EXODUS 31
31
LALPA Puanin Saktu Mi Zungthiam
(Ex 35.30—36.1)
1LALPA nih Mosi sinah 2“Juda phun lakah mi, Bezalel, Uri fapa, Hur tupa ka thîm. 3Anih chu Ka thiltikhonâk hen ka khattir rawh. Theihthiamnâk, zungthiamnâk, rian kip ṭuan thiamnâk ka pêk. 4A timhtuah dân leh a ṭuan dân thiam tak hen, ngûn, tangkasa, dâr; 5lungmantam tenh ding hen nektir dân, thing ker dân leh rian dang chikip ṭuannâk ka pêk. 6Dan phun ah mi Ahisamak fapa Oholiab chu a sinah ṭuan bâk ding hen ka thîm. Mi zungthiam dang tla sin khawm ah tikhonâk rokual tak ka pêk na bâk, siam ding hen thu ka pêk na mi zawng an tikho ding hen. 7Ka umnâk Puanin, Thudântuk Bâwm leh a sinh, Puanin thilthuam zawzawng, 8dawhkân leh a thuamthil, meichêu ngûn thenhlimh hen siam mi a thuamthil zawzawng, rimthâw duahnâk mâichâm, 9bâwlnâk duahnâk mâichâm leh a thuamthil tla, ṭâwlnâk mâihûm leh a tohnâk, 10bâwlpu thuam rokual tak Aron leh a fapa tla nih bâwlpu rianṭuannâk ah mang ding mi tla. 11Thuh ding mi sariak, Mun Thenhlimh rangah rimthâw tla. Hi bang thil siam ding hen thu ka nan pêk na mi zawzawng hi, thu kan pêk na mi hâwitê hen nan ti ding asi,” a ti.
Sabbath Dinhni
12LALPA nih Mosi chu Israel tla simh ding hen thu a pêk le; 13“Sabbath ka dinhni hi ulh u. Nannih leh keimah karah hi nûnthâi zawzawng khawm ah, Kei, LALPA nih keimah minung ah ka nan siam na mi ti zauhtirnâk asi. 14A thenhlimh ruangah dinhni chu nan ulh ding asi. Âuzawng nih chu ni chu ulh lo hen rian a ṭuan chun thah ding asi. 15Nan rianṭuannâk ding ah ni ruk nan nei, a ni sarih ni lam chu dinhnâk ni rangah ka sinah apnâk ni asi. Chu ni ah rianṭuantu zawng chu thah ding asi lai. 16Israel mi tla nih hi ni hi thudântuk singsiahnâk ding ah an ulh ding asi. 17Hi hi Israel mi zapi leh keimah karah singsiahnâk um kumza ding mi chu asi. Kei, LALPA nih tual leh vân ni ruk sungah ka siam le, a ni sarihnâk ah ka rianṭuan chu Ka dinhtâk ruangah,” a ti.
18Pathian nih Sinai Tlângah Mosi sinah thu a sim mi chu â lîm rawh chun, amah Pathian ngelchel nih a rîn mi lungtlêp panih lakah thupêk rîn mi tla chu Mosi sinah a pêk rawh.
ទើបបានជ្រើសរើសហើយ៖
EXODUS 31: BCLBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bawm Common Language Bible © Bangladesh Bible Society, 2004. All rights reserved.