Apostoro ikip oma kambi 17
17
17 Ik.
1Orowa, nei utara anak ne Ampiporis newa Aporonia kotan akush okere chiki, Tessaronika kotan akoshirepa; nei kotan ta Yudea un utara koro uwekarapa chisei an: 2orowa, Pauros anak ne ramma an buri korachi, nei utara orun ahun, aige, re shini toho pakno Kamui kambisosh koro wa tura no eukoyupetere, 3awa, Kiristo anak ne ayairamshitnere wa rai i orowa no hetopo-shiknu kuni gusu an ap ne ari an arabe pita wa ye: samata, echi orun ku eupaskuma Yesu anak ne nei Kiristo ne sekoro ye nisa ruwe ne na. 4Orowa, okai sereke utara aeishokore wa Pauros newa Siras tura ko-okai; Kamui ko-oripak Herenes un inne utara newa moyo shomo ne okai pase shiwentep utara ne yakka ki ruwe ne. 5Koroka, Yudea un utara anak ne eyaitunnap ki wa gusu nupan wenbe ikichi utara koro wa topaha utara uwekarapare hine nei machiya ta sakayo hopunire; aige, Yason koro chisei kopiuki wa utara otta shinuma utara soyumbare kuni hunara ruwe ne. 6Orowa, shomo anukara chiki, machiya esapane utara kotpoke orun Yason newa okai iriwak utara nimba wa araki hine ene hawe ashte-hi :— Moshiri uirup kuttoko nere utara teda ne yakka araki wa okai; 7awa, Yason anak ne nei utara uina: aige, nei utara obitta Kaisaros ipawetenge otereke wa — Moshima an Moshiri Esa-pane guru ne Yesu an — ari itak shiriki wa okai ruwe ne, ari itak. 8Orowa, topaha utara newa nei machiya esapane utara tap orushpe nu chiki chiukopoye ruwe ne. 9Orowa, Yason newa moshima okai utara orowa no aekuwakorep auk chiki honnere nisa ruwe ne.
10Orowa, nani iriwak utara anak ne anchikarata Beroia kotan orun Pauros newa Siras payere; awa, nei kotan akoshirepa chiki Yudea un utara koro uwekarapa chisei ta ahup. 11Aige, nei kotan un utara anak ne irenga an keutura sange wa nei itak uk, aine, nei orushpe ene ani ne ya ingara kuni ne to pishno Kamui kambi-sosh uwande nisa ruwe ne gusu, Tessaronika un utara kasu no nupuru utara ne ruwe ne. 12Tambe gusu nei utara inne no eishokoro; shui, aainukoro Herenes un shiwentep utara ne yakka, moyo shomo ne okai okkai utara ne yakka eishokon nisa ruwe ne na. 13Koroka, Pauros anak ne Beroia kotan ta ne yakka Kamui itak assuru ashte wa an shiri Tessaronika kotan ta okai Yudea un utara inu chiki, nei kotan ta ne yakka araki wa inne topaha utara chiukopoyere hine utumashire nisa ruwe ne. 14Awa, nani iriwak utara anak ne atui-sam pakno orun arapa kuni ne Pauros omande: orowa, Siras newa Timoteos anak ne naa nei kotan ta riya. 15Koroka, Pauros tura utara anak ne Atens kotan pakno shinuma tura: aige, Siras newa Timoteos anak ne tunashino shinuma orota araki kuni akashpaotte an irenga akore chiki, nei utara nani paye nisa ruwe ne.
