Roma 16
16
16 Ik.
1Kenkrea kotan ta an Karisia otta yaishieiwangere akoro saha Poibes echi shiamkirere ash na: 2ashkanne utara upak no an buri koro nei no, Utarapa gusu shinuma uk, orowa, rengaine shinuma nep-nep kon rusuibe an chiki ikashiu yan: nei shiwentep yaikota ne yakka inne utara kashiobiuki nisa; shui, en kashiobiuki nisa ruwe ne gusu ne na.
3Kiristo otta en tura no iki Priska newa Akira uwekap an, 4nei utara ku inotu gusu yaikota koro okkeu ande nisa ruwe ne; shinuma utara otta kuani patek shomo ne, koroka, Oya un utara tumta obitta no okai karisia ne yakka koyaiiraige na: 5orowa, nei utara kot chisei ta an karisia uwekap an. Asia ta an Kiristo gusu aro-ibe ne ku omap Epainetos uwekap an. 6Echi utara gusu poron no iki Maria uwekap an. 7Ku apaha utara, en tura ipakashnu chisei ta okai Apostoro tumta assuru an, en hoshiki no Kiristo otta okai Andronikos newa Ionnias uwekap an. 8Utarapa otta aeomap an Ampriatos uwekap an. 9Kiristo otta un tura no iki Ourbanos newa ku omap Stakus uwekap an. 10Kiristo otta auwande an Aperes uwekap an. Aristobouros kot chisei ta okai utara uwekap an. 11Ku apaha Herodion uwekap an. Utarapa otta okai Narkisos chisei un utara uwekap an. 12Utarapa otta iki Tripainas newa Triposas uwekap an. 13Utarapa otta poron no iki aeomap Persis uwekap an. Utarapa otta anumge Roupos shinuma newa ku goro habo tura uwekap an. 14Asinkritos newa Pregon newa Hermes newa Patrobas newa Hermas newa tura no okai utara uwekap an. 15Pirorogos newa Yuda newa Nereas koro saha tura, samata, Orinipas newa nei utara tura no an obitta no okai ashkanne utara uwekap an. 16Chopchopse kara wa utashpa uwekap an. Kiristo otta an obitta no okai karisia echi uwekap ruwe ne na.
17Iriwak utara, echi aepakashnu epakashi echutko no, uwekoppa newa aepetchiure kunip hetukure utara eshishi kuni echi onishnishi ash na. 18Inambe gusu ne yakun, nei utara anak ne Utarapa ne Kiristo otta yaishieiwangere shomoki no koro honihi eyaishieiwangere utara ne; orowa koro hauge-itak koro pirika-itak ani wen-buri sak utara koro sambe kokandama ruwe ne. 19Echi iki itaknu ambe anak ne obitta no okai utara otta anu. Tambe gusu kuani echi enupetne ash na: koroka echi utara pirikap gusu wayashnu orowa wenbe gusu rotcha kuni ku kon rusui. 20Orowa itomo irenga koro Kamui anak ne naa pon no shiran ko echi koro chikiri pokta Satan piriore kusu ne na, Chikoro Utarapa ne Yesu Kiristo korʼirenga echi tura no an kuni akoramkon na.
21En tura no iki Timoteos anak ne echi uwekap ruwe ne; shui, Roukos newa Yason newa Sosipatros ne yakka. 22Tan kambi nuye Tertios kuani anak ne, Utarapa otta echi uwekap na. 23Otta ku reushi chisei koro guru ne Kaios newa karisia ebitta echi uwekap ruwe ne. 24Tan machiya ashikkashimare Erastos newa koro iriwak Konartos echi uwekap na.
25Orosama, ku sange shongo newa Yesu Kiristo aeupaskuma ambe an nei no, otusashuishiri wano an pakihi pakno anu shomoki no ashikkashima, koroka, 26tane uweingara utara nuye kambi ani nukare anuinap aekambakte-i nei no, otusashuishiri wano otusashuishiri pakno an Kamui ikashpaotte gusu moshiri uirup eishokor-i atte wa aitaknure kuni gusu an ambe nei no echi ashte eashkaibe otta; 27Yesu Kiristo gusu patek wayashnu Kamui otta, Shinuma otta otusashuishiri pakno nupeki an na. Amen.
ទើបបានជ្រើសរើសហើយ៖
Roma 16: AINU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© British and Foreign Bible Society 1897, 2018
