AMOSI 9
9
Kutanya kwa Mlungu
1Neremmbonieghe BWANA wakaia kimusi mbai na mbai ya madhabahu ukighamba, “Kaba koighu nguronyi ra Hekalu hata vizingiti visughusikie; kuvichikanye-chikanye aighu ya chongo cha kula mundu; mndungi ukasigharika, nicham'bwagha wudenyi. Ndekuwadie ungi uchaakimbia angu kufufunuka. 2Hata ngera wakota wiendekaia Andu kwa Wafu, sena mkonu ghwapo ghuchavika aho na kuwiwada; wikajoka mlungunyi, nichawisera andonyi kufuma aho. 3Hata wikuvise aighu ya Mghondi ghwa Karmeli, nichawinugha aho na kuwiwada; hata wikeduakuvisa kondonyi andu kumilie baharinyi nisewiwone, nichaduma choka aho iwilume. 4Hata widwalo wunyika na kukaia kwa wamaiza wawo nichaduma wandu aho wiwibwaghe. Nia yapo ni kuwibwagha si kuwikira anduangi.”
5BWANA Uwadie-Ndighi-Rose
wadaadada ndoe nao isughusike;
wandu wose wikaiagha aho walila.
Wurumwengu ghose ghwawuka na kusea
sa Moda ghwa Naili.
6BWANA wadaagha muzi ghwake mlungunyi,
na kuwika mawingu naighu ya ndoenyi.
Wadawanga machi gha baharinyi
na kughidia aighu ndoenyi.
Irina jake ni BWANA.
7BWANA waghamba, “Wandu wa Israeli, naawuyawiririkanya wandu wa Ethiopia seji nimririkanyagha inyo. Nawijosere Wafilisti kufuma Krete, na Wasiria kufuma Kiri seji neremjosereghe kufuma Misri. 8Olenyi ini Bwana MLUNGU naawuyazighanira wandu wa ughu wuzuri ghwa Israeli ghubonyagha kaung'a, nani nichawitotesha wifume ndoenyi; elaima sichaawitotesha wandu wa kivalwa cha Jakobo putu anduangi.
9“Nichafunya momu na kuwisughusa wandu wa Israeli aghadi ya iro mbari ra wandu seji wandu wichekechagha ngano na kichekecho. Nichawichekecha na kuinja wose wisefwanagha. 10Wakaung'a wose wa wandu wapo wichabwaghwa wudenyi, awo wighambagha, ‘Isi ndedidimagha kupatwa ni ilagho jingi.’”
Kuwuya kuchagha kwa Israeli
11BWANA waghamba, “Ituku jichacha nani nichaghuwunja wuzuri ghwa Daudi ghoreghueghe sa nyumba ighue na kunoneka. Nichaagha mawurigha gharo na kughimangisha. Nichaghuagha na kughuwika sa iji ghorekoghe imbiri.#Mab. 15.16-18 12Na huwo wandu wa Israeli wichawusa masighariko gha wandu wa Edomu, na iro mbari rose ra wandu wiwangilo wikawuya wapo,” waghamba BWANA uo ubonyagha maza iri.
13BWANA waghamba, “Olenyi matuku ghiacha,
mbeu ichabuka na kuzoghua naiseghe kuchumba
seji idimagha kukuwidwa,
na zabibu richawurwa shwa-shwa
kuchumba seji divei idimagha kuboiswa.
Mighondi ichafunya divei isingie,
na mighondi mitini ichadika-dika divei.
14Nichawiwunja wandu wapo Israeli isangenyi kwawo.
Wichaagha sena maghacho gha mizi yawo inonelo,
na kuikaia;
wichawa mizabibu na kunywa divei yaro;
wichalima mbuwa na kuja matunda gharo.
15Nichawiwika na kuwimangisha isangenyi jawo,
nawo ndewichaafunywa sena ijo isanga nerewinekieghe,”
waghamba BWANA Mlungu wako.
ទើបបានជ្រើសរើសហើយ៖
AMOSI 9: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.