LALAKOGI 13
13
A warelue mo leo wahe Banabas tona Sol ko mo horara
1Lo warelue a Antiok, a tangaloi veve rarai meire huhui aiehi ko i Banabas tona Simion ngehi ram warea ve i Maeto, ko i Lusias nge ta Saerini, ko i Manaen ngehi rau haweginie mei Herod a ratahigi, ko i Sol. 2Lo taro gatagale ingere ram gologolo ko ram tabana lawe na Huqe, a Vui Gogona mo veve lawea vena, “Neu nam tarani ve igimiu nen tau Banabas ko i Sol, ve ron vai na tabana hi nau warera hurie.” 3Siu ingere ram gologolo ko ram tataro, ram tangovire gina limara ram horara rom vano.
Banabas ko i Sol rom toretore lo vanue Saebras
4Ko a Vui Gogona mo hora Banabas ko i Sol ram hivo lo vanue Selusia, rom kalo lo aka ram vano lo vanue Saebras. 5Lune ingere rom dadari, rom hage varea a Salamis, rom veve sere na leo noi God, lolo valei tataro nora duvi Israel. Ko i Jon Mak mo bulu mweire ko mo buluire lo nora tabana.
6Ko ingere ram vano utu lo tavulugi a Bavos. Aiehi, ingere ram haqe na tangaloi uviuvi managi gatagale. Ingeie hi a duvi Israel mo veve ve, ingeie a tangaloi veverarai, a henana i Bajisas. 7Ingeie a buluana noi Sejas Bolas a kavman lawua talo vanue hi Saebras. A kavman lawua hi ingeie a tangaloi mataisao garagara. Mo ware Banabas tona Sol vomai lobena huri mo tarani ve na rongo na leoi God. 8Siu a tangaloi uviuvi managi hi, ingeie hi a henana vage lo leo ta Kris vei Elimas, u tugoro garue hi mo vaie huri ve a kavman lawua hi ve na mese ladohogo. 9Siu i Sol hi a henana tuegi i Bol, mo wuwanga gina Vui Gogona, mo leo vovohoi na tangaloi uviuvi managi hi, 10mo veve vena, “Iniko a nati Tamate. Iniko gom vai goro na gineu doluegi hi rau garea, ko gu horo gina kalikeli siu gesegi gum vai leo ve gon dori na leo garea nona Huqe talo kalikeli.” 11Nge siserigi hi a limei God vin tango lumu, a matamu vin dodo, goin he lehi na leleoi reni tea vin mala ribi. “Siserigi i Elimas a matana mo vivivivi ko mo dodo maeto mo tatu lategi mo hikesi na tangaloi ve ran dule lo limana ran tomueginie. 12Ko lune a kavman lawua mo lehi na gineu mo vai mwerehi, mo ladohogo. Ingeie mo awogi garagara huri na leo huhui nona Huqe.
Bol tona Banabas lo qatui venue Antiok a Bisidia
13I Bol mena nona buluana ram lai na aka lo vanue Bavos ram vano Beka a qatui venue lawua a Bamvilia. I Jon Mak mo sireginire aiehi, mo vano taligu a Jerusalem. 14I Bol tona Banabas rom siregi na vanue Beka, rom dadari a Antiok lo vanue Bisidia, ko lo Rani Mangaana rom vano lolo valei soneana nora duvi Israel rom toga aiehi. 15A tangaloi gatagale mo valu na Leo hora noi Mosis, ko a revereve nora tangaloi veve rarai mo rovo, siu a tangaloi lalawua talolo valei soneana ram hora na leo lawe Bol tona Banabas vena, “Retuemai, tare a nomiru leo tea, gam tarani ve nero laqagi nero vagamwamwavigi na sinobu tea gina leo garea.”
I Bol mo veve sere na Roro Garea noi Jisas mo veve hurire tamaragai a duvi Israel
16I Bol mo labe hage mo horagi na limana mo surire ve ran toga rorongo, siu ingeie mo veve vena, “Igimiu a sinobu a duvi Israel, ko igimiu hi nem hudu goro na nomai God a duvi Israel, igimiu doluegi nen rorongtagieu.” 17A nomai God hi, u leowahe re tubumai, mo vaire ram saosao lo tarogi rau togagi halavano a Ijib. Ko i God u leire dena vanue Ijib gina nona huireana u lawua. 18A higao lategi ngavulu gaivesi lune ingere lo vanue vurogi ram singotutubu lawagi ingeie God he sireginire tea. 19Siu ingeie mo livu vohogi na garoi tangaloi gaibitu hi rau toga lolo vanue Kenan, ko ingeie mo bete na vanue lawe retubumai, gi vanuara. 20Siu u eno mo dadari higao vudolue vagavesi avigi ngavulu gailime.
