MARKO 16
16
Kuruka kwa Jesu
(Mat. 28.1-8; Lk. 24.1-12; Joh. 20.1-10)
1Nao iji Sabato yameria kusia, Maria Magdaleni, Maria mae Jakobo, na Salome, wikaghua marumba wighende kumshinga. 2Hata nakesho kio, Ituku ja Njumwa, wikafuma na kughenda; wikabusa kaburinyi iruwa jikibuka. 3Nawo iji werekoghe wikighenda, wikakotiana weni na weni, wikighamba, “Keni, nani uchaadibingilishira igho jiko mnyangonyi ghwa kaburi?” 4Nao wiendazighana, wikajiwona jija igho jameria kubingilishwa. (Najo jerekoghe ibaa na ndighi.) 5Wikangia kaburinyi, wikawona mdawana umu uko kidombo chia ya mkonu ghwa kiwomi, urwae nguwo ya chokwa; wikashinika na ndighi.
6Ela uo mdawana ukawizera, “Msakeshinika. Namanya mwaawuyamlola Jesu wa Nazareti uo oresulubishiroghe. Waruka, ndeuko aha anduangi. Zighanenyi andu weremmbikieghe. 7Ela ghendenyi muwighorie wanughi wake na Petro angu wamkiria noko cha Galilaya. Ahoeni mchammbona sa iji koni oremghorieghe.”#Mat. 26.32; Mk. 14.28
8Nao wikafuma, wikakimbia kufuma kaburinyi, angu werengiriloghe ni wowa na kushinika. Hata ndeweremghorieghe mndungi ilagho jingi anduangi, angu wereobueghe.
Jesu kumfutukia Maria Magdaleni
(Mat. 28.9-10; Joh. 20.11-18)
[ 9Jesu umeria kuruka kokio Ituku ja Njumwa, oremfutukieghe imbiri Maria Magdaleni, uo oremmbingieghe pepo mfungade. 10Nao moni ukaghenda na kuwighoria awo werekwanyeghe nao, angu werekoghe wikisirimika ngolonyi na kulila. 11Ela awo, iji wasikira angu oko moyo, na wei wamfutukia Maria Magdaleni, wikalegha kurumiria.
Jesu kuwifutukia wanughi wawi
(Lk. 24.13-35)
12Konyuma sena, Jesu ukawifutukia wawi wawo uko na fwana zima, iji werekoghe wikighenda cha mzinyi. 13Nawo weni wikaghenda na kuwighoria awo weresigharikieghe, ela na awo ndewerewirumirieghe anduangi.
Jesu kuwifutukia waja wanughi ikumi na umweri
(Mat. 28.16-20; Lk. 24.36-49; Joh. 20.19-23; Mab. 1.6-8)
14Kutua, Jesu ukawifutukia waja ikumi na umweri wiko kidombo vindonyi, ukawirasha kwa kulegha kurumiria kwawo na kwa kukua kwa ngolo rawo, angu wiserewirumirieghe waja weremmbonieghe nyuma ya kuruka kwake anduangi. 15Nao ukawizera, “Ghendenyi wurumwengunyi kose, chilenyi Ilagho Jiboie kwa wadamu wose.#Mab. 1.8 16Uo urumiriagha na kubaputizwa, achaakia; ela uo userumiriagha anduangi uchatanywa utote. 17Na alama iri richawinugha awa wirumiriagha: kwa irina japo wichawinga pepo, na wichaghora na chumi mbishi. 18Wichawada choka, na hata ngera wanywa kindo chingi chebwagha, ndewichaawona ilagho jingi anduangi. Wichawiwikiria wakongo mikonu, nawo wichaboa.”
Jesu kujoka cha mlungunyi
(Lk. 24.50-53; Mab. 1.9-11)
19Nao Bwana Jesu, nyuma ya kughora nawo ukadwalwa noko aighu mlungunyi, ukasea kidombo chia ya mkonu ghwa kiwomi ghwa Mlungu.#Mab. 1.9-11 20Wanughi wikafuma, wikachila andu kose, Bwana moni ukibonya kazi andwamweri nawo; ukijimangisha jija ilagho kwa weke mwakilimbiti werebonyeroghe. Amen.]
ទើបបានជ្រើសរើសហើយ៖
MARKO 16: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.