MARKO 5
5
Jesu kum'boisa mundu uko na pepo ra makakala
(Mat. 8.28-34; Lk. 8.26-39)
1Nao wikabusa chija kimonu cha ndiwa, isanga ja Wagerasi. 2Hata iji Jesu wameria kufuma ishuonyi, ahoeni ukakwana na mndumu wafuma makaburinyi, uko na pepo ya makakala. 3Wulalo ghwake ghorekoghe makaburinyi, nao ndekorekoghe na mndungi udimagha kumfunga hata na mnyororo ghoni anduangi. 4Kalazi koni orefungiloghe na pingu na minyororo, iyo minyororo ukaidumbua na iro pingu ukairibara putu, hata mndungi nderewadieghe ndighi remmazira anduangi. 5Na matuku ghose, kio na dime, orekoghe makaburinyi na chughongonyi ukikema mchungu na kukudema-dema moni na shangado.
6Iji wammbona Jesu kula koni, ukamghendia na iseghe, ukamtasa; 7ukakema na lwaka lubaa ukighamba, “Nawadieki kwako Jesu Mwana wa Mlungu Uko-Aighu-Nandighi? Nakuvoya kwa irina ja Mlungu, kusakenitirira!” 8(Oreghorieghe huwo angu Jesu oremzerieghe, “Fuma kwa uhu mundu, oho pepo ya makakala.”)
9Nao Jesu ukamkotia, “Irina jako nani?” Ukatumbulia, “Irina japo ni ‘Ijeshi’, angu deko wengi.” 10Ukamvoya Jesu nandighi usakeriwinga pepo noko shighadi ya isanga jija. 11Ajaeni lughongonyi korekoghe na nguwe nyingi rikija. 12Rija pepo rikamvoya Jesu, “Kudidume kwa nguwe dipate kuringia.” 13Nao ukarirumiria. Na pepo ra makakala rikafuma na kuringia nguwe; naro rose, sa elfu iwi huwu, rikashorodoka nokoisi, rikangia ndiwenyi na rose rikafwa.
14Walisha wikakimbia, na kueresha malagho ghaja mizinyi na mbuwenyi. Wandu wikacha kuwona iro maza rerebonyekieghe. 15Wikamghendia Jesu, wikammbona uja mundu orekoghe na ijeshi ja pepo uko kidombo, urwae nguwo, sena uko na akili rake nicha, wikaobua. 16Awo werewonieghe wikawija wandu malagho gha iro rerempatireghe uja mundu orekoghe na pepo, na malagho gha nguwe wori. 17Niko wikazoya kumvoya Jesu ufume isanga jawo.
18Nao iji Jesu orekoghe ukingia ishuonyi, uja mundu orekoghe na pepo ukamlomba wighendanye. 19Ela Jesu ukamleghia ukimzera, “Ghenda nyumbenyi kwa wandu wako, kuwighorie malagho gha iro maza mbaa Bwana wakubonyera, na seji orekufuyeghe wughoma.” 20Na uja mundu ukaghenda, ukazoya kueresha isangenyi jose ja Dekapoli agho malagho mabaa Jesu orem'bonyereghe, na wandu wose wikashinika.
Mnjighe wa Jairo na muka umu kuboiswa
(Mat. 9.18-26; Lk. 8.40-56)
21Nao iji Jesu waruwuka kimonu sena kwa ishua, izungu ibaa jikamkwanyikia, nao moni ukakaia mbai na mbai ya ndiwa. 22Na m'baa umu wa sunagogi uwangwagha Jairo ukamchea, hata iji wammbona Jesu, ukaghwa maghunyi kwake, 23ukimvoya nandighi ukighamba, “Mnjighe wapo oko kaavui na kufwa. Nakulomba kuche, kummbikirie mikonu yako, uboo ukaie moyo.” 24Niko Jesu ukaghendanya nao, na izungu ibaa jikamnugha, jikimtindiria.
25Korekoghe na muka umu orekoghe ukija wasi kwa kufumwa ni bagha miaka ikumi na iwi, 26hata ngera orekoghe ukirighitwa ni waghanga wengi, na kufunya mali rake rose, wukongo ghwake ndeghoreboieghe anduangi, ela ghukachurikia. 27Uendasikira wuvoro ghwa Jesu, ukacha nyuma yake andenyi izungunyi, ukamuadada nguwo yake. 28Angu oreghambieghe, “Ngamuadada hata nguwo cheni, nichaboa.”
29Nao ahoeni ndoria ya bagha yake ikaoma, ukasikira mumbinyi kwake angu waboiswa wukongo ghwake. 30Na Jesu, ukimanya andenyi kwake angu ndighi ramfuma, ukajighalukia jija izungu, ukaghamba, “Welee, nani waniadada nguwo rapo?” 31Wanughi wake wikamzera, “Welee, kwawona izungu seji jakutindiria, sena kuakotia, ‘Nani waniadada nguwo rapo?’”
32Ela Jesu ukachuria kuzighana chia rose, ummbone uo orebonyereghe ilagho ijo. 33Niko uja muka ukimanya seji orebonyeroghe, ukacha, ukaghwa imbiri kwake ukiobua na kusughusika, ukamghoria loli rose. 34Jesu ukamzera, “Mwai, irumirio jako jakuboisa. Ghenda na sere, kuboo putu wukongo ghwako.”
35Hata iji orekoghe ukideda, wikacha wandu wafuma kwa Jairo, uja m'baa wa sunagogi, wikighamba, “Kusakesindamjisha Mwalimu wasi. Mnjighe wako wafwa.” 36Ela Jesu, ukighimanya ghaja gherekoghe ghikighorwa, ukamzera uja m'baa wa sunagogi, “Kusakeobua, rumiria tu.” 37Nao ukalegha mndungi usakemnugha ela Petro, Jakobo, na Johane, mruna Jakobo. 38Hata iji wavika nyumbenyi kwa uja m'baa wa sunagogi, Jesu ukawona wandu wengi wikibonya nganyi, wikikema na kulila. 39Ukangia andenyi ukawizera, “Welee, kwaki m'bonyagha nganyi na kulila? Mwana ndefue anduangi, ela waalala.” 40Nawo wikamseka loli-loli. Ela uo ukawifunya wose shighadi, ukamdwa ndee na mae mwana, andwamweri na waja wanughi orechanyeghe nawo, ukangia andu mwana orekoghe wararishwa. 41Nao ukammbwada mkonu, ukamzera, “Talitha Kum” kutambua kwaro, “Mnjighe, nakuzera wuka.” 42Ahoeni, uja mnjighe ukawuka kimusi, ukazoya kughenda. (Nao orekoghe ni mwana wa miaka ikumi na iwi.) Wandu wikashinika na ndighi. 43Jesu ukawilaghira nandighi mndungi usakemanya ilagho ijo; ukawizera wimneke mnjighe vindo.
ទើបបានជ្រើសរើសហើយ៖
MARKO 5: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.