Acts 10
10
Peter kaa nituwaapamaat Cornelius
1Chii ihtaau naapeu Cornelius e ishinihkaasut anit ihtaawinihch Caesarea kaa ishinihkaateyich, Rome nitupayuuchimaau e itapit e niikaanishkuwaat shimaakanisha anite Italy aschiihch e uhchiyich. 2Chii ayimihewaatisiyuu maak kaye misiwe anit e peyakuteusiit chii nuuchiishtuweuch Chishemanituu. Mistahii maak chii wiichiheu aniyuu kaa chistimaatisiyich Jewa iinuu. Kaye muush chii ayimihaau. 3Peyakwaau e chiishkwaapihtaachiishikaayich wiyesh nishtu e ispayiyich, chii waapahtiyaakanuu waapahtiiwewiniyuu, mitun e chii waapamaat Chishemanituu utenchilamiyuu e pechi piihcheyich, e itikut maak, “Cornelius.”
4Chii mistakanuwaapameu maak aniyuu enchil e sechisit ekw kaa itaat, “Chekwaan, Utipeyihchikeu.” Ekw kaa itikut aniyuu enchil, “Chishemanituu chii naheyihtamihiikuu taan kaa ishi ayimihaayin, kaye taan kaa ishi miyu wiichihiitwaau kutakach awenichii, namui maak chika uhchi wanchischisiitutaakw. 5Itishahuuch maak naapeuch anite Joppahch chechii wiishaamaatwaau Simon aniyuu naapeu Peter kaa ishinihkaataakanuyich. 6Anite ihtaau aniyuu kaa chiishinicheyich Simon kaa ishinihkaasuyich peshuch yaayeu chihchikamiihch kaa wiichiyich.” 7Iskutak maak ekaa e ihtaayich aniyuu enchil kaa ayimihiikut ekw Cornelius kaa wiishaamaat niishu utaapachihaakan, kaye peyakw shimaakanisha e ayimihewaatisiyich aniyuu muush kaa chii naanaakatuweyimikut. 8Cornelius kaa wiihtamuwaat misiwe taan kaa itikut aniyuu enchil ekw maak kaa itishahwaat anite aniyuu ihtaawiniyuu Joppa kaa ishinihkaateyich.
9Miin maak wiyaapaniyich wiyesh e aapihtaachiishikaayich ekw chii peshuwaapahtamiyichenich aniyuu ihtaawiniyuu Joppa kaa ishinihkaateyich. Ekut maak wiyesh kaa nituu ayimihaat Peter tahkuhch aniyuu waaskaahiikaniyuu kaa ihtaat. 10Chek maak chii siiweyuu ekw kaa wii miichit chekwaayuu, mekwaach maak e ishpishiinaanuyich e piminuutaakanuut chii waapahtiyaakanuu waapahtiiwewiniyuu. 11Chii waapahtam chiishikuyuu e aapahiipayiyich, ekw kaa waapahtahk chekwaayuu muyaam ashpimiichisuyaaniyuu e ishinaakuniyich anite e kachiihcheyekaniyich e uhchi pechi aashinikanuyich anite ishi aschiihch. 12Anit maak uyuu kaa pechi aashinikanuyich nanaahkuu awesiisa e ishinaakusiyich kaye manichuusha kaye piyeshiisha chii ihtaayuuh anit. 13Ekw kaa uhchi pehtawaat aweyuu e itikut, “Peter, pisikuuh, che nipahtaacheyin, che miichisuyin maak.”
14Ekw Peter kaa itwet, “Namui nika uhchi ihtuuten uu Utipeyihchikeu. Namui wiiskaat nuuhchi miichin chekwaan ekaa chipaa uhchi miichinaanuu kaye e wiinaach.”
15Ekw miin kaa uhchi pehtawaat aweyuu e itikut, “Ekaawii itweh e wiinaach aniyuu Chishemanituu e chii itwet e payehkaniyich.” 16Nishtwaau maak chii itihtam e pehtawaat aweyuu e ayimihiikut ekw kaye aniyuu ashpimiichisuyaanihch kaa ishinaakuniyich miin kaau chii uhpipayiniyuu anite ishi ishpimihch.
17Mekwaach maak Peter e maamituneyihtahk taan chipaa chii ishi wiihtamaachemakaniyich uyuu kaa waapahtiyaakanuut, anichii naapeuch Cornelius kaa pechi itishahukutwaau chii miskamuweuch Simon taanit waachiyich ekw maak anit e uhchi piihtukaanuyich kaa pechi niipuutwaau, 18kaa tepwetwaau e itwetwaau, “Ekut aa utah waachit Simon Peter.”
