ROM 13
13
Irahine hi ram huri Kraes rain rongo huri na leohora
1Igimiu doluegi nein rongo huri na tangaloi lalawua talo kavman. A tangaloi vin he huqegi goro lai tea, hogosie tare ve i God mo siregi na huireana lawea vin huqegi goro, ko a tangaloi vi he huqegi lai tea siserigi ngaha tavala varea dena huireana hi mo vonai den God. 2Siu irahine hi ram qalogoro na kavman a hogo ingere ram qalogoro na Leohora noi God, ko ingere rain lei na leo vevegi talo ulure sibora. 3Irahine hi ram vai gineu rau vovohoi rain he matagu tea ginire huqegi goro, irahine hi ram vai gineu rau esi hogosie ram matagu ginire. ?Wa igimiu nem tarani ve nein mese matagu ginire huqegi goro? Siu igimiu nen vai na gineu rau garea, ko ingere rain veve gareagi gimiu. 4A tangaloi mo huqegi goro ingeie a tangaloi tabanagi noi God huri ve vin bului gimiu. Nge tare nem vai gineu rau esi, nein matagu. Ingeie mo hago huireana huri ve vin vevegi, ingeie a tangaloi tabanagi noi God huri ve vin veveginire hi ram vai na galegaleasi. 5Igimiu nein ronghuri na kavman, hate hogosie huri hi ve vaiteu mo vevegi gimiu, nge a vevenagi igimiu neu ilo huri ve u vovohoi. 6Giniehi, igimiu nem voli takis vage. Ira huqegi goro ram tabanagi lawe God ko ram siregi na nora taro lawe na nora tabana 7Igimiu nein voli tabetabegi na bugumiu lawera. Ingere hi ram vile takis, igimiu nein voli lawera, ingerehi ram vile takis huri na vivilakogi, igimiu nein voli lawera. Igimiu nein ronghurire nein lado mavaginire doluegi.
Nen vui tabetabe gimiu
8Igimiu nein mese bugue lo gineu nora tangaloi, hogosie igimiu nein bugue lo tabetabe huri gimiu gagatagalegi, a vevenagi a tangaloi mo tabera wai tangaloi u rongtabe na Leohora doluegi. 9A Leohora mo veve vena, “Igimiu nein mese vagasile lo bakabaka. Igimiu nein mese ue vagamate hine tea. Igimiu nein mese balubelu. Igimiu nein mese vai huri na vivilakogi noi rehavamiu.” A Leohora ingere ngaha ko a Leohora lavasigi vage, ram dule lo Leohora gagatagalegi hi, mo veve vena, “Gon tabe rehavamu mwerehi gom tabego sibomu.” 10A tabetabe he vai garasi rehavamiu tea. Giniehi a tangaloi mo tabera tangaloi wagineu mo vai tui na gineu hi a Leohora mo veve. 11Igimiu nein vei mwerehi, huri igimiu nein ilo vurugegi na taro siseri ngaha igide dam toga lolona. A tarogi huri ve igimiu nein rada, igimiu nein mese maturu. 12U bongi u qaravu beno ko a rani mo kakarani vonai. Siu igide dain siregi dain mese vai na gineu ngerehi ta lolo dodogi ko igide da wali na lakolakoi vuro ve da qalo lo leleo. 13Igide da toga lo matahala vovohoi, mwere na sinobu ngerehi ram dori lolo rani. Igide dain mese vai na hinaga ngerehi rahe huri na matahala vovohoi tea sige da mese inuinu wai lenga. Igide dain mese vai na dori dori esi mena tangaloi wagiwegineu, dain mese vai dori dori ngerehi rahe garea tea. Igide dain mese vuigaro sige a gineu gagarasi vin mese toga mei gide. 14Igimiu nen saru goro gimiu gi Jisas Kraes ko nen galuvegi na nomiu galegaleasi hi mo vai lulumugi na tarabesimiu sibomiu.
ទើបបានជ្រើសរើសហើយ៖
ROM 13: HNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013
