ROM 15
15
Igide dam lado hurire tangaloi wagineu, dain mese lado huri gide siboda hogosie
1Igide hi a noda ladohogo rau huire, dain lado hurire hi a nora ladohogo rau kekena, ko ve da hako meire da wali na nora hako hako mava, ko dain mese lado huri gide siboda hogosie. 2Siu vatvatahagi gide ve dain lado huri rehavada, ve da vai na gineu hi ve vin buluire rain rongarea lune, ko vin veire rain huire lo nora ladohogo. 3Mwerehi i Kraes he lado tea hurie sibona. Mwerehi a Reve reve Gogona u veve vena, “Lune a sinobu ram vai vei gimiu gina leo asi, ram vai garasieu.” 4A gineu doluegi u uli bibi tuei u uli huri ve vin huhui gide. A Reve reve Gogona mo bete na rongribi ko a dom mwamwavi lawe gide huri ve a noda lado tare vin eno 5A rongribi ko a dom mwamwavi mo vanai dein God. Ko ineu nam tataro huri ve i God vin bului gimiu doluegi ve nen ladobubugi mei gimiu gagatagalegi lo matahala mwerehi i Jisas Kraes mo tarani. 6Siu igimiu doluegi nein bulu gatagale ko igimiu nein ware roroagi God hi i tamai Jisas Kraes a noda Huqe.
A Roro Garea lawera tangaloi tavala varea
7I Kraes u lei vurugegi gimiu, siu igimiu vage nein lei vurugegi gimiu gagatagalegi, ngehi vin vei roroagi God. 8Ineu nam veve lawe gimiu huri ve i Kraes u voragi na tangaloi tabanagi ko mo tabanagi lawera duvi Israel mo haharagi huri ve a waratau noi God lawe retubure tatuei a hogo. 9Ko u veie mwere ngaha vage huri ve i ngerehi hatie duvi Israel rain waregi roroagi God huri na dom hahagavi hi u bete lawera. Mwerehi u uli lo Reve reve Gogona vena,
“Siu ineu nain waregarea ginigo
lo nagora sinobu hatie duvi Israel.
Ineu nai waregareagi na henamu.”
10A Reve reve Gogona mo veve vage,
“Igimiu hi hatie duvi Israel
nein havuhevu bubugi meire sinobu noi God.”
11A Reve reve Gogona mo veve taligu vena,
“A sinobu doluegi ingere hi hatie duvi
Israel, ram waregareagi na Huqe.
A sinobu doluegi ram huri veve garea lawea.” 12Ko i Aesaea u veve vena,
“A ratahigi garaqa gatagale vin vonai
den ira netui Jessi.
Ingeie vin huqegi goro na sinobu
ngerehi hatie duvi Israel,
ko a nora ladotare vin eno
a vevenagi ingeie.”
13Ineu nam tataro huri ve i God hi mo bete na ladotare vin vagahorongi gimiu gina havuhevu lawua ko a tamwata huri nem lado ta lune. Siu a nomiu lado tare vin horo madiridiri gina managi noi Vui Gogona.