19Peter maak eshkw mekwaach chii maamituneyihtam taan chipaa chii ishi wiihtamaachemakaniyich aniyuu kaa waapahtiyaakanuut. Ekw kaa itikut Kaa payehchisiyich Ahchaahkwa, “Nituhta maa, nishtuuch utah naapeuch e pechi naanituweyimiskwaau. 20Maachiih niihtaahtawiih che nituu ayeskuwiyin, kaye ekaawii uhchi nakaawii chechii wiicheutwaau. Wesh niya nichii pechi itishahwaauch.” 21Ekw Peter kaa niihtaahtawiit, ekw kaa itaat aniyuu naapeuh, “Eukw niya aawiyaan kaa naanituwaapamiyekw. Chekwaan maak uu wehch takushiniyekw.”
22Chii iteuch maak, “Nuuchimaaminaan Cornelius kaa niikaanishkuwaat Rome shimaakanisha nichii pechi itishahukunaan. Miyeyihtaakusuu uu naapeu, kaye chisteyimeu Chishemanituu, misiwe kaye Jewa iinuuh iteyimikuu e miyeyihtaakusit. Peyakw Chishemanituu kaa payehchisiyich utenchilamiyuu chii itikuu chechii wiishaamisk anite wiichihch ekw maak chechii pehtahk taan waa ishi wiihtaman.” 23Ekw maak Peter kaa wiishaamaat aniyuu naapeuh chechii piihcheyich wiichihch. Miin maak wiyaapaniyich ekw kaa ayeskuwiit che wiichewaat, kaye maak pasch aniyuu wiichishaanimaauh anit Joppahch kaa uhchiyich chii wiicheukuuch. 24Miin wiyaapaniyich ekw kaa takushihkwaau anite aniyuu ihtaawiniyuu Caesarea kaa ishinihkaateyich, ekut maak anit kaa ashuwaapamikuwaakupanenich Cornelius kaye aniyuu kaa wiishaamaayich uwaahkumaakaniyuu kaye uwiichewaakaniyuu chechii nituhtuwaayich Peter. 25Iskutak maak Peter e ati piihchewaat Cornelius uwaaskaahiikanimiyuu chii pechi nituwaapamikuu, e niipiskuupayihuyich uhchishkuu e ihtaat e nuuchiishtaakut. 26Mikw maak Peter chii pisikuuneu e itaat, “Pisikuuh, mikw wesin naapeu kaye niya.” 27Chii ayimiheu maak aniyuu Cornelius e ati piihchetwaau aniyuu waaskaahiikaniyuu. Kaa waapamaat mihchetu iinuu e chii maauchihiituyikupananen anit. 28Ekw kaa itaat aniyuu iinuu, “Chika aayimuutamaatinaawaau chekwaan. Chimiyuchischeyihtenaawaau anite Jewa ayimihewin wiishuweusinahiikanihch e itashtech awen e Jewa iinuut ekaa chechii chiiutamaat aweyuu ekaa Jewa itiskaanesiyich kaye ekaa chechii wiichewaakanitutawaat. Chishemanituu maak nichii waapahtiikw ekaa chechii aataweyimak awen, chechii iteyimak ekaa payehchisiit maak e machisit chechii iteyimak. 29Kaa pechi wiishaamiyekw maak, namui ekaa nuuhchi wii pechi ituhten wesh tiiwehch nichii nisituhten taan kaa ishi waapatiikuyaan ekw maak kaa pechi takushiniyaan. Ekw maak waa chischeyihtamaan, chekwaan wehchi pechi wiishaamiyekw.”
30Ekw Cornelius kaa itaat, “Neu chiishikaau utaahch utah ekun wiyesh chii ishpish chiishikaache e chii ayimihaayaan anite niichihch nishtu e ispayihch e chiishkwaapihtaachiishikaach. Chek sischikuuch naapeu e waashtuweyikwaau uchekwaanim chii uhchi niipuu anit e ihtaayaan. 31Ekw kaa iishit, ‘Cornelius, Chishemanituu chii pehtam taan kaa ishi ayimihaayin kaye chii waapahtam taan kaa ishi wiichihiitwaau kutakach awenichii,’ nichii itikw. 32Ekw miin kaa iishit, ‘itishahuuch awenichii anite Joppa chechii wiishaamaatwaau aniyuu naapeu Simon Peter kaa ishinihkaasuyich. Anite ihtaau Simon e ihtaayich an kaa chiishinichet kaa ishinihkaataakanuut, anite yaayeu chihchikamiihch kaa wiichit,’ nichii itikw an enchil. 33Tiiwehch maak nichii itishahwaauch anichii naapeuch chechii wiishaamiskwaau, miywaashuu maak kaa takushiniyin. Ekw maak misiwe e ihtaayihkw utah, Chishemanituu kaye ekut e ihtaat, ekw maak che pehtamaahch taan kaa itashumisk Utipeyihchikeu che itweut.”
