EXODUS 27
27
Mâichâm Chu
(Ex 38.1-7)
1“Thingrî hen mâichâm siam le, kil li hen, a dung dâwng ngâ, a vâng dâwng ngâ, a sâng lei dâwng thum ding asi. 2A tlûnlei kil li ah a kî kip ah a fawng na siam ding asi. Chu mâichâm chu sa khat hep hen siam le, a pum hen dâr hen luanh ding asi. 3Vachâm siahnâk bêl leh vachâm rûtnâk, khêngkûm leh sa thurnâk thîr ngawih mi leh mei lâknâk khêng siam ding asi. Hi ruakhâu zawzawng hi dâr hen siam ding asi. 4Mâichâm rangah dâr lên siam le, chu lên tlûnlei a kî kip ah dâr a nâ pali zawnhnâk ding na siam ding asi. 5Dâr lên chu mâichâm tlâng tanglei ah siah le, a tlûnlei ah mâichâm vawmlâi tiang phâk ding hen. 6A zawnhnâk ding hen thingrî thing hen siam le, dâr hen luanh. 7Zawnh awt liauah mâichâm sîrlei a nâ lakah sawh ding asi. 8Mâichâm chu thingphel hen sawng ding, kua hung hen siam, tlângah kan zauhtir mi hâwi hen.
LALPA Umnâk Puanin Kulh Chu
(Ex 38.9-20)
9“Ka umnâk Puanin kulh chu puan mangṭhia hen puanzâr tla siam. Simlei sîr ah mi puanzâr chu a dung dâwng zâ si seh. 10Dâr tung kul, a tohnâk dâr kul a thlâinâk ngawih mi leh a fung tangka hen siam mi lakah bah ding asi, 11marlei sîr kulh khawm chu hâwitê si seh. 12Tlâklei kâng sîr puanzâr chu dâwng sâwmngâ hen sâu siding asi, a tung parâ, a tohnâk parâ hen. 13Suahlei sîr a tualmâi leikâng puanzâr khawm dâwng sâwmngâ ber ding asi. 14-15A tualmâi sîr kip ah puanzâr chu dâwng leingâ ding asi, a tung pathum leh a tohnâk pathum hen. 16A tualmâi vial ah puanzâr chu dâwng kul, puan mangṭhia, a dumpâwl, senduk leh samul lasen hen tah mi dawh tak chawih hen thuamh mi asi ding asi. A tung pali, a tohnâk pali asi ding asi. 17A kulhnâk tung zawzawng chu tangkasa tluan hen anna tlâi ver ding asi, a bahnâk ngawih mi chu tangkasa hen siam le, a tohnâk chu dâr si seh. 18A tualmâi kulh chu a dung dâwng zâ, a vâng dâwng sâwmngâ, a sâng lei chu dâwng ngâ si seh, a kulhnâk chu puan mangṭhia si seh, a tohnâk chu dâr si seh. 19Puanin saknâk ding a ruakhâu zawzawng leh a kilhnâk zawzawng leh puanzâr kilhnâk zawzawng chu dâr ver ding asi.
Meichêu Kilkâwinâk
(Lev 24.1-4)
20“Meichêu hâng rangah oliv sariak ṭha chem hawng put ding hen Israel tla chu thu pêk na le, zânlei siar chêu kho ding hen. 21Aron leh a fapa tla nih chu meichêu chu ka umnâk Puanin sung, ka Thudântuk Bâwm mâika ah puanzâr lênglei ah an siah ding asi. Ka umnâk ah chun zânlei thawk hen zînglei tiang an chêu ding asi. Hi thupêk hi Israel tla leh an thlâk tla nih an kil kumza ding asi.
ទើបបានជ្រើសរើសហើយ៖
EXODUS 27: BCLBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bawm Common Language Bible © Bangladesh Bible Society, 2004. All rights reserved.