Nangi̱n Fandubi̱m 13
13
Ni̱bu a tum Barnaba n ti Chawulu
1We ni̱bu bunti̱ki̱mu a Antakiyamu, fa̱kubu n ti ni̱bu yungki̱mu we. Kanang chikiye m bi̱u Barnaba n ti Simeyon wu n chi ki̱yalu ko Ki̱liye n ti Luchiyo wu a Sairine n ti Manayen (Wu a dwiyen a fa̱la̱ng Mai Yiridu) n ti Chawulu. 2Yo n chi a ya ki̱sii Tewuduwe ki̱twa̱ba̱ti̱ bunitu ki̱ni dimwene, Fi̱ki̱m Kwamamu a yi chi ko, “N sutu Barnaba n ti Chawulu di̱ne nangangu mang yal chi ka madangu.” 3A kuteng twa̱ba̱ku n ti dimwen, n chi a yo Barnaba n ti Chawulu mi̱n fa̱li delaki ko a ya li̱mang.
We Sayifuru
4M Barnaba n ti Chawulu a yika Salukiya, di̱ne Fi̱ki̱m Kwamamu a tum chi. We bwako n chi a le kwa̱mbi̱re mwe a yika Saiyifuru. 5Yo n chi ti fanseti a lam Salamise, a fwa ni̱bu mi̱n ya̱m Kwamamu we kambi muraku ni̱bu Yafudamitu. N Yowana we ware n ti chi ki̱ma makaku.
6A kuteng ki̱ku n chi a kanang bekune wu a mwe, a yikan a fwe a Fafos. N chi a ya tekami̱n n ti wuka fa̱ku ti̱kwaniye naba Yafudiya, naba buwange wu n chi ki̱yalu ko Bar Chochuuwa. 7Wu n ki̱n fate Kwabna Sarsiyu Fulu. N Kwabna Sarsiyu Fulu ki̱ni swaangku nabwen. N Kwabna a yal Barnaba n ti Chawulu di̱ne ki̱baddu ka nwe ya̱m Kwamamu. 8Aya naba buwange wu di̱n ki̱nu n Alimada (ki̱ni yii ni̱bu Yelename) a kebu n chi ka fwa Kwabna mi̱n ya̱m Kwamamu ko ke Kwaba a kedu bi̱yili̱mu we. 9Aya n Chawulu wu n chi ki̱yal ti̱nu ko m Buluse, a rii ki̱ni Fi̱ki̱m Kwamamu. N ki̱n a fi̱r Alima mi̱nti̱ nu we ri̱i̱ng. 10Yinu a yi ko, “M mun bwe Setane, m mun wu mwang kebu nangang ki̱yilange, m mun naba ti̱kwani naba muli̱ne. A ne mwang du kaiku wa̱ri Tewuduwe yi deriya? 11Da̱ng ki̱ka̱ngu Kwama Tewuduwe yaka welanu ki̱ni dukan, yaka yo mi̱n ti̱dui. Ka da̱u ki̱swi a ne mwang kuu kuko. Bi̱nabi̱na di̱kuun n ti ki̱liye a yinge nui kiyu. N ki̱n a funti̱ bwi a babba nii wu ka twa̱ku ki̱ne.” 12Yo Kwabna a ku ki̱chitu we, a ya̱r yii, a ke bi̱yili̱mu we yungku ya̱m Tewuduwe.
We Antakiya wu a Bisidiya
13M Bulus n ti ni̱bu n chi waremu a chir we Fafos we kwa̱mbi̱re mwe a yika Fa̱rka̱ wu a ti̱m Famfiliyame. N Yowana wu n chi ki̱yalu ko Markus a du chi a ki̱la Wurchalima 14N Chi ti̱n a du Fa̱rka̱ a yika Antakiya wu a ti̱m Bisidiyame. N chi a le kan muraku ni̱bu Yafudamu we difi̱kare a swe we. 15A kutengu n chi a ki we lwangi̱n yili̱n Musangu n ti taki̱da fa̱kubu, tikaketi kan muraki̱nu a tum chimi̱n ya̱m ko, “Kebu mi̱m, ka ti̱ni ki̱ni bi̱kam ya̱m bi̱bu ta fwa ni̱mi̱ndi̱me, ti̱ fwa ni̱mi̱n.”