“Lo tagugi hi, i God mo tau na tomtomegi lawera, ram tomueginire mo dadari lo taroi Samuel a tangaloi veve rarai. 21Ko ingere ram navu na ratahigi, i God mo bete Sol i netui Kis den duvi Benjemen, huri ve vin voragi nora ratahigi, vin ratahigi gorora higao ngavulu gaivesi. 22Lune i God mo lai vohoginie, ingeie mo tau Devet mo voragi nora ratahigi. Ko i God mo laqagi hurie mwere ngaha vena, ‘Nau haqe Devet i netui Sese, ngehi a tangaloi nau taranie, ingeie vin vei na gineu doluegi mwerehi nam tarani.’ 23Ko u tatarise mwere i God u warataugi beno, ingeie u tabe kalo na tangaloi gatagale den duvi Devet, a henana i Jisas huri ve vin vagamwasoi na sinobu a duvi Israel. 24Nge lune i Jisas he vonai te mo sigei, a tangaloi a henana i Jon mo toretore lawe na sinobu a duvi Israel, mo veve vena, ‘Nen tudori den nomiu galegaleasi, gimiu doluegi nen garuhigogona.’ 25Siu mo kakarani ve i Jon a nona tabanagi na rovo mo veve vena, ‘?Igimiu nem lado ve ineu ihine? Ineu hatie ngehi igimiu nem raraie. Igimiu nein lehe. Ingeie hi mo vonai lo taguku ineu nahe tatarise tea ve nain riqe na garoi nona butu.’
I Bol mo veve sere huri ve a tangaloi lalawua rau ue vagamate Jisas
26“Retueku. Igimiu hi ira duvi Ebraham, ko igimiu a sinobu wagineu vage hi nem hudu goro na nomai God, i God u hora na leoi mwasoana ngaha lawe gide.” 27A sinobu hi rau toga Jerusalem mena nora tomtomegi rahe ilo tea ve ingeie i vagamwasoi, ko rahe ilo tea vurugegi na leo nora tangaloi veve rarai ram value vataha rani mangaana. Giniehi, a leo nora tangaloi veve rarai mo eno lune huri ram vevegi Jisas ve vin mate. 28A tangaloi rahe haqe na gineu tea vohogi ve vin mate hurie, siu ingere ram navu den Baelat vena vai vagamatea. 29Lune ingere rau vei tui na gineu doluegi hi a revereve gogona u veve hurie, ram lai surie dena gai saroutu ram tuleginie lolo malanga vatu. 30Nge i God u vagamwasoie dena mateana. 31A tangaloi rau huri Jisas tomue dena vanue Kalili mo dadari Jerusalem. Lune ingeie mo maraga taligu dena mateana mo sereluae sibona lawera ram lehe a ranigi u sao. Siseri ngaha ingere ram laqagi hurie lo nagora sinobu a duvi Israel.
32“Ko igamaru go rom toga hano huri ve gori veve sere na Roro Garea lawe gimiu. A havagineu hi i God u warataugi teu lawe ratubude tuei, huri ve vin vei, 33nge bagataha u vei lawe gide hi ira duvire, u ragasi Jisas dena mateana mwere hi u reve lo Sam tavalugi gairue,
‘Iniko i netuku,
bagataha ineu nam voragi tamamu vohogi.’
34I God u veve beno ve vin ragasie dena mateana, vin he mate tea taligu ve a tarabesine vin mada mwere hi u veve lo revereve gogona vena,
‘Ineu nai bete na vaigarea gogona lawego
hi nau warataugi teu lawe Devet.
35Siu mwerehi vohogi u veve lo Sam mahogi wagineu vage vena, ‘Goin he siregi na tarabesi nom tangaloi gogona tea ve na mada.’ 36Lo taro i Devet mo mwaso tau, u vei na gineu doluegi hi i God mo tarani. Lo tagugi hi nge mo mate, ingere ram tuleginie mei retubune. Ko a tarabesine u mada beno. 37Siu i Jisas hi i God u ragasie dena mateana, a tarabesine he mada tea.
