HABAKUKI 2
2
Itumbulio ja BWANA kwa Habakuki
1Nichajoka aighu ya mnara ghwapo nipate kuwona agho BWANA uchaanizera nipate kughora; sena nimanye seji uchaanitumbulia aighu ya malalamiko ghapo. 2BWANA ukanitumbulia, “Andika iri maza nikuwonyeragha worinyi aighu ya vishawalata va magho, eri uo ushomagha udime kughishoma kwa shwa-shwa. 3Kwa kukaia ngelo ya agho mawono kukatia ndeivikie; ela ngelo yaro iacha. Ikafwana kumuka, kuiweserie; angu loli ichacha ndeichaamuka anduangi.#Waeb. 10.37 4Iji nijo ilagho, ‘Olenyi awo wiko wawiwi rohonyi kwawo, wichalemwa; ela awo wiko na hachi wichakaia moyo angu wiko waloli kwa Mlungu.’”#War. 1.17; Wagal. 3.11; Waeb. 10.38
Kutanywa kwa awo wiseko na hachi
5Mali radakalia wandu. Wandu wa choyo wadakukasa nawo ndewina kuhora kungi. Ndewikatwagha jingi weeka sa kifwa. Iyo niyo shekeria wawuyasima kula mbari na kuwidwa wandu wunyika. 6Awandu wasimwa wichawiseka awo wandu na kuwimenya wikighamba, “Ni bugha konyu mmbusagha vilambo viseko venyu. M'bonya huwo hata lii mkiwilawia wasile wenyu?”
7Ela imbiri msemanyire, inyo msimie wambenyu mchangia silenyi; nenyo mchalazimishwa kulipa na fwaida raro. Wamaiza wichacha na kukubonya kusughusike. Wichakudwa wunyika. 8Angu kusokie mbari nyingi vilambo vawo, awo wisigharikie wichakudwa wunyika; kwa kukaia kwabwaghie wandu wengi na kutotesha masanga mengi.
9Ni bugha kwako kuredagha mali ra wuwiwi nyumbenyi kwako na kwa iro kutima kuwika muzi ghwako nicha ghusepato ni mawiwi. 10Kwaredie waya kwako na kwa nyumba yako; kwabwaghie wandu wa mbari nyingi, kukajitotesha irangi jako. 11Igho jiko wurighenyi ghwa nyumba jichakulilia, na misumbati ya nyumba ichakaia ikidikia icho kililo.
12Ni bugha kwako kuaghagha muzi msingi kwa wuwiwi, na kughuagha kwa kubwagha. 13Welee, ndemmbonagha kukaia maza iri reefuma kwa BWANA Uwadie-Ndighi-Rose; ra wandu kubonya kazi rekorwa, na wandu wa iro mbari kudumika duu? 14Kwa kukaia ndoenyi kuchachulwa ni kughumanya wubaa ghwa BWANA seji machi ghichuagha baharinyi.#Isa. 11.9
15Ni bugha kwako mundu kuwinyoshagha wambenyu chofi nyingi, na kuwiwongera eri kughuzighane wuduu ghwawo. 16Na oho wokoni kuchafushwa waya nandighi wulalo ghopata ishima. Kuchanywa hata kutatarike. BWANA uchakubonya kunyo kikombe chako chekabwa, na ishima jako jichaghaluswa jiwuye waya. 17Kwademie midi ya msidu ghwa Lebanoni. Oho wokoni kuchademwa. Kwabwaghie nyamandu rerekoghe aho; idana nyamandu richakuobosha oho. Malagho agha ghichabonyeka kwako kwa wundu ghwa kubwagha wandu wengi ndoenyi, na kwa kinyanya chako aighu ya wandu wa mizi yawo. 18Mlimu ghoko na fwaidaki? Ni kilambo chimu tu chibonyero ni mdamu chisedimagha kukughoria ilagho jingi ela tee nduu. Chabonyeragha fundi waro ilaghoki jiboie eri uchirumirie, mlungu ghusedimagha kudeda! 19Ni bugha kwa uo mundu uzeragha kilambo cha mudi, “Wuka!” Na igho jisededagha, “Wuka kimusi!” Mlimu ghwadima kukufunukuya ilagho jingi? Ghooshingwa dhahabu na feza, ela ndeghuwadie miruke andenyi yake.
20Ela BWANA oko andenyi ya Hekalu yake ya wueli; wandu wose wa wurumwengunyi ndewikaie kima imbiri kwake.
ទើបបានជ្រើសរើសហើយ៖
HABAKUKI 2: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.