MATHAYO 28
28
Kuruka kwa Jesu
(Mk. 16.1-10; Lk. 24.1-12; Joh. 20.1-10)
1Nyuma ya Sabato, Ituku ja Njumwa kokio, Maria Magdaleni na uja Maria mzima wikaghenda kuzighana kaburi. 2Ahoeni ghukakaia msughusiko m'baa ghwa ndoe; angu malaika wa Bwana oreserieghe kufuma mlungunyi, ukajibingilisha jija igho na kujiseria kidombo. 3Na fwana yake erekoghe sa luhehia, na marwao ghake gherekoghe gha chokwa sa thaluji; 4hata waja walindiri kwa wundu ghwa kuobua na kusughusika, wikawuya sa wandu wifue. 5Nao uja malaika ukawizera waja waka, “Inyo msakeobua, angu namanya mwaawuyamlola Jesu uo oresulubishiroghe. 6Ndeuko aha kungi, ela wameria kuruka sa iji koni oreghorieghe. Choonyi mmbone andu Bwana orelalieghe. 7Idana ghendenyi shwa-shwa muwighorie wanughi wake, ‘Waruka kufuma kwa wafu, nao ola wamkiria kwenda Galilaya; aho niko mchaammbona.’ Olenyi namghoria.”
8Niko wikafuma aho kaburinyi shwa-shwa, wikiobua na kuboilwa, wikaghenda na kuwighoria wanughi wake. 9Na ahoeni Jesu ukakwana nawo ukawizera, “Sere ndeikaie konyu.” Niko wikacha na kummbwada maghu ghake, wikamtasa. 10Jesu ukawizera, “Msakeobua, ghendenyi muwighorie wanidu wighende Galilaya, na aho wichaniwona.”
Malagho gha walindiri
11Nao iji waka werekoghe wikighenda, walindiri wamu nawo wikaghenda mzinyi na kuwighoria wakohani wabaa malagho ghaja ghose gherebonyekieghe. 12Nawo iji werekwanyikieghe andwamweri na waghosi, wikabonya mwandu na kuwineka waja masikari pesa nyingi wikighamba, 13“Inyo moozera wandu huwu: ‘Wanughi wake wedeecha nakio wikamwiwa iji isi derekoghe dilale.’ 14Na ilagho ijo jikasikirwa ni m'baa wa isanga, isi dichaja nao malagho, eri usem'bonye ilagho jingi.” 15Nao wikawada rija pesa wikabonya wokoni sa iji werelaghiriloghe. Na ilagho ijo jikaghoreka woruwo kwa Wayahudi hata linu.
Jesu kuwifutukia wanughi wake
(Mk. 16.14-18; Lk. 24.36-49; Joh. 20.19-23; Mab. 1.6-8)
16Nao waja wanughi ikumi na umweri wikaghenda Galilaya kwa ugho mghondi Jesu orewilaghirieghe.#Mat. 26.32; Mk. 14.28 17Hata iji weremmbonieghe wikamtasa, ela wamu wikakaia na ngera. 18Jesu ukawichea ukawizera, “Namerie kunekwa nguma rose mlungunyi na ndoenyi. 19Idana ghendenyi m'bonye wandu wa mbari rose wikaie wanughi, mkiwibaputiza kwa irina ja Aba, na ja Mwana, na ja Roho Mweli;#Mab. 1.8 20mkiwifundisha kughiwadia agho ghose neremlaghirieghe. Nani olenyi neko andwamweri nenyo hata kukatia kwa ngelo.”
ទើបបានជ្រើសរើសហើយ៖
MATHAYO 28: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