16M Bulus a kun a kukku fa̱liyu a yi chi ko, “Kebu mi̱m ni̱bu Yisrela n ti yikayu kuuti bi̱bu ki̱nwe tai Kwamamu, ti̱nwe!” 17N Kwama ni̱bu Yisrelamu a sutu tukebu chi̱remu, a yo chi a kau kuu wuduwe, we ki̱dangu n chi a swe a Masarangu, Yinu a chake chi ki̱ni dukan we a ti̱m Masarmu. 18N Kwama a ma bwakwalange ki̱ni chi swa̱ti̱tu wan taana we di̱si̱lachangi̱nu. 19N ki̱n a maka chi a chau ki̱la ki̱ni kuuti yi̱dibiin a ti̱m Kananamu. N chi a yiu ti̱m bi̱bu a kau kula chi. N chi a da̱u swa̱ti̱tu (450) yinu a ri nangang ki̱ku.
20A kuteng ki̱ku, n Kwama a ni chi ni̱bu mwataki̱m a lami̱nti̱ ki̱dang Samwila fa̱ku Kwamangu. 21Yinu ni̱bu a bau mai, n Kwama a ni chi Saul bwe Kise wu a chire a ki̱fi̱ku Benyami, n ki̱n a ma swa̱ti̱tu wan taana (40). 22A kuteng ki̱ku n ki̱n a chaku Saulangu, a yo Dauda a kau Mai, yinu a fwa ya̱mu ko, “N ya bwe Yesse, ni wu mang mi̱lan yinange, wu mang ku ka ma ki̱ke miye.”
23We ki̱fi̱ku niwangu, n Kwama a be Yisrela mi̱ne ki̱ni naba yuke, n Yesu. Yinangu a no fwangu. 24Yo no n Yesu a no fwadebe, n Yowana a ma di̱mwaru we ni̱bu Yisrelamu ko a wo ki̱ti̱m, a ma batisma. 25Yo n Yowana a mwatan ka ri nangang kange a bi̱u ko “Ti̱kuradu tiko m mi̱n n wure? M mi̱n n ke ki̱n fa. Aya wuka nii ka bedu we kuteng mangu, wu kono nang ki̱dwaku ki̱wami kiyangu mang lwebu mang kwide.”
26Kebu mi̱m, n ti̱n bwesi̱m Yibrayim, n ti chi̱n yikayu kuuti ti̱nwe tayi Kwamaye, ni̱bu a tum chi̱ni mi̱ne ya̱m yukumu. 27Ni̱bu Wurchalimamu n ti tikaketi chiyu a swaanbu ko n ki̱n nang naba yuke. Kasi ki̱ku yo n chi a maye a ri ya̱m fa̱kubu Kwamamu ni̱bu ki̱ kidu ka nang wuwule difi̱kare Yafudawamu. 28Kasi ki̱ku n chi a yabu ki̱ni ki̱le wu a lwe bwa, n chi a yi Bi̱latu ko a chi̱u. 29Kangu n chi a ri chitu a mwal a dur ki̱nitangu, n chi a si̱ku ki̱n we ki̱tiyang bwangu, a ya ti̱u ki̱n we furu. 30Aya n Kwama a kuki̱ ki̱n we bi̱bwari̱mu. 31Ditiyu nabwen ki̱yung dur ki̱nu we ni̱bu a bunga ware n ti ki̱n we ka̱lili yo a yaki̱ yika Wurchalima. Ki̱ka̱ngu ni̱bu bi̱bu n nang bi̱bu ki̱ma ni̱bu mi̱n di̱mwari̱mu.
32N ni̱n nam bi̱bu nang fwa chimi̱n ya̱m bi̱li̱mu, chi Kwama a bwa̱u n ti tebu chi̱remu, 33a ri chi̱ni mi̱n, n chi̱ni bwesi̱m ki̱mu, we ki̱dangu a kuku Yesu a furangu. Yinangu a mwal we Sa̱bura wurobengu ko,
“M mun bwemi,
n kau Te mun diwu.”
34Ya̱mu n Kwama a fwa ko n Yesu a ne bwa ti̱nuwe ki̱da, a ne fwidi̱mu. Ki̱kumang n Kwama a ri di̱kwa̱l di̱du we kunku kangu ko,
“Mang ya delaki̱ki wauwadang
ki̱ku a mwintuwe ka ridang.
Ki̱ku mang bwa̱u Dauda mi̱nangu.”
