoghe sa mruma ghwa shimba ghoko hao,
iyo mbanga ya wana wa shimba,
andu shimba ya womi na ya waka rerekoghe rikireda madiwo ghawo,
andu wana wake werekoghe wiseoboshwagha ni mndungi?
12Shimba erekoghe ikibwagha madiwo ghake,
na kudumbua vipande vipande kwa wundu ghwa shimba ya waka na wana wake;
ikachura mbanga madiwo ghake,
na nyama rirashulo-rashulo mirumenyi kwake.
13BWANA Uo-Uwadie-Ndighi-Rose waghamba, “Ini ne m'maiza wako;
nichakora magare ghako. Masikari ghako ghichabwaghwa wudenyi, nani nichawusa kula kilambo kusokie wandu wazima.
Lwaka lwa wadumwa wako
ndeluchaasikirika sena anduangi.”
ទើបបានជ្រើសរើសហើយ៖
NAHUMU 2: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.