Nangi̱n Fandubi̱m 9
9
N Chawulu a wo ki̱ti̱m
(Nfa 22:6-16; 26:12-18)
1N Chawulu a chakakku ki̱ ni miyari̱m Tewuduwemu riye yinang yinang ko ka chi̱be chidu. N ki̱n a ya bwa wuduwe fansetiye. 2A bi̱u ko a ni ki̱n lwangi̱n ka yika kambi Kwama ti̱tu a Dimasku ke ki̱tau kwartabu n ti nati̱bu ki̱ma bunti̱ku a bwakomu, ka bemi̱ne Wurchalima ki̱n ke ni̱bu a yingen. 3Yo n ki̱n we yayu a mwata bi̱n Dimaskune, bi̱nabi̱na kaang yiiku a chire a dii yinang ki̱yile a yi fi a di̱ki̱ne ki̱chichii. 4N ki̱n a yar a ti̱m. A ki̱la nwe di̱kan ker a dii kiyi ki̱nu ko, “Chawulu, a mayire mun ni mi̱n riye?”
5N Chawulu a bi̱u ko, “M Mun n wure, Tewuduwe?” N ki̱n a ya di̱ki̱li̱n yiinu ko, “M mi̱n nang Yesu wu mun ni riye,” 6Kun n le bi̱nu, ni̱bu we fwami̱n chitu mwang maditu.
7Ni̱bu a no ki̱ya yayu n ti Chawulumu a tii wudidi, ki̱nwe keru aya a kubu niko. 8Yinu n Chawulu a kun a wudu kwalangi kiyu, aya a kubu di. Bi̱bu n chi waremu a twa̱ku ki̱n a yikan Dimasku. 9Diti kiyi yitta a kubu di, a chabu a noti̱bu chi.
10We Dimasku wuka naba bunti̱ke#9:10 naba bunti̱ke: miyare. We, wu di̱n ki̱nu n Ananiya. N Kwama a yal ki̱n a dwakam bi̱yili̱m ko, “Ananiya!” N ki̱n a ke ko, “Wai, Tewuduwe.”
11Yinu n Tewuduwe a yi ki̱n ko, “Kun n tau wa̱re wu ni̱bu ki̱yalu ko wu ti̱re, mwang ya lon Yafuda mwang ledu, mwang ya wuka naba Tarsu we fiko wu di̱n ki̱nu n Chawulu, ki̱twa̱ba̱ buni. 12N ki̱n a tu a ku wuka ni di̱n ki̱nu n Ananiya we dwakam bi̱yili̱mu a ya fi a di̱ki̱ne a yo ki̱mi̱n fa̱la̱ng ke n ki̱n a kudi.”
13N Ananiya a yi, “Tewuduwe, mi̱n nwe ya̱miyu nabwen we dur naba niwu nu, we chi ti̱bwilai ti̱tu n ki̱n a ma we ni̱bu mumi wauwadi̱m a Wurchalimamu. 14N ki̱n a be fi ki̱ni ki̱ke tikake fanseti ke ki̱tau ka nang wuwule niye wu ki̱sii mune.”
15Aya n Tewuduwe a yi ki̱n ko. “N ya mi̱n, ya n ma chitu mang fwatu. Di̱ne n sutu ki̱n ka mwa di̱n mi̱nu we yikayu kuuti, n ti mati̱m mu n ti ni̱bu Yisrelamu. 16Mang yung ki̱n nabwe riye n ki̱n ka nwedu di̱ne mwaku di̱n mi̱nange.”
17Yinu Ananiya a ke a ya, a le lo a kuku fa̱likiyu a twai Chawulu ko. “Kemi n Tewuduwe a tum mi̱ne, nang Yesu wu mwang teka mi̱ne a wa̱re wu mwang bunte. N ki̱n a ke mwang kutudi we ki̱dan, mwang ridu ki̱ni Fi̱ki̱m Kwamam.” 18Bi̱nabi̱na ti̱kan chi yinang di̱wuli̱n a swiye we nuyi kiyu, nuyu a wuden. Yinu n Ki̱n a kun ni̱bu a ma ki̱mi̱n batisma. 19Yo n ki̱n a chau chabti̱te, a ya dukanu.
N Chawulu ki̱ma di̱mwar a Dimasku
N Chawulu a ti̱ka yikai diti n ti ni̱bu bunti̱ki̱mu#9:19 Ni̱bu bunti̱ki̱mu: miyari̱m. we Dimasku.
20Bi̱nabi̱na n Chawulu a mwe ki̱fwa ya̱m we kambi murakitu ko, n Yesu nang Bwe Kwama. 21Ni̱bu bi̱bu a nwe ki̱ni̱mu a ka̱ta̱n. N chi ki̱twayadu ko, “Nii wu n ke wu a chi̱be ni̱bu a yaiti̱ ni̱bu ki̱bunti̱ Yesumu we Wurchalima? N ki̱n n ke wu a be fi ko beka wo ni̱bu yaka ni tikaketi fansetiyu ka mar chidu a di̱bi̱nti̱la?” 22Aya n Chawulu a chakakku ki̱ni dukan mwaki̱nu nabwen wu a yo ni̱bu Yafudamu ki̱swedu a Dimasku a yimbu chi ka madite, n ki̱n ki̱tau kwari̱lle ko n Yesu nang Masiya.