35A fwa a wuka fi we Sa̱bura ko, “A ne mwang du wu wauwade mo ka fwidu.”
36A kuteng ki̱ku n Dauda a ri ki̱ke Kwama we nangangu a du ki̱mi̱nangu, yinu n ki̱n a bwa, n chi a fur ki̱n n ti tukebi̱ ki̱m, bwi kiyu a fwi. 37Aya n Yesu wu n Kwama a kuku we bi̱bwari̱me a fwibu.
38Di̱ne yiko, kebu mi̱n, a dakan ta yindu tiko ya̱m duku ki̱letimu, m Musa a fwa chimi̱n a di̱n Yesun. 39We di̱n ki̱nu, ka nang wuwule niye wu a ke bi̱yili̱me a swi we kasi no ti̱ti̱le aya a bwin yili̱n Musantu. 40Di̱ne yiko, ti̱mangi daandaan ke ki̱la chitu tatti̱ki̱dai fa̱kubu Kwamamu a fwatu a fweduwe n ti chi̱n, a yi ko,
41“Ti̱nwei n ti̱n bi̱bu ti̱swe ni̱bu mu,
ti̱ya̱r yii ti̱twiyan!
Yamang ma kaang nangang we ki̱dang changu
nangang ki̱ku a ne ta ke bi̱yili̱mu
kasi no wuka ni a fwa chimi̱n.”
42Yo m Bulus n ti Barnaba yaki̱chiru we kwa̱re, ni̱bu a yi chi ko a be fwa chimi̱nti̱ ya̱m bi̱bu ki̱da we difi̱kare ni̱bu Yafudame ki̱kanede. 43A kuteng ki̱ku ni̱ba yaran we murakangu, ni̱bu Yafudamu nabwen n ti yikayu kuuti bi̱bu ki̱sii Kwamamu a nabu Bulus n ti Barnaba, bi̱ki̱mu a ru chimi̱n ni̱tu ko a chakakku we li̱me Kwama.
44Yo difi̱kare ni̱bu Yafudamu a kanenge, ni̱bu a muran yinangu bi̱nu ki̱ni kwang ka nwe ya̱m Tewuduwemu. 45Aya yo ni̱bu Yafudamu a ku muraki̱ ni̱bangu nabwene, a fwiren. N chi a le ki̱kwila ya̱mu m Bulus ki̱fwadi̱mu ki̱ni kaiyan ni̱re ki̱ni swa̱baku n ti ti̱turan.
46Aya m Bulus n ti Barnaba a fwa chimi̱n ya̱mu a ne tayi we, n chi a fwa ko, “A kau ni̱bu no ka mwe fwaki̱ya̱m Kwamamu we di̱chi̱ne. Aya yo tako, ti̱kudu tiko ta ya ti̱kuri ki̱diya kwadite, ni̱n ngau ni̱n ti̱ku kabu a kuuti n ke ni̱bu Yafudamu.” 47Ti̱tu nang yilang Tewuduwe a yi ko,
“N yoon mwang kau
yiiku we yikayu kuuti.
Ke m be ki̱ni yuku we ti̱ti̱niti kwang.”
48Kangu yikayu kuuti a nwe ya̱m bi̱bangu; a ma ti̱mi̱lan, a dela ya̱m Tewuduwe. Bi̱bu ni̱bu a do chimi̱n ti̱kuri ki̱diya kwaditi̱mu a ke bi̱yili̱mu.
49Ya̱m Tewuduwemu a sub a ti̱ran we ti̱m bi̱ki̱mi kwang. 50Aya ni̱bu Yafudamu a suuka nati̱bu bi̱duumu n ti kwartabu ki̱sii Kwamamu a kuki̱ muli̱n we bi̱nu. N chi a yo riye a ya Bulus n ti Barnaba, ni̱bu a naba chi we ti̱m bi̱ki̱mu. 51Fandubu a bu kuru we nani chiyu a kau di̱mwar ni̱bu bi̱n di̱ki̱ni̱mu, a kun a yika Yikoniya. 52Ni̱bu bunti̱ki̱mu a Antakiyamu a ri ki̱ni ti̱mi̱lantu yinang, n chi a rii ki̱ni Fi̱ki̱m Kwamamu.
ទើបបានជ្រើសរើសហើយ៖
Nangi̱n Fandubi̱m 13: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
