AMOSI 5
5
Kuwangwa kwa kuhea
1Sikirenyi ulu lumbo lolila inyo wandu wa Israeli:
2Mwai Israeli wamerie kughwa;
usechaadima kuwuka sena!
Oosighwa ulale andonyi;
kuseko na mndungi omtesia.
3Bwana MLUNGU waghamba, “Muzi ghwa Israeli ghudumagha masikari elfu imweri wudenyi ghuchawurilwa ni masikari ighana jimweri tu; na ugho ghudumagha ighana, ghuchawurilwa ni ikumi tu.”
4BWANA Mlungu wawizera wandu wa Israeli huwu: “Nilolenyi mpate kukaia moyo. 5Msenilole Betheli; mseghende Gilgali hata mseghende Beer-sheba kutasa; kwa kukaia loli wandu wa Gilgali wichadwalwa wunyika, na Betheli ichasighwa nduu.”
6Mghendienyi BWANA mpate kukaia moyo, usechemseria sa modo andenyi ya wandu wa Israeli. Modo ghuchawikora wandu wa Betheli, hata usepatike mndungi oghurimisha. 7Ni bugha konyu inyo muighaluagha hachi iwuye kuwawa, na kuilaghasha loli.
8BWANA wabonyere nyerinyeri,
Piadisi na Orioni,
na kughalusa kira chiwuye mwengere,
na mwengere ghuwuye kira.
Uwangagha machi gha baharinyi,
na kughidia andoenyi,
irina jake ni BWANA.#Ayu. 9.9; 38.31
9Uo uredagha kunoneka aighu ya wabaa,
na kughusha ngome rawo.
10Inyo mwadazamilwa ni mundu ukemiagha wuwiwi, na kughora loli kotinyi. 11Mwawikorongie wakiwa kwa kuwisoka viro vawo. Kwa huwo ndemchaarikaia iro nyumba ra magho muriaghie, hata kunywa divei iboie ifumagha kwa iyo mizabibu iboie muiwae. 12Naichi makosa ghenyu mengi, na kaung'a renyu seji riko mbaa. Mwadawitirira wandu wecha, na kuhongwa; mwadamtangala mkiwa usepate hachi yake kotinyi. 13Kwa huwo kunyama kima niko kuchaakaia suku ngelo iyo, kwa kukaia ni ngelo mbiwi.
14Lolenyi kubonya mecha, msighe mawiwi; mpate kukaia moyo; niko huwo BWANA, uo Mlungu Uwadie-Ndighi-Rose, uchaakaia chiaimweri nenyo, sa iji koni mlalaaghamba oko aeni. 15Menyenyi mawiwi, mkunde mecha, mtanye hachi kotinyi. Kewada BWANA uchawiwonia wughoma masighariko gha wandu wa mbari ihi.
16Kwa huwo BWANA, uo Mlungu Uwadie-Ndighi-Rose waghamba huwu: “Kuchakaia na kililo achienyi mbaa, na andu kose chienyi wandu wichakaia wikighamba, Weei ngai, Weei ngai! Wichawiwanga walimi wiche ifonyi; na kuwilipa awo wiko mafundi ghelila wichelila; 17wandu wichakaia wikilila andenyi ya mbuwa rose ra mizabibu, kwa kukaia nichaida aghadi konyu ngimkaba;” waghamba BWANA.
18Ni bugha kwa awo wiweseragha ijo ituku ja BWANA! Kwaki mkunde kujiwona ituku ja BWANA! Ni ituku ja kira jisewadie mwengere; 19jeeka seji mundu uikimbiagha shimba nao ukwane na kibarabara angu seji mundu ungiagha nyumbenyi, nao eukusaghikagha na wurigha, ulumo ni choka. 20Welee, huwo ituku ja BWANA ndejeeka kira jisewadie mwengere, ituku ja kira cha ndindi jisena mwengere ghungi anguwada?
21BWANA waghamba, “Nadazamilwa ni ndima renyu ra dini, sidimagha kurirumaghia. 22Hata ngera mwanifunyira vizongona venyu vekora na vizongona va viro, sichaavirumiria anduangi; sichaavirumiria vizongona venyu va nyamandu ribandie anduangi. 23Sighenyi kunibara madu na chumbo renyu, sikunde kusikiria chwaka ra vinubi venyu. 24Ela hachi ndeidike-dike sa machi, na loli idike sa kamoda kiseomagha.
25“Wandu wa Israeli, seremlombieghe vizongona na mafunyo ghangi andenyi ya iyo miaka mirongo ina ngimlongoza kireti. 26Ela idana, angu mtasire fwana ra Sakuthi, mzuri onyu mlungu, na Kaiwani mlungu ghonyu ghwa nyerinyeri, mchariduka iro fwana renyu 27ingelo nichamfunya mdwalo wunyika cha isanga jiko kimonu cha Dameshki;” waghamba BWANA uo uwangwagha Mlungu Uwadie-Ndighi-Rose.
ទើបបានជ្រើសរើសហើយ៖
AMOSI 5: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.