LALAKOGI 28
28
Bol mo toga Molta
1Tavohehi gam hage varea, gam havuhevu ko gam rongo ram ve a vanue hi a henagi a Molta. 2Ira tangaloi ta aiehi ram lai vurugegi gamai. Lo taro tavohe hi mo uhe ko a ute ram gamwadidi liu. Ram huru na avi lawua huri gam madinuginie, siu ram leo huri gamai. 3Bol mo wali na gai rau vusi mwerehi nge, mo tulire talolo avi hi. A mwata mo mwalue lolona vevenagi ba u mwamwavi lawuagi, mo gasi Bol lo limana. 4Ira tangaloi ram lehi na mwata hi mo dule lo limei Bol, ram veve vena, nem lehe. Bataha a tangaloi hi nge a tangaloi veve tangaloi. U qoragi na tahi lawua hi beno, nge a nona muremure vin he vaie tea ve na mwaso. Ba tavohehi a mwata mo gasi na tangaloi mwerehi, a tangaloi hi vin mate. 5I Bol mo teragi na limana, a mwata hi mo soi tavuine talo avi, nge he vai asiesiginie tea. Ira tangaloi ta Molta hi ram rarai Bol ve a limana na Vuge, Sige ingeie na soi tavuine sige nge na mate vagatagale. 6Rau tino u rimbi nge a gineu he vai tea ve ran lehe. A domire mo dori taligu, ram veve vena, “ngehi a muremure.”
7A ute hi he vagahao tea dena tanona ratahigi talolo vanue Molta, henana Bublias. U vei garea lawe gamai, mo lai gamai gam vano lo valena. Lo rani gai toligi mo hikesi gamai huri vevenagi i 8tamana mo sege mo eno lolo nie. Mo mahagi, ko mo vanogi na dai. Bol mo ahu lolo vale mo tau na limana lune mo tataro meie mo mwaso taligu. 9Lo tagugi hi, a segeana mo vai na tangaloi vage lo vanue hi, ram vomai, i Bol mo vaire ram mwaso taligu. 10A tangaloi ngerehi rau bete na hogohogo sao lawe gamai. Tavohe hi gamai gam maraga dena ute hi, ram tau vurugegi na gineu lo sivi, ngerehi hurive gai hako lo turegi.
Bol mo Maraga dena vanue Molta, mo vano Rom
11Gau toga vule gaitolu lo vanue hi. A sivi gatagale mo toga aiehi, u maraga Aleksandria mo vomai. Mo toga hiligi taiehi dena taroi gamwadidi. Igamai gau vano lo aka a henagi i ‘God Gairue’. A aka u toga lo vanue hi lo taroi gamwadidi. 12Gam vano lo ute hi, Saerakus, gam tino aiehi rani gaitolu. 13Gam siregi gam toa gam dadari lo vanue, Rejiam. Lo rani tuegi a langi mo here. Gam siregi, lo rani gaivesi gam vano turu lo vanue Butedi. 14Gam haqe retuana aiehi, ram navu deni gamai ve gan tino meire wik gatagale. Lo tagugi gam vano turu gam dadari Rom.
15Retuanda ta Rom, ram rongo na roro huri gamai, ram maraga dena vanue hi, ram vomai ram haqe gamai lo turegi. Ram toga lo ute hinge i Abias u teu na valei nona mageti aie ko lo tanoi valei gaganie gaitolu rau labe aiehi. Tarogi i Bol mo lehire, mo veve harigiana lawe God huri, ko a domine mo huire mo vagevage. 16Tarogi gam vomai turu Rom, kavman mo siregi na vale gatagale lawe Bol. Siu mo tau na soldia gatagale mo leo goro e vurugegi.
Bol mo Toretore lo vanue Rom
17Lo tagui rani gaitolu, i Bol mo ware tabulutegi na ratahigi lawua ta israel huri na laqa bubugi. Tavohe hi rau vomai bubugi u rovo, mo veve lawera vena “Retueku, ineu nahe vai na gineu esi te gatagale lawe na sinobu talo tanoda. Sige a gineu esi talo lo noda togatoga ngehi a noda sesea rau leie mo himei, nge ingere ta Jerusalem ram wiribibieu, ram betea lawera tangaloi ta Rom. 18Tangaloi ta Rom, rau huieu gena huihui u sao ko ram siregieu nam vano, a vevenagi rahe haqe na gineu tea ve nai mate hurie. 19Nge ira duvi Israel ram veve leo asi vovohoieu tau mo sigei. Giniehi, ineu nam navo ve nain vanai nain veve na gineu hi mo eno luku lo nagoi Sisa. Nge neu hatie noku leo ve nai veve vomai lawera tangaloi talo tanoku. 20Vevenagi nam ware gimiu, nam lehi gimiu, nam laqa mei gimiu. Huri ram vahuieu lo seni hi, nge huri a huqe, gide tangaloi a duvi Israel dam tau na domide mo vano lune.”
21Ram veve lawera vena gamai gahe haqe na nora leta ta Judia tea huri ve gai vevegi gimiu. Siu retuanda rahe vomai tea vahinge ve rau lei na roro, sige ram veve leo asi talumiu. 22Nge gamai gam rongo garea huri gam rongo na nomu domiana. Huri gamai gam ilo hurive lategi lolo vanue, a tangaloi ram veveginigo mena nomu burigi.
23Ingere tora Bol ram tau na rani gatagale lo rani hi a nora tangaloi ram vomai ram lehe lo valena. Rau teuvuigi lolo robongi mo dadari a matenaho mo roro. Bol mo veve na nona leo lawera. Mo veve vurugegi lawera hurive i God ingeie a ratahigi lawua ve ingere doluegi rai lando mavaginie. Mo veve na leo huri na Leohora noi Mosis ko a nora ratahigi lalawua. Huri mo vevera ve ran voragi tangaloi noi huqe. 24Lavasigi ram rongo na nona leo ram lando hogo lune, nge lavasigi rahe lando hogo tea. 25-29Huri rahe lado bubugi tea meire sibora, ingere ram tauvuigi ram mule, i Bol mo veve na leo gatagale lawera vena, “!Ei! A leo hi a Vui Gogona u hora na tangaloi rugurugu hurive vin veve lawe retubude tatuei u vovohoi vurugegi. Ngehi u veve vena,
‘Gon vano gon veve lawe
na tangaloi ngerehi,
ve ineu i God nam veve vena,
“Igimiu nein rongo rongo,
nge nein he ronghogo tea.
Nein leo, leo,
nge nein he leo hogo tea.
Huri a domire u lulu vonvono beno.
Rau toqe goro na qerora,
rau qeli vonvono gina matara.
Ve ra mese vaie mwerehi,
nase vai rain leo lai gina matara,
Sige rain lei leie gina domire.
Siu ingere rain dori na domire
ve ran ladohogogieu,
siu huri ineu nain veire ve rain garea taligu.’ ”
30Lo higao gairue vovohoi, i Bol u toga lolo vale hi u tavae, nge mo rongo garea huri mo laire ram vano lo valena huri mo lehire. 31Mo veve lawera huri ve i God nge a ratahigi lawua siu a tangaloi doluegi rai tabea siu mo huhuire huri na huqe a noda ratahigi lawua. Mo qato mwerehi nge a domire he vutugegi tea siu hatie tangaloi ve vin tugoroe.
ទើបបានជ្រើសរើសហើយ៖
LALAKOGI 28: HNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013
