MIKA 2
2
Malipo gha wandu wikorongagha wakiwa
1Ni bugha kwa wandu wilalagha wilave kwa kubonya mipango izamie.
Ndoe ikaela, wichaikatisha mipango iyo iji wapata wulalo.
2Wikakunda mbuwa, wiariwada;
wikakunda nyumba wiariwusa;
ndekuwadie familia angu vilambo va mndungi viko na wulindiri ghukate.
3Kwa huwo BWANA waghamba,
“Ola naawuyabonya mipango ereda wuwiwi aighu yenyu,
msechaadima kughufufunuka.
Mchakuwona mmbeni
mkikaia wasinyi;
nenyo ndemchaaghenda
kwa lukaso sena anduangi.
4Ngelo iyo ikavika, wandu wichatumia lughano lukaie
mfwano ghwa wasi, nawo wichabora lumbo ulu lofwa ngolo
kwa agho mughiwonie wikighamba, ‘Dameria kunonwa putu,
BWANA wamerie kuwusa isanga jedu,
na kujineka wandu wididwae wunyika.’”
5Kwa huwo ngelo ikavika wandu wa BWANA wiwunjiro
isanga jawo, ndekuchaakaia na iwaghio ja ungi onyu.
6Wandu waawuyanizera,
“Kusedichilie. Kusechileghe maza iri.
Mlungu ndechaadibonya kiwiwi anduangi.
7Wele muaghesha wandu wa Israeli weewasirwa njowe?
Mlungu oosigha kurumaghia kwake?
Wadima kubonya maza rifwane huwo?
Nechi wei Mlungu wadawidedia wandu wecha kwa wughoma?”
8BWANA watumbulia,
“Inyo mwadawikaba wandu wapo seji ni wamaiza.
Wandu wawuya kufuma wudenyi wikighesha wichakaia na sere mzinyi,
ela wichasoka wandu makoti ghawo.
9Mwadawiwinga waka wa wandu wapo wifume nyumba wirikunde;
mwawisokie wana wawo watini marasimio ghapo kwa kala na kala.
10Wukenyi mghende;
ndemmbwadie wubanana ghungi aha sena.
Kaung'a renyu rabonyere andu aha kunoneke.
11“Wandu awa weekunda mlodi umaraa-mara na tee
na mikalo ukiwizera, ‘Inyo mchulwa ni
divei na chofi.’
12“Ela nichamkwanya chiaimweri inyo wandu wa Israeli wisigharikie.
Nichamtumbanya chiaimweri sa ng'ondi riwuyagha iranunyi.
Isanga jenyu jichachulwa ni wandu sena,
sa wungi ghwa ng'ondi riko mlambenyi.”
13Mlungu uchawirughuya chia ewuya;
uchawilongoza wifume wubarishonyi.
Wicharirughua mbenge ra muzi na kungia kwa sere;
mzuri wawo, uo BWANA moni uchawilongoza shighadi.
ទើបបានជ្រើសរើសហើយ៖
MIKA 2: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.