I Bol mo laqa huri na nona tabana
14Retueku ko ire haqeku, ineu nau ilo vurugegi huri ve igimiu neu horo gina gineu gagareagi. Ineu nau ilo ve igimiu neu lei na iloilo hi nem tarani garagara ginie ko ve nein vei lei ve nen huhui gimiu gagatagalegi. 15Nge ineu nau uli na leta lawe gimiu nahe vunigi na havagineu tea huri na gineu lavasigi ngerehi nam tarani ve nein ladobibire. Ineu nau veie mwere ngaha a vevenagi i God u bete na muei hogogi hi laweau. 16Huri ve nain voragi tangaloi lalakogi noi Jisas Kraes lawe rahine hi hatie duvi Israel. Ineu nam tabana lawe God lo nona Roro Garea hi nam waregi sere huri ve a sinobu tavala varea den duvi Israel rain voragi na hogohogo mwasara ngehi i God u rong garea ginie, a hogohogo hi u vei gogonaginie gina managi noi Vui Gogona. 17Ineu nam sageau huri na havagineu hi nau veie huri God lui Jisas Kraes. 18Ineu nain he laqagi na gineu tea wagineu, hogosie nain laqagi na gineu ngerehi i Kraes u veire luku ngehi nau tomuegi na sinobu tavalavarea den duvi Israel ram rong huri God a vevenagi lo gineu hi nau veve ko nau veie, 19a vevenagi lo managi talo vaigivui ko a gineu lalawua rau lehire, ko a vevenagi lo managi noi Vui Gogona. Ineu nau toretore gina Roro Garea mo tavuigi Jerusalem mo dadari lo vanue Ilirikum ko nau vei vagasigi na duvi noku tabana. 20Ineu gesegi nam tarani ve nain toretore gina Roro Garea lo vanue ngerehi rahe rongo tea huri Kraes mosigei, a vevenagi ineu nahe tarani tea ve nai merihou na tabana ngehi a tangaloi wagineu u tevuiginie beno. 21Nge u uli lo Reve reve Gogona vena,
“Irahine hi a tangaloi he veve huri tea
lawera rain lehe,
ko irahine hi rahe rongo na leo tea
hurie rain ilo vurugegi.”
I Bol mo lado rarai huri ve vin vano Rom
22Vatu sao a tabana ingere ngaha ram vai goroau, giniehi, nahe vonatu lai tea ve na lehi gimiu. 23Siu siserigi ngaha ineu nau vei na noku tabana u rovo tangaha. A higao u sao rau vano beno, ineu nau tarani ve nain vonatu lobemiu. 24Ineu nam lado tare ve nain siro gimiu lo tarogi hi nain vano lo vanue Spen. Ineu nam havuhevu huri ve nain toga mei gimiu a mahogi te qilodo, ineu nam lado tare ve nein buluieu lo matahalaku lo taro hi nain siregi gimiu. 25Siserigi ngaha ineu nain vano lo vanue Jerusalem huri ve nain bului na sinobu noi God ram toga aiehi. 26Ira tangaloi ladohogo ram toga lo vanue Masedonia, ko lo vanue Kris, ram havuhevu huri ve rain bete mane vin bului na tangaloi mahogi hi ram toga lolo livugei sinobu noi God lo vanue Jerusalem. 27Ingere ram havuhevu huri ve rain vei na gineu ngaha, ko a hogo ingere ram laie gi bugure. Ingere ngaha hi hatie duvi Israel ram lai na vai garea talo vui ngehi a nora duvi Israel. Siu ingere rain bete nora hako gineu huri ve vin buluire duvi Israel. 28Lo tagugi hi ineu nau ilo vurugegi huri ve a mahoi tangaloi lo vanue Jerusalem rau lei na mane hi rau betea hurire, ineu nain siregi huri na vanue Spen, ineu nain tino utu turegi ko nain siro gimiu. 29Ineu nau ilo huri ve lune nain vonatu lobemiu nain lei na vai garea noi Kraes doluegi lawe gimiu.
30Retueku ko ire haqeku, ineu nam navuhi gimiu ve nen buluieu lo noku tabana, ve nen tataro lawe God hurieu. Nein veie mwere ngaha a vevenagi a noda Huqe i Jisas ko a tabetabe ngehi a Vui Gogona u bete lawe gide. 31Igimiu nein tataro huri ineu nain mwaso dena limara tangaloi hi rahe ladohogo tea lolo vanue Judia ko ve a buluiana ngaha nain leie vin vano Jerusalem vin vei havuhevugi na sinobu noi God aiehi. 32Siu tare ve i God mo masinge ve nain vei mwerehi ineu nain vonatu lobemiu gina havuhevu, ko dain bubugi, igimiu ko ineu dain haqe na taroi mangaana. 33I God hi mo bete na tamwata lawe, na toga mei gimiu doluegi, Amen.
ទើបបានជ្រើសរើសហើយ៖
ROM 15: HNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013