Peter taan kaa ishi wiihtamuwaat Cornelius
34Ekw maak Peter kaa ati ayimit, e itwet, “Ekw maak nesituhtamaan Chishemanituu peyakunihch misiwe e iteyimaat aweyuuh. 35Namui wiyeshiniyuu taan e itiskaanesiyich aweyuu. Wesh an awen kaa nuuchiishtuwaat Chishemanituu kaye kaa ihtuutahk taan e ishi kuiskunaakuniyich eukw an che naheyimikut Chishemanituu. 36Chichischeyihtenaawaau Chishemanituu e chii ihtakuniyich taan kaa ishi ayimihaat Israel iinuuh, e chii wiihtamuwaat miywaachimuwiniyuu anit chechii uhchi ayaayich chiyaameyihtamuwiniyuu Jesus e ihtaayich uhchi. Wesh wiya Jesus misiwe ayaau tipeyihchichewiniyuu. 37Chichischeyihtenaawaau kaye taan kaa ispayihch misiwe anite Israel aschiihch. Anite Galileehch chii uhchi chihchipayuu uu iskutak John kaa siikahaahtaachet kaa chiishi kacheskwet e itaat iinuuh chechii siikahaahtuwaakanuyich. 38Chichii pehtenaawaau Jesus Nazareth kaa uhchiit e chii tuumiskunikut Chishemanituu kaye e chii miikut suuhkaatisiiwiniyuu kaye Kaa payehchisiyich Ahchaahkwa. Mikw maak taanite kaa ati aihtaat chii miyutuutamaacheu kaye chii miinuwaachiheu aniyuu iinuu machimanituu kaa nanehkaachihiikuyich wesh muush chii wiicheukuu Chishemanituu. 39Nitipaatutenaan misiwe wesh niyaan tipiyeu nischiishikunaahch nichii waapahtenaan taan kaa ihtit anite ihtaawinihch Jerusalem kaa ishinihkaatech kaye anite kutak ihtaawinh kaa ihtakuniyikwaauh anite aniyuu Jewa iinuu aschiiyuu. Chii nipahaakanuu maak e chiistaaskuhwaakanuut aashiteyaahtikuhch. 40Chishemanituu maak chii wanishkaanikuu nipuwinihch uhchi kaa nishtuchiishikaayich, ekw kaa ihtuutawaat chechii nuukuhiisuyich miin. 41Namui kiipaa misiwe aweyuuh uhchi nuukushiishtaweu Jesus, mikw aniyuuh aweyuuh Chishemanituuh kaa wiyaapamikuyich chechii tipaachimikut. Kaye nichii wiichimiichisuumaanaan paatimaa kaa wanishkaat nipuwinihch uhchi. 42Ekw maak kaa itashumiyimiht Jesus chechii waawiihtamuumachiht iinuuh miywaachimuwiniyuu kaye chechii wiihtamuuchihtwaau awenichii wiya Jesus e chii wiyaapamikut Chishemanituu chechii wiyaaskunaat aweyuu kaa pimaatisiyich kaye aniyuu kaa nipiyich. 43Chii tipaachimikuu misiwe aniyehkaanaan uchischiwehiichesuuh kaa itweyich, ‘misiwe awen kaa taapwehtahk chika wepeyihtamuwaakanuu umachihtwaawinh e ishpish suuhcheyihtaakuniyich utishinihkaasuwin.’ ”
Kaa payehchisiit Ahchaahkwa chii miyaakanuuch anichii ekaa Jewa kaa itiskaanesitwaau
44Mekwaach maak Peter e ayimihaat aniyuu iinuuh, Kaa payehchisiyich Ahchaahkwa chii pechi aashiyuu anit anichii misiwe kaa nituhtahkwaau e ihtaatwaau. 45Anichii maak Jewa iinuuch kaa taapwehtahkwaau, anichii kaa pechi wiichewaatwaau Peter, chii kushkupayuuch Chishemanituu e miyaayich Kaa payehchisiyich Ahchaahkwa aniyuu iinuuh ekaa Jewa kaa itiskaanesiitwaauh. 46Chii chischeyihtamuch e chii miyaakanuyich kaa payehchisiyich ahchaahkwa, wesh chii pehtaweuch e kweschayimiyich kaye e maamihchimaayich Chishemanituu. Ekw Peter kaa itwet, 47“Uchii iinuuch chii miyaakanuuch Kaa payehchisiyich Ahchaahkwa muyaam kaye chiyaanuu kaa ishi miikuyihkw kaa payehchisiit ahchaahkw. Ekw maak namui awen chipaa uhchi chipihchiheu chechii siikahaahtuwaakanuyich nipiihch.” 48Chii itashuweu maak Peter chechii siikahaahtuwaakanuyich uyuuh Jesus Christ utishinihkaasuwiniihch. Uchii maak kaa taapwehtahkwaau chii kakwechimeuch Peter weipishchiish miin chechii ihtaayich anite e ihtaatwaau.
ទើបបានជ្រើសរើសហើយ៖
Acts 10: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