Bol mo veve sere huri ve i God vin ladovohogi na bugure sinobu
38“Retueku. Igimiu doluegi nein ilo vurugegi huri guru matamwasaragi na leo hi lawe gimiu ve a nomiu galegaleasi vin lado vohogi lui Jisas. 39Gimiu nein ilo vurugegi ve i Jisas hogosie vin vei leire hi rau ladohogo ginie rain toga mwagumwegu dena nora galegaleasi. Nge a leohora noi Mosis vin he vai gimiu tea ve nein toga mwagumwegu dena nomiu galegaleasi. 40Siu igimiu nein leo huri vurugegi, vaiteu a leo nora tangaloi veve rarai ram hogosi gimiu, ngehi mo veve vena,
41‘Igimiu ngaha neu mavaginie nem
vai asiesiginie, nein leo huri.
Neu vei bulaginie igimiu nein mate.
Huri a tabana hi ineu nam vaie
lo tarogi ngaha,
vei ihine tea gatagale vin mata-mwasaraginie
lawe gimiu nein he ladohogo tea lune.’ ”
A sinobu ram havuhevu ve rau rongo na leogarea
42Siu i Bol tona Banabas rum mwalue dena valei soneana, a sinobu ram navu denire vena, “Gam harigi gimiru huri ve lo Rani Mangaana taligu neri vomai, neri veve sere na leo tea vage lawe gamai.” 43Lune a tangaloi ram mulemule, u sao ram huri Bol tona Banabas ingere lavasigi a duvi Israel, lavasigi ingere a haroharo hi rau vovohoi ram ladohogogi God ram huri na leo huhui nora sinobu a duvi Israel.
A gaihora gairue hi rom laqa meire rom vaga mwamwavigi na domire ve rain toga vin siaga lo domi tabetabe lawua noi God.
I Bol mo veve sere na Roro Garea lawera ta Antiok
44Lo Rani Mangaana taligu, a sinobu ram sone bubugi u kakarani vei ingere doluegi lo qatui venue hi, ram rongo na leo noi noda Huqe. 45Lune ingere a duvi Israel ram lehi na sinobu ngerehi, mo garasire garagara ram veve asiesigi Bol ram qalo goro na leona vage. 46Nge i Bol tona Banabas rom laqa mo huihuire vage rom veve vena, “U tatarise ve igimiu nei rongo na leoi God tomue. Nge igimiu nem rahaginie, siu igimiu nem lado ve ngehe tatarise tea mena mwasoana hi vin he rovo lai tea. Siu hate huri i gamaru gori siregi gimiu, gori vano lobera haroharo. 47Huri a leo waratau, ‘Nau teugo ve goin voragi na leleo lawera haroharo denire sinobu a duvi Israel, goin veve sere na matahalai mwasoana lawe na ureure doluegi.’ ”
48Lune ira haroharo ram rongo na leo hi, ram rongo garea u liu, ram waregarea gina leo noi noda Huqe. Nge ingere hi i God u leo wahera beno huri ve rain lei na mwasoana hi vin he rovolai tea, ingere hi rau ladohogo ginie. 49Siu a leo nona Huqe mo vano doluegi na togagi venue lolo vanue hi.
Ngere a duvi Israel ram livu vohogi na gaihora gairue hi
50Siu a sinobu a duvi Israel ram tau keli lui Bol tona Banabas ram veve lawe na tangaloi lalawua lo qatui venue hi, mena vavine haroharo vage, ingere hi ram ladohogogi God ram vaire a lolora mo gagasi. Ram tau vuigi ram vai bulabulagi Bol tona Banabas, ram livu vohoginire dena vanuara. 51Ko ingere rom heheragi vohogi na qie dena karure gorora, mo haharagi lawera sinobu talo togagi venue hi, ve ingere rau rahagi na Roro Garea noi Jisas. Siu ingere rom vano lo qatui venue hi Ikoniam. 52Ko a sinobu hi rau ladohogogi Jisas lo vanue Antiok ram havuhevu u liu, ko ram horo gina Vui Gogona.
ទើបបានជ្រើសរើសហើយ៖
LALAKOGI 13: HNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013