16Orowa, Pauros anak ne Atens kotan ta nei utara araki kuni ehuye wa an shiri rapoketa, nei machiya anak potoki ani aeshik wa an i nukara chiki, oshke un koro keutura aparaparasere. 17Awa, shinuma Yudea un utara newa Kamui ko-oripak utara tura uwekarapa chisei ta hene, samata, otta araki utara tura eihok ushiketa hene kesto range eukoyupekere nisa ruwe ne. 18Orowa, Stoik newa Epikuria un utara koro epakashi gusu eramush an utara anak ne shinuma etunangara. Aige, Tan patachinne guru hemanda itak ani itak sange kushki ya? ari itak utara okai: shui, shinuma anak ne Oya Kamui assuru ashte guru ne kotom an, ari itak utara ka okai: Shinuma anak ne Yesu newa hetopo-shiknu ambe eupaskuma ruwe ne gusu ne na. 19Orowa, nei utara anak ne shinuma kishima wa Areo nupuri ta tura hine ene itak-hi :— E ye tan ashiri epakashi nekon a ambe ne ya? un nure wa un kore. 20Inambe gusu ne yakun, aokai anak ne usa okai oya orushpe assuru ashte korʼan: tambe gusu, tap orushpe ikkewehe chi nu rusui ruwe ne. 21(Obitta no okai Atens un utara newa nei kotan ta riya utara anak ne ashiri orushpe nure hene ki inu hene ki patek ramma kane ikichi ruwe ne gusu ne na). 22Orowa, Pauros anak ne nei Areo nupuri tumta ash wa ene itak-hi :— Atens kotan un okkai ainu utara, nep ne yakka gusu echi utara anak ne Kamui ko-oripak kashpa utara echi ne kuni ku nukara. 23Inambe gusu ne yakun, ku apkash rapoketa otta echi ko-ongami okaibe ku ingara chiki, — Aeramushkari Kamui gusu-ani an itak ani kashita anuye wa an Yange set ku nukan nisa ruwe ne gusu ne na. Erampeutek no echi koongami ambe kuani echi nure ash na. 24Ingi-moshiri newa otta okaibe obitta kara Kamui anak ne, Shinuma anak, kando newa moshiri newa koro Utarapa ne wa gusu, teke ani akara chisei ta oshiroma shomoki; 25shui, Shinuma anak ne nep ka eishiramne korachi, ainu teke ani aeyaishieiwangere eaikapbe ne ruwe ne; Shinuma yaikota anak ne obitta no okai utara otta inotu hemhem, heisepa hemhem, nep ne yakka hemhem koropare ruwe ne gusu ne na; orowa, 26moshirʼebitta ko-oshiroma kuni ne shinen orowa no pishno okai moshiri uirup kara, aige, nei utara okai kuni pakihi hemhem oshiroma kuni ushike hemhem esanniyo nisa ruwe ne; 27Shinuma anak ne pishno okai chi utara orowa no ehangeko no an shomoki a yakka, nei utara Kamui hunara wa Shinuma gusu shitembatemba hine pa kuni arabe ne; 28chi utara anak ne Shinuma otta ishu hemhem ki, moimoige hemhem ki, an katuhu koro hene ki ruwe ne gusu ne na; yaikota echi koro yukara ki utara ye-hi korachi :— Chi utara anak ne Shinuma koro santek chi ne ruwe ne na. 29Tambe gusu, Kamui koro santek utara chi ne ruwe ne gusu, Kamui anak ne ainu ramepakari wa yainu gusu eshinnuye kongani hene, shirokani hene, shuma hene ne kuni aesanniyo kunip shomo ne ruwe ne. 30Tambe gusu Kamui nei eramsak an pakihi emoshma no ande nisa; koroka, tane anak neita okai yakka obitta no okai utara yaikokatpak kuni kashpaotte ruwe ne: 31Shinuma anak esanniyo okere ainu ani oupeka no ingi moshiri uirup koipishi kuni toho atte nisa ruwe ne gusu ne na; aige, Shinuma anak ne nei guru rai i orowa no hetopo-shiknure-hi ani an ambe ani obitta no okai utara gusu nei arabe sonnere nisa ruwe ne na.
32Nei utara anak ne rai i orowa no hetopo-shiknu orushpe nu chiki, eoya itak utara ka okai; koroka, moshima okai utara anak ne — Tap orushpe gusu kanna-shui e orun chi nu kusu ne na, ari itak. 33Tambe gusu, Pauros anak ne nei utara tumuge wa oman. 34Koroka, an utara anak ne shinuma tura no ko-okai wa eishokoro: nei utara tumugeta Areo nupuri un Dionusios ka an, orowa, Damaris ari an reihei koro shine shiwentep an, samata, nei utara tura moshima utara okai ruwe ne na.
ទើបបានជ្រើសរើសហើយ៖
Apostoro ikip oma kambi 17: AINU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© British and Foreign Bible Society 1897, 2018
