JOELI 3
3
Mlungu kuritanya mbari zima
1BWANA waghamba,
“Ngelo iyo nichawiwunjira Juda
na Jerusalemu mecha ghawo.
2Nicharikwanya mbari zima,
na kusea nawo cha Vololo Etanya.
Nichawitanya aho kwa wundu ghwa maza rose wiwibonyere wandu wapo.
Wawisasarie wandu wa Israeli aghadi ya masanga gha kighenyi,
na kujiwagha isanga japo Israeli.
3Wakabie kura aighu ya wandu wapo,
wikauza wana wa womi kwa kupata malaya,
na wai kwa kupata divei winyo.
4“Mwawuyakunda kunilipa kwa wundu ghwa kilambo chimu? Ikakaia ni huwo, nichamlipa kwa shwa-shwa mabonyo ghenyu gheni m'bonyere.#Isa. 14.29-31; 23.1-18; Jer. 47.1-7; Eze. 25.15–28.26; Amo. 1.6-10; Zef. 2.4-7; Zek. 9.1-7; Mat. 11.21-22; Lk. 10.13-14 5Mwawadie feza na dhahabu, mkwadwa mali rapo na kuringira hekalunyi renyu. 6Mwawadie wandu wa Juda na Jerusalemu mkawiuza kula kwa Wagriki, na kuwiwika kula na isanga jawo. 7Ela idana nichawinyavurisha wifume andu muwiuzire, nani nicham'bonyera sa iji koni muwibonyere. 8Nichawiuza wana wenyu wa womi na wa waka kwa wandu wa Juda, nawo wichawiuza kula kwa wandu wa Sheba; ini BWANA naghamba.
9“Ereshenyi malagho agha kwa mbari zima:
‘Kaienyi tayari kwa wuda
wangenyi mang'oni ghenyu;
kwanyenyi masikari ghenyu ghose mghende.
10Chanenyi maghembe ghenyu ghiwuye chufu,
na miundu yenyu iwuye mafumu;
hata uo uko mnyonge ndeghambe “Ne ing'oni.”#Isa. 2.4; Mik. 4.3
11Shashirenyi muche inyo mbari rose ra wandu muko mbai mbai;
kwanyikenyi aho vololonyi.’”
Duma ijeshi jako jisee jiwikabe ee BWANA.
12“Suti mbari zima wikuwike tayari kusea cha Vololo Etanya.
Ini BWANA nichasea kidombo aho
nipate kutanya mbari rose ra wandu wimarie mbai mbai.
13Awa ni wandu wizamie nandighi;
wibwaghe karakara na ngano idemwagha ngelo ya makuwido;
wifashe-fashe karakara na zabibu rikamwagha andenyi ya kidu chekamia zabibu
hata divei ichuo na kudika-dika.”#Wuf. 14.14-16,19-20; 19.15
14Maelfu na maelfu gha wandu ghakwanyikia andenyi ya Vololo Etanya.
Ituku ja BWANA jalighisa kuvika aho.
15Iruwa na mori vasera kira,
na nyerinyeri raleka kung'ala-ng'ala.
Mlungu kuwirasimia wandu wake
16BWANA wadoka kufuma Mghondi ghwa Sioni
lwaka lwake lwaruruma kufuma Jerusalemu;
mawingunyi na ndoenyi kwasughusika.
Ela BWANA uchawilindia wandu wake.#Amo. 1.2
17“Niko oho ee Israeli, kuchaamanya kukaia ini ne Mlungu wako;
nadakaia aighu Sioni, ugho mghondi ghwapo ghwa wueli.
Jerusalemu ichakaia muzi ghwapo ghwa wueli,
na waghenyi ndewichaaghusima sena anduangi.
18“Ngelo iyo, mighondi ichachulwa ni mbuwa ra mizabibu,
na mighondi mitini ichachulwa ni ng'ombe ra mariwa,
isanga ja Juda jose jichachulwa ni machi,
dumeda dwaa machi duchakaia dukisea kufuma Hekalunyi ya BWANA,
na kunyoshera Vololo ya Shitimu.#3.18 Shitimu: angu Akashia.
19“Misri ichawuya ikara, na Edomu ichawuya kireti;
kwa kukaia werebonyereghe lung'eto kwa
wandu wa Juda,
wikabwagha wandu wake wisewadie makosa.
20Ela Juda ichakailwa ni wandu kwa kala,
na Jerusalemu wori ichakailwa vivalwa vose.
21Nichalipa awo wibwaghilo,
hata sichaawifuya wughoma.
Kwa kukaia ini BWANA nadakaia Sioni.”
ទើបបានជ្រើសរើសហើយ៖
JOELI 3: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.