HAGAI 2
2
Wubaa ghwa Hekalu mbishi
1Mwaka ugho ghoni, ituku ja mirongo iwi na imweri, mori ghwa mfungade, BWANA oreghorieghe sena na mlodi Hagai. 2Ukamzera Hagai ughore na Zerubabeli m'baa wa isanga ja Juda, na Mkohani M'baa Joshua, na masighariko gha wandu wose wiwurie kufuma wubarishonyi huwu: 3“Oko mndungi aha aghadi konyu udimagha kukumbuka seji wubaa ghwa Hekalu ghorekoghe? Ghwawuyawoneka wada konyu idime? Yaawuyawoneka seji si kindo chingi.#Ezr. 3.12 4Ela idana mndungi onyu usefo ngolo. Bonyenyi kazi, angu ini nekwanye chiaimweri nenyo. 5Sa iji koni neremlaghirieghe mkifuma Misri kukaia nichakaia andwamweri nenyo, ni huwo koni neko chiaimweri nenyo; msakeobua.#Kuf. 29.45-46
6“Ini BWANA Uwadie-Ndighi-Rose naghamba kukaia kafwani koni nichasughusa mlungunyi, na ndoenyi, na ndoe iomie, na bahari.#Waeb. 12.26 7Mbari rose ra wandu nicharikumba noko, na mali rawo wicharireda aha, na Hekalu ichachulwa ni mali. 8Feza yose ni yapo, na dhahabu riko ndoenyi ni rapo. 9Wubaa ghwa Hekalu mbishi ghuchakaia mungi kuchumba ghuja ghwa kala, na aho nichawineka wandu wapo mecha na sere.” BWANA Uwadie-Ndighi-Rose waghamba.
Mlodi kulola njama kwa wakohani
10Ituku ja mirongo iwi na inya ja mori ghwa ikenda, mwaka ghwa kawi ghwa kubonya nguma kwa Dario, BWANA Uwadie-Ndighi-Rose oreghorieghe sena na mlodi Hagai. 11BWANA ukaghamba, “Kotia wakohani witanye aighu ya sharia ihi: 12Mundu ukadwa kipande cha nyama ieleshero ya kizongona, nao uifunge na kidambi cha nguwo yake, ukaadada nacho mkate angu nyungu angu divei, angu mavuda, angu vindo ivo vose, huwo vikaia vieleshero?” Wakohani wikatumbulia, “Hata.” 13Niko Hagai ukaghamba, “Mndungi ukakaia useelie kwa kuadada gharia, nao uadade chimu cha ivi vindo, welee vikaia viseelie?” Wakohani wikatumbulia, “Ee vikaia viseelie.”#Mit. 19.11-22 14Niko Hagai ukaghamba, “BWANA waghamba huwu: Ola huwo niko wandu wa mbari ihi wiko imbiri kwake. Kula kazi wibonyagha, na icho chose wichifunyagha kizongona madhabahunyi, ndechielie.”
BWANA kulaghira marasimio ghake
15BWANA waghamba, “Wonenyi agho ghimpatire imbiri msezoe kuagha Hekalu. 16Mundu ukaghenda zighana msigo ghwa viro vake ukisuwiria kupata vipimo mirongo misanu, uapata mirongo iwi. 17Neremkabieghe kwa kiremba, na vua ya magho ngano na vindo vose morewaeghe, ela ndemoreherieghe. 18Idime ni ituku ja mirongo iwi na inya ja mori ghwa ikenda; ituku msingi ghwa Hekalu ghumerelo. Modezighaniragha agho ghichaakaia kufuma idime. 19Nichamrasimia hata ngera ndemuwuewona mbeu ingi nganyenyi konyu; hata mzabibu, angu mtini, angu mkomamanga, angu mzeituni ghuvae.”
Ilaghiro ja BWANA kwa Zerubabeli
20BWANA ukaghora na Hagai indo ja kawi ijo ituku jeni ja mirongo iwi na inya ja ugho mori ghoni ukighamba, 21“Mzere Zerubabeli, m'baa wa Juda kukaia nalighisa kusughusa mlungunyi na ndoenyi. 22Nichabingilisha mawuzuri na kurimeria ndighi ra mawuzuri gha iro mbari. Nichaghibingilisha magare gha wuda na awo wighijokagha; farasi richafwa na wajoki farasi waro wichabwaghana weni na weni. 23Ituku ijo ee Zerubabeli mwana wa Shealtieli, mdumiki wapo, nichakubonya oho kukaie mzuri kwa nguma yapo, kwa kukaia ni oho nikusaghue.” BWANA wa majeshi waghamba.
ទើបបានជ្រើសរើសហើយ៖
HAGAI 2: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.