EXODUS 25
25
Mun Thenhlimh Rangah Thil Ap
(Ex 35.4-9)
1LALPA nih Mosi sinah, 2“Israel fa tla chu ka sinah thil ap ding hen simh na. Thinlung thawk tak hen hawng pêktu vial chu lâk piak u. 3Chubang pêk ding mi tla chu: ngûn, tangkasa, dâr, 4puan mangṭhia, a dumpâwl, sendâng, samul lasen, kêl mul hen tah mi puan, 5dawrâ chal vun rawng sen suang mi, savun ṭha mi zât, thingrî thing, 6meichêu hâng, thuh ding mi sariak rimthâw, rimthâw nimh ding mi, 7karnelian leh lung sung Bâwlpu Lalchem ir lakah bêk mi ephod rangah siam ding mi tla. 8Mi zapi nih ka rangah puanin thenhlimh an siam ding, anmah tla sinah ka um khonâk ding hen. 9A ruakhâu ka ruat mi ka nan zauhtir mi hâwitê hen na siam ding asi.
Thudântuk Bâwm
(Ex 37.1-9)
10“Thingrî thing tawbalâ siam le, a dung dâwng nih leh a tan, a vâng chu dâwng khat leh a tan, a sâng lei chu dâwng khat leh a tan si seh. 11A sung a lêng chu ngûn karo hen luanh ding, a sîr tla khawm ngûn hen luanh ding. 12A putnâk ding hen a nâ ngûn hen siam ding asi, a kê pali siam ding, a sîr kip ah a nâ panih vima ding. 13A zawnhnâk ding hen thingrî tluan siam le, ngûn hen luanh mi bâwm, 14khatlei khatlei sîr vevê ah mi a nâ lakah lan dak hen sawh. 15Chu thing tlûan a nâ lakah sawh mi chu bunh kumza ding asi, phâwi ding asi lo rawh. 16Churawhchun, bâwm sungah chun lungtlêp panih dân rînnâk ka nan pêk mi siah rawh.
17“Ngûn karo hen a sinh siam le, a sâu lei dâwng nih leh a tan, a lianh lei dawng khat leh a tan si seh. 18Thilsiam (cherabim) tla a thla panih ngûn dêng hen siam le, 19a sinh khatlei dawng vevê ah a sinh hen tâwk thap ding hen siam. 20Thilsiam (cherabim) thla nei tla chu mâitawnh hen a sinh lakah an um ding asi, an thla nih mâichâm a zarh ding asi. 21Lungtlêp panih chu bâwm sungah siah le, a tlûnah sinh. 22Chunah ka nan tawng lai le, Thilsiam (cherabim) panih thla panih karah mi a sinh tlûnlei thawk hen ka dân zawzawng tla Israel mi tla rangah ka nan pêk lai.
Pathian Rangah Ap Mi
Sang Siahnâk Dawhkân
(Ex 37.10-16)
23“Thingrî thing hen dawhkân siam le, a dung dâwng nih, a vâng dâwng khat, a sâng lei dâwng khat leh a tan hen si seh. 24Ngûn hen luanh le, a sîr tla khawm ngûn hen luanh. 25A kâwm chu zabawk tia si seh, a kâwmnâk sîr chu ngûn hen na luanh ding asi. 26A zawnhnâk ding ah ngûn hen a nâ pali siam le, a kî pali zâwn kip ah mi a kê tla ah bunh rawh. 27Dawhkân zawnhnâk tlûan a nâ chu a tlâng sîr leiah bunh ding asi. 28Thingrî tluan chu siam le, ngûn hen luanh. 29Khêng tla, hâi tla, tî sâwknâk tla, khêngkûm tla, uain apnâk ding ah siam rawh. Chubang zawzawng chu ngûn karo hen siam ding asi. 30Dawhkân chu Thudântuk Bâwm mâika ah siah ding asi. Chu dawhkân tlûnah chun ka sinah ap ding mi sang thenhlimh siah kumza ding asi.
Meichêu Tohnâk
(Ex 37.17-24)
31“Meichêu tohnâk ngûn karo hen siam le, a tohnâk leh a tung chu ngûn hen siam ding asi; a thuamhnâk chawmpâr tla, a kukulul leh chawmpâr chu a tlâi ver ding asi. 32A ṭeng chu paruk ding asi, khatlei sîrah pathum, khatlei sîrah pathum. 33A ṭeng paruk kip ah a thuamhnâk chawmpâr pathum almon pâr a kukulul leh a pâr hâwi mi a um ding asi. 34Meichêu tung nih chun a thuamhnâk chawmpâr pali, almon pâr a kukulul hen a pâr hâwi mi a nei ding asi. 35A ṭeng bawp thum tang kip ah a kukulul pakhat a um ding asi. 36A kukulul tla, a ṭeng tla, a meichêu chu ngûn karo hen sa khat hep an siding asi. 37Meichêu lakah chun meichêu pasarih siam le, mâilei a cherh kho ding hen. 38Châicheh leh vachâm siahnâk khêng chu ngûn karo hen siam. 39Meichêu leh a ruakhâu siamnâk rangah ngûn kilogramme 35 na mang ding asi. 40Tlângah siam dân ka nan zauhtir mi hâwitê hen siam ding hen a thiamthih rawh.
ទើបបានជ្រើសរើសហើយ៖
EXODUS 25: BCLBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bawm Common Language Bible © Bangladesh Bible Society, 2004. All rights reserved.