ROM 2
2
I God vin vevegi na tangaloi
1Nge igimiu tare ve nem lado ve nein veveginire tangaloi wagineu, igimiu neu vagasile. Lune igimiu nem veveginire, a hogo igimiu nem vevegi gimiu sibomiu, a vevenagi igimiu nem vai na gineu ngerehi teu, mwerehi ingere ram vaire. 2I God mo veveginire hi rau vei gineu rau esi, ko igide dau ilo huri ve a nona vevegi u vovohoi. 3Igimiu nem veveginire huri rau vei gineu rau esi, nge igimiu nem vai gineu rau esi vage. ?Wa igimiu nein toa lai dena leo vevegi noi God? 4Ingeie u lolo garea ko u rongo ribi, mo rarai gimiu ve nen leahi na domimiu, nge nehe lado tea vohogi huri na nona vaivei garea. Bataha igimiu nehe ilo tea vurugegi huri ve i God u lolo garea gi gimiu huri ve igimiu nein leahi na taqangimiu ko nein mwaso. 5Nge igimiu a qatumiu rau siaga ko nehe masinge tea ve nein lado leahi, siu igimiu nem vai na leo vevegi huri gimiu vin lawua lawua vage lolo rani hi i God vin haharagi na nona lologagasi. Lo rani hi a sinobu ram leo vurugegi na vevegi vovohoi noi God. 6I God vin bete na gai tawe sige vin vevegi na tangaloi doluegi huri na hava lalakogi tea hi rau vei. 7A sinobu lavasigi ram vai na gineu garea tamwere, ram rarai na roroa noi God, a tanoi lado mava, ko huri na mwasoana ngehi hate duvigi. I God vin bete na mwasoana ta vagi tuei lawera. 8A sinobu lavasigi a domire rau bugure. A domire ve rain vei na gineu vin huri na nora tarani sibora. Ingere rahe masinge tea ve rain huri na hogo, nge ram vano tuturedu ram huri na asigi. I God vin haharagi na nona lologagasi lawera ko vin veveginire. 9I God vin bete na romasi ko a gagarasi lawera doluegi hi ram vai na gineu rau esi. Lawera duvi Juda tomue ko lawera tangaloi wagineu ngerehi hate duvi Juda vage. 10Nge ingeie vin bete na roroa, a tanoi ladomava, ko a tamwata lawe rahine doluegi hi ram vai gineu rau garea. Lawera duvi Juda tomue ko vage lawe rahine hi hate duvi Juda. 11Huri i God vin vevegi na tangaloi vin huri na matahala gatagale.
12A sinobu ngerehi rahe ilo na Leohora tea ko ingere rau galegaleasi rain sala, hate huri rahe ilo na Leohora tea, ko a matahala mwerehi vage ve irahine hi rau ilo na Leohora ko ingere rau galegaleasi vin veveginire vin huri na Leohora. 13Leohora vin he vaire tea ve rain vovohoi lo nagoi God, nge ingere hi ram rong huri na Leohora ingerehi ram vovohoi lo nagona. 14Ingerehi hate duvi Juda rahe lai na Leohora tea, nge lune ram vai gineu mo huri mwerehi a Leohora mo veve a Leohora u toga lolo lolora beno. Ingeie ngaha a hogo, hatie huri rahe hakovi na Leohora tea. 15Ingere ram haharaginie lolo lolora huri ve ingere rau ilo na gareana ko a asiana, mwerehi a Leohora mo veve. Ko ingere ram haharaginie ngaha lo rongrongora. Lo mahogi lavasigi a domire mo veve lawera ve rau vei na gineu esi, ko lo mahogi lavasigi a domire mo veve lawera ve rau vei gineu rau garea. 16A gineu ingere ngaha doluegi rain vei lo ranigi hi lune i God, lui Jisas Kraes, vin vevegi na domiana hiligi nora sinobu. A Roro Garea ram waregi serea ingeie hi mo veve na gineu ngaha.
A Leohora vin he vagamwasoi na duvi Juda tea
17?Wuraha mei gimiu? Nem ware gimiu sinobu ve ira duvi Juda. Igimiu nem lado talo Leohora noi Mosis ko nem sagegi gimiu huri ve neu kakarani lobei God. 18Igimiu neu ilo na gineu hi mo tarani ve nen vaie ko a havagineu hi u garea, vevenagi igimiu neu ilo na Leohora. 19Igimiu nem lado huri ve igimiu nein tomuegi ira mata dodo, ko igimiu a leleo lawera hine hi ram toga lolo dodogi. 20Igimiu nem lado huri ve nein haharagi lawe na sinobu hi a domire rau wiriwiri huri na havagineu hi u vovohoi ko ve nen huhui rahine hi rahe ilo na gineu tea vohogi. Igimiu nem hakovi na Leohora, giniehi, nem lado huri ve neu ilo vurugegi na gineu doluegi ko a havagineu hi, neu laqagi u hogo. 21Igimiu neu huhuire wai tangaloi ?Huri havai nehe huhui lei gimiu tea sibomiu? Nem veve lawe na tangaloi wagineu ve na mese balubelu, nge igimiu nem balu. 22Vage igimiu nem veve lawera ve, igimiu nein mese bakabaka ko igimiu sibomiu nem vai na bakabaka. Igimiu neu leomasi na tarabesi nunui gineu, nge nem balu gineu lolo valei tataro. 23Igimiu nem sagegi gimiu sibomiu huri ve nem lado mavagi na Leohora noi God, nge nem vagamaemaegi God lune igimiu nem vai utuhi na nona Leohora. 24Mwere na Reve reve Gogona mo veve vena, “Ingere hi hatie duvi Juda ram vai hivohivogi na henai God a vevenagi igimiu.
25Tare ve nem huri na Leohora mo veve, a nomiu tevegigilegi a iloilogi lune. Nge tare nem vai utu na Leohora noi God, siu lo leoleonagi huri ve igimiu nehe lai na tevegigilegi tea vohogi. 26A sinobu ngerehi hate duvi Juda rahe lai na tevegigilegi tea. Nge tare ve ram vai na gineu mo huri na leo mwerehi a Leohora mo veve, siu lo leoleonagi huri ve ingere rau lei na tevegigilegi beno. 27Igimiu ira duvi Juda nem hakovi na Leohora hi rau uli bibie ko a tevegigilegi, nge nem vai utu na Leohora hi tau mosigei. Irahine hi rahe lai na tevegigilegi tea lo tarabesire rain vevegi gimiu huri ve igimiu neu vagasile, a tevegigilegi hogo he eno tea lo tarabesigi hogosie. 28Ingere rain vei lei mwerehi, a vevenagi a tangaloi ingeie hate duvi Juda hogo, tare mo lado ve ingeie a duvi Juda lo tarabesigi hogosie. A tevegigilegi hogo he eno tea lo tarabesigi hogosie. 29A tangaloi tare mo lado ve ingeie a duvi Juda, hogosie, tare mo lado ve ingeie a duvi Israel lolo lolona, a tevegigilegi hogo mo vai lolo lolona, lo managi nona Vui, nge hatie gina Leohora. A tangaloi mwerehi mo lai na huireana den God, hatie den tangaloi.
ទើបបានជ្រើសរើសហើយ៖
ROM 2: HNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013
