Matthew 28
28
Jesus kaa wanishkaat nipuwinihch uhchi
Mark 16.1-10; Luke 24.1-12; John 20.1-10
1Iskutak maak kaa miyaaupayiyich aniyuu e ayimiheuchiishikaayich, an maak e ati petaapihch Mary Magdalene ekw maak Mary chii nituwaapahtamuch aniyuu chiipaikamikuyuu. 2Sischikuuch maak chii mista kuihkun, ekw Utipeyihchikeu utenchilam kaa pechi aasiich kihchikiishikuhch uhchi, kaa iiche tihtipinaayich aniyuu asinii anit ishkwaahtemihch uhchi kaa ati tehtapiyich anit. 3Muyaam maak e waashtepayihch kaa ishpish chiihkaayaashtuwech ekun kaa ishinaakusit an enchil iskutak wehchi nuukusit, nesht uchekwaanim taapishkuuch kuun kaa ishpish waapisit ekun kaa ishinaakuniyikwaauh. 4Anichii maak shimaakanishach kaa naanaakachihtaatwaau aniyuu chiipaikamikuyuu e ishpish kushtaachitwaau, chii nanamipayuuch chii pahchishinuuch maak ekw mwehch e nipitwaau kaa ishinaakusitwaau.
5Ekw an enchil kaa itaat aniyuu iskweu, “Ekaawii kushtaachikw, chichischeyimitinaawaau e naanituuweyimekw Jesus an kaa chiistaaskuhwaakanuut. 6Namui ihtaau utah, wesh chii wanishkaau muyaam taan kaa itwet che ihtit. Aashtamukw pechi kanawaapahtamuwaahkw anit kaa pimishimaakanuut. 7Wii chishipayikw maak nituu wiihtamuumaahkw uchischinuhamuwaakanh, e chii wanishkaat nipuwinihch uhchi, anuhchiish maak niikaan ituhteu Galileehch ekute anite che waapamekw. Wii chischisikw maak uu kaa ititakuch.”
8Anichii maak iskweuch chii wiiwiipahiituuch anit chiipaikamikuhch uhchi e sechisitwaau nesht kaye e muuchicheyihtahkwaau, kaa nituu wiihtamuwaatwaau aniyuu chischinuhamuwaakanh.
9Sischikuuch maak chii uhchi nachishkaweuch Jesus ekw kaa itikutwaau, “Wii chiyaameyihtamukw.” Ekw kaa uchihchiihkunipayihutwaau e ihtaayich kaa maakunamuwaatwaau usith ekw kaa nuuchiishtuwaatwaau. 10Ekw Jesus kaa itaat, “Ekaawii kushtaachikw, nituu itaahkuch niichishaanich Galileehch chechii ituhtetwaau, ekute anite che waapamitwaau.”
Taan kaa itashumaakanuutwaau anichii chiipaikamikuyuu kaa naanaakachihtaatwaau
11Mekwaach maak anichii iskweuch e ishpishiitwaau e wii nituu wiihtamuwaatwaau aniyuu chischinuhamuwaakanh, pasch anichii shimaakanishach kaa naanaakachihtaatwaau aniyuu chiipaikamikuyuu chii ituhteuch anite ihtaawinihch, kaa nituu wiihtamuwaatwaau aniyuu kaa niikaanishkuwaayich ayimiheuchimaauh misiwe taan kaa ishi waapatahkwaau e ispayiyich. 12Ekw anichii kaa niikaanishkuwaatwaau ayimiheuchimaau kaye anichii kaa niikaanishkuwaatwaau iinuu kaa nishtuwiitwaau ekw kaa wiyeyihtahkwaau taan che ihtitwaau. Chii mista miyeuch maak shuuliyaayuu aniyuu shimaakanisha. 13Ekw anichii kaa niikaanishkuwaatwaau ayimiheuchimaau kaa itaatwaau aniyuu shimaakanisha, “Che itekuch awenichii, Tepiskaach mekwaach kaa nipaayaahch uchischinuhamuwaakanh chiimuut chii pechi nituwaahtamuweuch aniyuu wiiyuuyuu, ekw kaa chistuhtataayich. 14Pehtahke maak uyuu an chisheuchimaau, nika shaakuuchimaanaan ekaa chiyawaau chechii ataameyimikuyekw, chika miyupayihiitinaan ekaa wiyesh chechii ihtuutaakuyekw.”
15Ekw anichii shimaakanishach kaa utinahkwaau aniyuu shuuliyaayuu, ekun maak kaa ihtitwaau aniyuu kaa itashumaakanuutwaau. Uu maak tipaachimuwin ekun kaa ishi tipaachimushtuwaakanuutwaau Jewa iinuuch uu mekwaach kaye anuhchiish kaa chiishikaach eshkw ekun e itaakanuutwaau.
Jesus kaa wiishumaat misiwe uchischinuhamuwaakanh
Mark 16.14-18; Luke 24.36-49; John 20.19-23; Acts 1.6-8
16Ekw anichii peyakushaap chischinuhamuwaakanich kaa ituhtetwaau anite aniyuu wachiyuu Galileehch kaa ihtakuniyich anite kaa itikutwaau Jesus che ituhtetwaau. 17Iskutak maak wiyaapamaatwaau, chii nuuchiishtuweuch aat pasch anit e tashitwaau e chii aanuwehtahkwaau. 18Ekw kaa naatikutwaau Jesus kaa itikutwaau, “Nichii miikuun niya tekash chechii uchimaahkahtamaan kihchikiishikw nesht aschii. 19Uu maak uhchi maachiikw nituwaapamaahkuch misiwe e itiskaanesitwaau awenichii che ihtuutawekuch chechii uchischinuhamuwaakaniyaan, che siikahaahtuwekuch utishinihkaasuwiniyuu Uhtaawiimaau nesht Ukusiisimaau nesht Kaa payehchisiyich Ahchaahkwa. 20Kaye che chiskutamuwekuch chechii nanihiihtahkwaau misiwe taan kaa itashumitakuch. Muush maak chika wiicheutinaawaau piihiim ati iskwaapayihche aschii.”
ទើបបានជ្រើសរើសហើយ៖
Matthew 28: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
