AMOSI 7
7
Mawono gha zighe
1Bwana MLUNGU ukaniwonyera mawono: Ngawona ukiumba izungu ja zighe nyuma ya ifungu ja nyasi ja mzuri kudemwa na nyasi kuzoya kubuka sena. 2Hata iji zighe rameria kuja nyasi rose ra isangenyi, nereghambieghe,
“Ee Bwana MLUNGU, nakuvoya kufuye wandu wako wughoma,
Wandu wa Israeli wadima wada kukaia moyo?
Weeka watini nandighi.”
3Nao BWANA ukaghalusa maghesho aighu ya ilagho ijo ukaghamba, “Ndejichaabonyeka kungi.”
Mawono gha modo
4Bwana MLUNGU ukaniwonyera mawono ghamu: Ngawona Bwana MLUNGU uwangagha wandu uwikabe kwa modo; nagho ghukakora bahari mbaa machi ghikaoma na kuzoya kukora isanga. 5Niko ngaghamba! “Ee Bwana MLUNGU, nakulomba kusighe;
Wandu wa Israeli widima wada kukaia moyo?
Weeka watini nandighi.”
6Nao BWANA ukaghalusa maghesho aighu ya ilagho ijo ukaghamba, “Hata iji wori ndejichaabonyeka kungi.”
Mawono gha Kabiro
7Ngawona mawono ghamu kufuma kwa BWANA, Bwana wakaia kimusi mbai na mbai ya wurigha ghuaghilo kwa kupimwa na kabiro iyo oreiwadieghe. 8Nao BWANA ukanizera, “Kwawuyawona kii Amosi?” Ngamtumbulia, “Naawuyawona kabiro.” Niko BWANA ukaghamba, “Ola naawuyatumia kabiro kuwonyera kukaia aghadi ya wandu wapo Israeli weekomeka sa wurigha, sichaawisigha nisewikabie anduangi. 9Aho andu wandu wa kivalwa cha Isaaka weretasiragha kuchatoteshwa. Andu kwa Wueli kwa Israeli kuchanoneka. Nicharimeria nguma ra Mzuri Jeroboamu.”
Amosi na Amazia
10Niko Amazia, mkohani wa Betheli, ukaduma momu kwa Mzuri Jeroboamu ukighamba, “Ola Amosi wadeda malagho gha sheshe aighu yako aghadi ya wandu wa Israeli, na malagho ghake ni gha ndengwa kwa isanga. 11Amosi waawuyaghora, ‘Jeroboamu uchabwaghwa wudenyi, na wandu wa Israeli wichadwalwa wunyika kula na isanga jawo.’” 12Nao Amazia ukamzera Amosi, “Ee Mlodi, ghenda cha isanga ja Juda, kufunyeghe wulodi aho wikulipe. 13Ela jingi kusefunye wulodi Betheli, kwa kukaia ni andu kotasira kwa mzuri sena ni hekalu ya wuzuri.”
14Niko Amosi ukamtumbulia Amazia, “Ini se mlodi kungi, hata se mwana wa mlodi; ela ne mlisha, na mlimi wa miku. 15BWANA ooniwada ngilisha mfugho, nao ukanizera nichefunyira wandu wake Israeli wulodi. 16Kwa huwo idana sikira ilagho ja BWANA. Kwaghamba nisefunye wulodi aighu ya Israeli, hata nisechilie wandu wa Israeli. 17Kwa wundu ugho BWANA wakuzera oho Amazia, ‘Mkako uchawuya ilaya andenyi ya muzi, wana wako wa womi na wa waka wichabwaghwa wudenyi. Isanga jako jichapimwa kwa kamba na kuwaghilwa wandu wazima. Oho kumoni kuchafwa andenyi ya isanga ja wusezinyi; na loli wandu wa Israeli wichadwalwa wunyika kufuma iji isanga.’”
ទើបបានជ្រើសរើសហើយ៖
AMOSI 7: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.