N Chawulu a swi we fa̱li ni̱bu Yafudamu
23A kuteng diti nabwengu, ni̱bu Yafudamu a do ka chi̱u ki̱nu. 24Aya n Chawulu a nwe ya̱m bi̱bu. Kum n ti kuko n chi ki̱swedu ki̱dwan we kwa̱r bi̱ni̱nu ki̱del ki̱nu ko ke chi chi̱u. 25Aya ni̱bu ki̱bunti̱ ki̱ni̱mu #9:25 ni̱bu bunti̱ki̱: miyari̱m. a chaku ki̱n ki̱ni ki̱ti̱ng a wuka wa̱re we yaa kwale bi̱ne.
N Chawulu a ki̱la Wurchalima
26Yo n Chawulu a le Wurchalima, n ki̱n a funti̱bwi ka lwekadu n ti miyari̱mu, aya n chi ki̱nwe taikiyu di̱ne n chi a kebu bi̱yili̱mu ko a suten a kau naba bunti̱ke. 27M Barnaba a yiu ki̱n a yika fandubu mi̱ni ki̱n. Yinu a fwa chi mi̱n yinangu n Chawulu a tekan n ti Tewuduwe we wa̱re n ti yinangu n Tewuduwe a fwa ki̱mi̱n ya̱ma̱ngu n ti yinangu n Chawulu a ma di̱mwaru we di̱n Yesu a Dimaskunu. 28Yinu fal n Chawulu a swe n ti chi ki̱ledu ka nang file we Wurchalima n ti chi, ki̱fwa ya̱mu ki̱ni dukan a ne tayi we di̱n Tewuduwe Yesunu. 29Ti̱nti̱ne ki̱fwa ya̱mu n ti ni̱bu Yafudam bi̱bu ki̱nwe yii Yelenamu, ki̱tukadu n ti chi. N chi a funti̱ bwi ki̱bau wa̱re ka chi̱n ki̱ne. 30Yo kebu ni̱bu bunti̱ki̱mu a swaan ya̱m bi̱be, n chi a da̱u ki̱n a yikan Kaisariya yinu we bwako n chi a tung ki̱n a Tarsu.
31Yinu ni̱tu ni̱bu bunti̱ki̱mitu a da buk we ki̱dire Yafudiya n ti Ka̱lili n ti Samariya. Ni̱bu bunti̱ki̱mu a ya dukanu we Fi̱ki̱m Kwamamu kangu n chi a yaki̱ bwidu nabwennangu ki̱swedu ki̱ni tayi Tewuduwe.
M Biti̱r a Lidda n ti Chofa
32Yo m Biti̱r a kana ni̱bu bunti̱kumu kwang we fantiye, yinu a ya a ma siramu we ni̱bu bunti̱ki̱mu a bi̱n Liddanu. 33We bwako n ki̱n a ya wuka nii, di̱n ki̱nu n Yiniya, wu a bubuwe a da we kwa̱mbi̱re a lam swa̱ti̱tu narube di̱ne bwi a ngi̱rma a ne ying kunu. 34M Biti̱r a yi ki̱n ko, “Yiniya, n Yesu Masiya a ben, kun n dal chi ti̱dari mwitu.” Bi̱nabi̱na n ki̱n a kun 35Nabwe ni̱be a Lidda n ti Charone a ku Yiniya ki̱ya yayu, ti̱tu a yo ni̱bu a ke bi̱yili̱mu we di̱n Tewuduwe.
M Biti̱r a kukku Tabita a fur
36Wuka na bunti̱ke we Yafa di̱n ki̱nu n Tabita, wu a suten we yii ni̱bu Yelename ko n Dorka.#9:36 Dorka: N Tabita yii Aramaya, n Tabita nang Dorkas ki̱ni yii Yelenemu, di̱nu ki̱yungdu sii di̱kire. Naye wu a ni yikiyu ki̱ma nangi̱n ti̱yilitu ki̱maka babumbubu. 37We ki̱swi wuko, burang a tau ki̱n, a bwati̱n. N chi a ru kwa̱me a ya ti̱u a kan diin. 38Aya di̱ne Lidda a kwatuwe Yafa, ni̱bu bunti̱ki̱mu a nwe ko m Biti̱r n we Lidda. N chi a funti̱ bwi a tum ni̱bu burau ko a yale, “Ti̱wana ki̱n a be dati̱datu.”
39M Biti̱r a kun a bunga ware n ti chi. Yo n chi a lam lo, n chi a yikani ki̱ni Biti̱r we kan diinu. Nati̱m buni̱mu a be bwa̱l ki̱ni di̱bi̱l, ki̱kira winiyu ki̱yungti̱ lukei chiyu n ti kuli̱nitu n Dorka a machi mi̱nitu.
40M Biti̱r a chaku chi ki̱ni kwang a fi̱lang, yinu a sung a twa̱ba̱ buni. Yo a riye, a sabran a yi kwa̱me ko, “Tabita kun.” Naye a wudu nuiyu, yinangu a ku Biti̱rengu, a kun a sweswe. 41M Biti̱r a tar fa̱la̱ngu, a maka ki̱n we kunki̱ku. Yinu a yale nati̱m buni̱mu n ti ni̱bu bunti̱ki̱mi kwang. A ni chi naye wu no a bwange ki̱ni tukuri. 42Ya̱mu a ti̱ran we Yafa. Ni̱bu nabwen a ke bi̱yili̱mu we di̱n Tewuduwenu. 43A kuteng ki̱ku m Biti̱r a dati̱ yikai diti we Yafa a lon Simun wu ki̱fu ti̱ba̱li̱ne.
ទើបបានជ្រើសរើសហើយ៖
Nangi̱n Fandubi̱m 9: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
